អាកាសចរណ៍ស៊ីវិល៖ គម្រោងអភិវឌ្ឍន៍អាកាសយានដ្ឋានខេត្តមណ្ឌលគិរីត្រូវរកដៃគូថ្មី ក្រោយក្រុមហ៊ុនចិនដកខ្លួន
ការអភិវឌ្ឍន៍អាកាសយានដ្ឋានខេត្តមណ្ឌលគិរីនៅតែពុំទាន់អាចមានផ្លូវដំណើរការបាននៅឡើយទេ បន្ទាប់ពីក្រុមហ៊ុនចិនដែលទទួលសិទ្ធិសាងសង់បានសុំដកខ្លួនចេញពីគម្រោង។ ជាគម្រោងសាងសង់ព្រលានយន្ដហោះខេត្តភូមិភាគឦសានកម្ពុជានេះគ្រោងដំណើរការនៅឆ្នាំ២០២២នេះ។ រដ្ឋលេខាធិការដ្ឋានអាកាសចរណ៍ស៊ីវិលបានបញ្ជាក់ប្រាប់វិទ្យុបារាំងនៅថ្ងៃនេះថា គម្រោងអភិវឌ្ឍន៍អាកាសយានដ្ឋានខេត្តមណ្ឌលគិរីរកដៃគូអភិវឌ្ឍន៍ថ្មីជំនួសឱ្យក្រុមហ៊ុនចិនខាងលើ ទៅតាមការណែនាំរបស់ក្រសួងសេដ្ឋកិច្ចនិងហិរញ្ញវត្ថុ។
ចុះផ្សាយនៅថ្ងៃ៖
ស្តាប់ - ០១:៥៨
គម្រោងសាងសងព្រលានយន្ដហោះនៅខេត្តមណ្ឌលគិរី ត្រូវបានសម្រេចស្វែងរកដៃគូអភិវឌ្ឍដ៍ឯកជនថ្មី បន្ទាប់ពីក្រុមហ៊ុនទទួលសិទ្ធិសាងសង់បានដកខ្លួនចេញ។ លោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិលលើកឡើងនៅថ្ងៃទី២០ ខែកញ្ញា ឆ្នាំ២០២២ថា ក្រោយពន្យារពេលជាបន្តបន្ទាប់ ក្រុមហ៊ុនចិនខាងលើ បានអះអាងមិនអាចបំពេញកាតព្វកិច្ចបានដោយសារតែបញ្ហាហិរញ្ញវត្ថុ និងបានសម្រេចសុំដកខ្លួនចេញពីគម្រោង។
ក្រុមហ៊ុនចិន China Power ដែលទទួលបានសិទ្ធិសាងសង់ពុំទាន់បានដាក់ទុនអភិវឌ្ឍនៅឡើយ ក្រោយក្រុមហ៊ុននោះទទួលបាន ស.ជ.ណ ពីរដ្ឋាភិបាល។
ដោយគម្រោងសាងសង់នេះមានទាក់ទងជាមួយគណៈកម្មការអភិវឌ្ឍន៍សេដ្ឋកិច្ច និងទេសចរណ៍កម្រិតជាតិ រដ្ឋលេខាធិការដ្ឋានអាកាសចរណ៍ស៊ីវិលបានស្នើគោលការណ៍ពីក្រសួងសេដ្ឋកិច្ច ធ្វើយ៉ាងណាអាចអោយគម្រោងអភិវឌ្ឍន៍អាកាសយានដ្ឋានខេត្តភាគឥសានអាននេះ អាចដំណើរការបាន។
គោលការណ៍ចំនួន៣រួមមាន ការប្រើប្រាស់ថវិការដ្ឋក្នុងដំណើរការ, លទ្ធភាពរកថវិកាកម្ចីសម្បទានពីធនាគារពិភពលោកឬធនាគារអភិវឌ្ឍន៍អាស៊ី និងចុងក្រោយបន្តស្វែងរកដៃគូឯកជនថ្មីវិញ។ ជាការឆ្លើយតបរបស់ក្រសួងសេដ្ឋកិច្ច គម្រោងអភិវឌ្ឍន៍អាកាសយានដ្ឋានខេត្តមណ្ឌលគិរី ត្រូវរកដៃគូអភិវឌ្ឍន៍ថ្មីជំនួសឱ្យក្រុមហ៊ុនចិនដែលដកខ្លួននោះវិញ។ នេះបើតាមលោក ស៊ិន ចាន់សិរីវុត្ថា។
សូមជ្រាបថា រដ្ឋាភិបាលបានផ្ដល់សិទ្ធិទៅឱ្យក្រុមហ៊ុនចិន China Power ទទួលការសាងសង់ព្រលានយន្តហោះខេត្តមណ្ឌលគិរីលើផ្ទៃដៃ ៣០០ហិកតា មានចម្ងាយប្រហែល២០គីឡូម៉ែត្រពីទីក្រុងសែនមនោរម្យ។ តាមការប៉ាន់ស្ថាន គម្រោងអភិវឌ្ឍអាកាសយានដ្ឋាននៅមណ្ឌលគិរី មានទំហំវិនិយោគប្រមាណ ១០០លានដុល្លារ។
វត្តមានអាកាសយានដ្ឋាននៅមណ្ឌលគិរី ត្រូវបានអ្នកសេដ្ឋកិច្ចវាយតម្លៃថានឹងអាចទាញរកចំណូលសេដ្ឋកិច្ច និងទេសចរណ៍កាន់តែច្រើនបន្ថែមទៀត។ ខេត្តមណ្ឌលគីរី ត្រូវបានគេចាត់ទុកជាប៉ូលសេដ្ឋកិច្ចទី៤ បន្ទាប់ពីរាជធានីភ្នំពេញ ខេត្តព្រះសីហនុ និងខេត្តសៀមរាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ