រដ្ឋបាលព្រៃឈើបកស្រាយថា ឈើប្រណិតឈូសឆាយនៅតំបន់ភ្នំតាម៉ៅមិនត្រូវបានយកទៅលក់ទេ
រដ្ឋបាលព្រៃឈើនៅថ្ងៃសុក្រម្សិលមិញនេះ បានធ្វើការបកស្រាយចំពោះការចោទប្រកាន់ថា អាជ្ញាធរបានយកឈើប្រណិតដែលបានមកពីធ្វើការឈូសឆាយនៅតំបន់ភ្នំតាម៉ៅ យកទៅលក់ដូរនៅក្រៅសំណាញ់ច្បាប់។ អាជ្ញាធរព្រៃឈើជាតិអះអាងថា ឈើប្រណិតទាំងនោះត្រូវបានយកទៅធ្វើជាអុសដុតរបស់ពលរដ្ឋទៅវិញទេ ប៉ុន្តែសកម្មជនបរិស្ថាន នៅតែសង្ស័យថា នេះគ្រាន់តែជាការលាងខ្លួនតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០៣:០៣
រដ្ឋបាលព្រៃឈើ នៃក្រសួងកសិកម្មនៅថ្ងៃទី១៦ ខែកញ្ញា ឆ្នាំ២០២២ បានចេញសេចក្តីប្រកាសព័ត៌មានច្រានចោលការចុះផ្សាយតាមបណ្តាញព័ត៌មានមួយចំនួនថា ឈើប្រណិតនៅតំបន់ភ្នំតាម៉ៅត្រូវដឹកយកទៅលក់ដូរខុសច្បាប់ក្រោយបានឈូសឆាយរំលើង ក្រោមដៃក្រុមហ៊ុនឯកជនឃុំឃិតជាមួយអាជ្ញាធរតំបន់។ ចំពោះរដ្ឋបាលព្រៃឈើ ការលើកឡើងយ៉ាងដូច្នោះ ជាចេតនាកេងប្រវ័ញ្ចនិងឆ្លៀតឱកាសយករឿងភ្នំតាម៉ៅនេះ មកចំណេញនយោបាយរបស់ជនអគតិមួយចំនួនតែប៉ុណ្ណោះ។ និងថា ដើម្បីធ្វើការវិនិឆ្ឆ័យឱ្យបានត្រឹមត្រូវ សាធារណៈជនអាចមកធ្វើការពិនិត្យ សាកសួរនិងស្រាវជ្រាវដល់ទីតាំងដោយផ្ទាល់បាន។
រដ្ឋបាលព្រៃឈើបានបកស្រាយថា ដើមឈើនៅតំបន់ដែលបានឈូសឆាយ ជាប្រភេទដើមត្បែងស្ទើរទាំងស្រុង មិនបានយកទៅលក់ដូរទេ ប៉ុន្តែមានប្រជាពលរដ្ឋរស់នៅជុំវិញស្នើសុំយកទៅប្រើប្រាស់ជាអុសដុត រីឯសំណល់សេសសល់បានសំអាតនិងកប់ទុកនៅទីទាំងផ្ទាល់ដើម្បីសំអាតទីធ្លាសម្រាប់ដាំដើមឈើឡើងវិញ។ ដោយបញ្ជាក់ទៀតថា ដើមឈើដែលមាននៅទីតាំងដីឧទ្យានសួនសត្វភ្នំតាម៉ៅ ពុំមានឈើប្រណិតនិងប្រភេទឈើដែលមានតម្លៃពាណិជ្ជកម្មឡើយ។
យ៉ាងណាក៏ដោយ សកម្មជនបរិស្ថាន កញ្ញា សូ មេត្តា បានប្រាប់វិទ្យុបារាំងនៅថ្ងៃទី១៧ ខែកញ្ញា ឆ្នាំ២០២២ថា ការបកស្រាយរបស់រដ្ឋបាលព្រៃឈើខាងលើនេះគឺជាការលាងខ្លួនតែប៉ុណ្ណោះ។ កញ្ញា មេត្តា បញ្ជាក់ថា តាមរយៈការធ្វើដំណើរផ្ទាល់ដល់កន្លែងកន្លងទៅ ទីតាំងព្រៃឈើនៅតំបន់ភ្នំតាម៉ៅដែលបានឈូសឆាយនោះ នៅឆ្ងាយពីផ្ទះប្រជាពលរដ្ឋរស់នៅ ពោលស្ថានភាពផ្លូវពុំអំណោយផលចំពោះការដឹកជញ្ជូនដើមឈើធំទាំងនោះយកជាអុសដុតបានឡើយ។
បច្ចុប្បន្ននេះ ការដាំដើមឈើដែលបានឈូសឆាយនៅតំបន់ភ្នំតាម៉ៅ ការជីកស្រះ និងអាងស្តុកទឹក ត្រូវបានបញ្ចប់ទាំង១០០ភាគរយហើយ ដែលជាការស្ថាបនាត្រៀមរៀបចំតំបន់នេះ ជាសួនភូតគាមបម្រើទេសចរណ៍។ នេះ បើតាមរដ្ឋបាលព្រៃឈើ។
គួររំព្ញកថា តំបន់ភ្នំតាម៉ៅត្រូវបានដាក់ឱ្យទៅជាតំបន់ការពារព្រៃឈើ ដោយបង្កើតជាឧទ្យានសួនសត្វ ដើម្បីថែរក្សា អភិរក្សព្រៃឈើ និងសត្វព្រៃ កាលពីខែសីហាឆ្នាំ២០២២កន្លងទៅ។ តំបន់ការពារភ្នំតាម៉ៅ មានផ្ទៃដីសរុប ២០២៥ហិកតា ក្នុងនោះផ្ទៃដី ១០២១ហិកតា ជាតំបន់ព្រៃការពារសម្រាប់ស្តារលទ្ធភាពសត្វព្រៃ។ ៥៣០ហិកតាជាតំបន់សួនភូតគាមឈើប្រណិតភ្នំតាម៉ៅ និងផ្ទៃដី៤៧៤ហិកតា ជាតំបន់ឧទ្យានសួនសត្វ។ ភ្នំតាម៉ៅ ត្រូវបានដាក់ជាតំបន់ការពារ បន្ទាប់ពីមានប្រតិកម្មរិះគន់ពីសាធារណៈមតិទៅលើសេចក្តីសម្រេចអនុញ្ញាតិអោយក្រុមហ៊ុនឯនជនចំនួនពីរធ្វើការអភិវឌ្ឍឈូសឆាយអស់ជាង៥០០ហិកតា ក៏ប៉ុន្តែត្រូវបានលុបចោលវិញដោយរដ្ឋាភិបាលកម្ពុជាក្រោយពីផ្ទុះប្រតិកម្មមហាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ