លោក ហ៊ុន សែន រំពឹងថាទីម័រខាងកើតអាចចូលជាសមាជិកអាស៊ានពេញសិទ្ធិនៅឆ្នាំ២០២៣
នៅព្រឹកថ្ងៃទី២៤ខែកញ្ញានេះ លោកនាយករដ្ឋមន្ត្រី ហ៊ុន សែន រំពឹងថាសមាជិកទី១១របស់សមាគមប្រជាជាតិអាស៊ីអាគ្នេយ៍ ឬអាស៊ាន គឺប្រទេសទីម័រខាងកើតនឹងត្រូវប្រកាសផ្លូវការនៅចុងឆ្នាំ២០២២នេះ ហើយនឹងអាចចូលជាសមាជិកពេញសិទ្ធិនៅឆ្នាំ២០២៣ខាងមុខ។ ការប្រកាសបែបនេះ គឺក្រោយពី លោក ហ៊ុន សែន មានជំនួបជាមួយលោកប្រធានាធិបតីនៃទីម័រខាងកើត ចូហ្សេ ម៉ានូអែល អរតា នៅទីស្នាក់ការអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:៤៧
រយៈពេលប្រមាណ១០ឆ្នាំមកហើយ ដែលកម្ពុជាបានជំរុញឱ្យប្រទេសទីម័រខាងកើតក្លាយជាសមាជិកអាស៊ាន ពោលគឺចាប់តាំងពីកម្ពុជាធ្វើប្រធានអាស៊ាននៅឆ្នាំ២០១២មក។ តាមរយៈបណ្តាញសង្គមរបស់លោកនាយករដ្ឋមន្ត្រី ហ៊ុន សែន នៅថ្ងៃទី២៤ ខែកញ្ញា ឆ្នាំ២០២២ កម្ពុជានាមជាប្រធានអាស៊ានឆ្នាំនេះ នៅតែបន្តប្រឹងប្រែងសម្របសម្រួលឱ្យទីម័រខាងកើតក្លាយជាសមាជិកថ្មីរបស់អាស៊ាន។ លោក ហ៊ុន សែន មានសុទិដ្ឋិនិយមថា អាស៊ាន នឹងត្រូវប្រកាសសមាជិកទី១១របស់ខ្លួននៅចុងឆ្នាំ២០២២ ហើយនៅឆ្នាំ២០២៣ សមាជិកថ្មីគឺទីម័រខាងកើត អាចចូលជាសមាជិកពេញសិទ្ធិតែម្តង។
សូមជម្រាបដែរថា ក្នុងអំឡុងពេលទៅចូលរួមកិច្ចប្រជុំមហាសន្និបាតអង្គការសហប្រជាជាតិលើកទី៧៧ លោកនាយករដ្ឋមន្ត្រីក៏មានជំនួប ដាច់ដោយឡែក ជាមួយលោកប្រធានាធិបតីទីម័រខាងកើត ចូហ្សេ ម៉ានូអែល អរតា នៅថ្ងៃទី២៣ ខែកញ្ញា ឆ្នាំ២០២២។ តាមលោក ហ៊ុន សែន ប្រធានាធិបតីទីម័រខាងកើតលោក ចូហ្សេ ម៉ានូអែល អរតា នឹងមកបំពេញទស្សនកិច្ចនៅកម្ពុជា នៅសប្តាហ៍ទី៣នៃខែតុលាខាងមុខ។ ជាដំណើរទស្សនកិច្ចដែលភាគីទាំងពីររំពឹងជួយដល់ការធ្វើពាណិជ្ជកម្ម កសិកម្ម និងវិស័យផ្សេងៗទៀតជាមួយ។
ក្នុងជំនួបជាមួយទីម័រខាងកើត លោកនាយករដ្ឋមន្ត្រីកម្ពុជាបន្តថា កម្ពុជានិងទីម័រខាងកើតគួរពិនិត្យលទ្ធភាពធ្វើពាណិជ្ជកម្មសេរីជាមួយគ្នា ដើម្បីពង្រីកការធ្វើពាណិជ្ជកម្មនិងវិនិយោគបន្ថែមទៀត ដូចអ្វីដែលកម្ពុជាមានជាមួយសមមិត្តចិន និងកូរ៉េខាងត្បូងដែរ។ ក្រៅពីនេះ ការបើកជើងហោះហើរត្រង់រវាងប្រទេសទាំងពីរ ក៏ត្រូវបានប្រមុខដឹកនាំប្រទេសកម្ពុជានិងទីម័រខាងកើតបានពិភាក្សាគ្នាក្នុងជំនួបនេះដែរ។
គួរជ្រាបថា ប្រទេសទីម័រខាងកើតបានបង្ហាញពីការព្យាយាមដើម្បីក្លាយជាសមាជិកទី១១របស់សមាគមប្រជាជាតិអាស៊ីអាគ្នេយ៍ ហៅកាត់ថាអាស៊ាន ចាប់តាំងពីឆ្នាំ២០០៧មក ហើយសំណើសុំផ្លូវការត្រូវបានធ្វើឡើងកាលពីឆ្នាំ ២០១១។ ទីម័រខាងកើត ឬសាធារណរដ្ឋប្រជាធិបតេយ្យទីម័រខាងកើត បានទទួលឯករាជ្យពីប្រទេសឥណ្ឌូនេស៊ីនៅឆ្នាំ២០០២។ មានប្រជាជនជាង១លាននាក់ និងជាប្រទេសដែលមានប្រជាជនវ័យក្មេងបំផុតមួយនៅតំបន់អាស៊ី។ យោងតាមតួលេខធនាគារពិភពលោក ៤២%នៃប្រជាជនទីម័រខាងកើត រស់នៅក្រោមបន្ទាត់នៃភាពក្រីក្រ។ កន្លងមកការបោះឆ្នោត នៅក្នុងប្រទេសក្មេងខ្ចីមួយនេះតែងតែពើបប្រទះ នឹងអំពើហិង្សា។ តែដំណើរការបោះឆ្នោតនៅទីម័រខាងកើតកាលពីខែមេសាកន្លងទៅ ត្រូវបានអ្នកអង្កេតការណ៍អ៊ឺរ៉ុបវាយតម្លៃថា ធ្វើទៅដោយរលូនមានភាពសេរីយុត្តិធម៌ អាចទទួលយកបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ