មេដឹកនាំកម្ពុជា និងវៀតណាមប្តេជ្ញាជាថ្មីបង្ហើយការងារព្រំដែនដែលនៅសេសសល់ឲ្យបានឆាប់
ប្រមុខរដ្ឋាភិបាលកម្ពុជា និងប្រមុខរដ្ឋវៀតណាម បានឯកភាពជាថ្មីថា នឹងបង្ហើយការងារសេសសល់នៃព្រំដែនរវាងប្រទេសទាំងពីរឲ្យបានចប់ឆាប់រហ័ស ខណៈដែលកិច្ចការនេះនៅសល់១០ភាគរយទៀត។ ការប្តេជ្ញាជាថ្មីនេះ គឺធ្វើឡើងនៅពេលជំនួបអាហារពេលព្រឹកនៅទីក្រុងតូក្យូ ប្រទេសជប៉ុន ជាទីដែលមេដឹកនាំប្រទេសកម្ពុជា និងវៀតណាម ទៅចូលរួមបុណ្យសព លោក សិនហ្សូ អាបេ អតីតនាយករដ្ឋមន្ត្រីជប៉ុន។
ចុះផ្សាយនៅថ្ងៃ៖
ស្តាប់ - ០២:១៥
តាមរយៈសំណេរនៅលើទំព័រហ្វេសប៊ុកនៅថ្ងៃទី២៧កញ្ញានេះ លោកនាយករដ្ឋមន្ត្រី ហ៊ុន សែន បានគូសបញ្ជាក់ពីលទ្ធផលនៃជំនួបទ្វេរភាគីនេះថា ពាក់ព័ន្ធនឹងបញ្ហាព្រំដែន គឺមេដឹកនាំទាំងពីរបាន ឯកភាពគ្នាក្នុងការបន្តដោះស្រាយការងារមួយចំនួនដែលនៅសេសសល់ ពិសេសលើបញ្ហាបោះបង្គោលព្រំដែន នៃប្រទេសទាំងពីរឲ្យកាន់ឆាប់រហ័ស។ ប៉ុន្តែ បើតាម លោក ហ៊ុន ដែលអះអាងប្រាប់ពលរដ្ឋខ្មែរនៅក្រៅប្រទេស កាលពីខែឧសភាឆ្នាំ២០២២ ការចរចារវាងគណៈកម្មការព្រំដែនទាំងពីរ មកដល់ពេលនោះ បានសម្រេចចំនួន៦ភាគរយបន្ថែមទៀត បូកទៅបានកើនដល់៩០ភាគរយហើយ។ ដូច្នេះកិច្ចការនេះនៅសល់តែ១០ភាគរយទៀតប៉ុណ្ណោះ។
ដោយចំអកទៅកាន់អ្នករិះគន់បញ្ហាព្រំដែនដែលថា ការបោះឆ្នោតព្រំដែននេះ កម្ពុជា ចាញ់ប្រៀបវៀតណាមនោះ លោក ហ៊ុន សែន អះអាងថា បើគង់តែឲ្យដីទៅវៀតណាមដដែល ម៉្លេះលោកមិនត្រូវការប្រើពេលយូរក្នុងចរចាចំណុចមិនឯកភាពគ្នានេះទេ។
បើតាមប្រមុខរដ្ឋាភិបាលកម្ពុជា ការបោះបង្គោលព្រំដែនជាមួយប្រទេសវៀតណាមដែលនៅសល់១០ភាគរយនោះ គឺនៅតំបន់ដាក់ដាំ និងដាក់ហ៊ូត ក្នុងខេត្តមណ្ឌលគិរី ប៉ុន្តែបញ្ហានេះ ភាគីទាំងពីរកំពុងចរចាគ្នាបន្ថែមទៀត។
ប្រធានក្រុមប្រឹក្សាឃ្លាំមើលកម្ពុជា នៅប្រទេសន័រវេស លោក ម៉ែន ណាត ធ្លាប់លើកឡើងថា ទោះបីរដ្ឋាភិបាលកម្ពុជាបោះបង្គោលព្រំដែនជាមួយប្រទេសវៀតណាមបាន១០០ភាគរយក្ដី ប៉ុន្តែបញ្ហាព្រំដែនប្រទេសទាំងពីរមិនអាចបញ្ចប់បានទេ ដោយសារការបោះបង្គោលព្រំដែនកន្លងមក កម្ពុជានៅមិនទាន់មានការឯកភាពជាតិនៅឡើយ។
សូមបញ្ជាក់ថា កិច្ចប្រជុំគណៈកម្មាធិការចម្រុះព្រំដែនកម្ពុជា-វៀតណាម ត្រូវបានរៀបចំឡើងនៅភ្នំពេញ កាលពីថ្ងៃទី១៣ ដល់ថ្ងៃទី១៧ ខែមិថុនា២០២២។
ភ្នាក់ងារសារព័ត៌មានវៀតណាម(VNA)បានរាយការណ៏ថា ភាគីទាំងពីរបានបញ្ជាក់ពីការប្តេជ្ញាចិត្ត និងកិច្ចខិតខំប្រឹងប្រែងដើម្បីស្វែងរកដំណោះស្រាយដោយយុត្តិធម៌ និងសមហេតុផលដែលអាចទទួលយកបានសម្រាប់ភាគីទាំងពីរ ដើម្បីបញ្ចប់ការកំណត់បង្គោលព្រំដែន និងបោះបង្គោលព្រំដែនដែលនៅសល់ ហើយថាភាគីទាំងពីរបានឯកភាពលើភាពចាំបាច់នៃការបង្កើតកិច្ចព្រមព្រៀងថ្មីស្តីពីព្រំដែន ដើម្បីជំនួសកិច្ចព្រមព្រៀងដែលបានចុះហត្ថលេខាក្នុងឆ្នាំ១៩៨៣ ក្នុងន័យជួយសម្រួលដល់ការងារព្រំដែនរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ