សាក្សីមួយចំនួនមិនអាចចូលរួមសវនាការ លោក កឹម សុខា នៅសប្តាហ៍ក្រោយ
តុលាការក្រុងភ្នំពេញបានចេញដីកាកោះហៅសាក្សីសំខាន់ៗមួយចំនួនឲ្យចូលរួមបំភ្លឺនៅក្នុងសវនាការសំណុំរឿង លោក កឹម សុខា នៅថ្ងៃពុធសប្តាហ៍ក្រោយនេះ នៅក្រោមការប្រកាន់ថា ឃុបឃិតជាមួយបរទេសដើម្បីផ្តួលរំលំរដ្ឋាភិបាលកម្ពុជា។ ប៉ុន្តែសាក្សីមួយចំនួនបង្ហាញជំហថា ពួកគេនឹងមិនមានលទ្ធភាពចូលបំភ្លឺតាមកាលកំណត់បានឡើយ ដោយសារតែមានភារកិច្ចទៅក្រៅប្រទេស ខណៈសាក្សីខ្លះនៅក្រៅប្រទេសស្រាប់ទំនងជាមិនអាចមកចូលរួមបានឡើយ។
ចុះផ្សាយនៅថ្ងៃ៖
ស្តាប់ - ០២:៣១
មានសាក្សីសំខាន់យ៉ាងតិច២រូបដែលមិនអាចចូលរួមបំភ្លឺនៅក្នុងសវនាការកាត់ក្តីលើ សំណុំ រឿង លោក កឹម សុខា នៅថ្ងៃទី៥តុលា នាសប្តាហ៍ក្រោយនេះ។ ទី១គឺលោកស្រី ចក់ សុភាព នាយិកា មជ្ឈមជ្ឈមណ្ឌលសិទ្ធិមនុស្សកម្ពុជា ទី២ លោក សៀ ភារម្យ អតីតនាយកលេខាធិការដ្ឋានក្រុមការងារពិសេសសិទ្ធិលំនៅឋាន។
សម្រាប់ លោកស្រី ចក់ សុភាព គ្រាន់តែបើកឆាករួចភ្ជុំបិណ្ឌ ចុតហ្មាយមកដល់ផ្ទះតាំងពីព្រហាម!
មិនខុសពីកាលកោះហៅលើកដំបូងកាលពីពាក់កណ្តាលឆ្នាំ២០១៨ឡើយ កាលណោះលោកស្រីបានបង្ហាញជំហរថានឹងចូលរួមឆ្លើយតបតាមការកោះហៅ ថ្វីបើពេលនោះចំពេលគាត់នៅក្រៅប្រទេសនិងត្រូវពេលត្រឡប់មកពីបារាំងថ្ងៃដែលសារព័ត៌មានគេបង្ហោះព្រោងព្រាតពីដីកាកោះហៅទាំងដែលខ្លួនលោកស្រីផ្ទាល់មិនទាន់ទទួលបានដីកាយ៉ាងណាក្តី។ តែទីបំផុតសាក្សីរូបនេះបានចូលឆ្លើយតបតាមកាលកំណត់ពេលនោះនៅដំណាក់កាលស៊ើបសួរ។
ប៉ុន្តែចំណោទពេលនេះគឺដីកាកោះចំពេលត្រូវជាប់បេសកកម្មទៅក្រៅប្រទេស ប្រជុំសំខាន់ជាមួយអ្នករាយការណ៍ពិសេសទទួលបន្ទុកសេរីភាពបញ្ចេញមតិ និងទស្សនយោបល់ ដោយផ្តោតលើបញ្ហាហឹង្សាផ្អែកលើយេនឌ័រ។ ការណ៍នេះបានរារាំងលោកស្រី ចក់ សុភាព មិនអាចចូលរួមសវនាការលោក កឹម សុខា បាននៅសប្តាហ៍ក្រោយបានឡើយ។ នេះជាការគូសបញ្ជាក់របស់លោកស្រី ចក់ សុភាព តាមរយៈហ្វេសប៊ុកនៅថ្ងៃពុធនេះ។
ចំណែកលោក សៀ ភារម្យ អតីតនាយកលេខាធិការដ្ឋានក្រុមការងារពិសេសសិទ្ធិលំនៅឋាន បានឲ្យដឹងថាមកដល់ពេលនេះ លោកបានទទួលដីកាលើកទី៣ ហើយ ខណៈលោកកំពុងភៀសខ្លួននៅក្រៅប្រទេសនៅឡើយ។
ទោះជាយ៉ាងណា លោក សៀ ភារម្យ មិនបានបញ្ជាក់ដាច់ខាតថា លោកអាចមកចូលរួមបានឬ មិនមកចូលរួមឆ្លើយបំភ្លឺនោះឡើយ ខណៈលោកខកខានចូលបំភ្លឺ២លើករួចមកហើយ។
កាលពីថ្ងៃទី១៤កញ្ញា ប្រធានក្រុមប្រឹក្សាជំនុំជម្រៈ លោក កូយ សៅ បានប្រកាសថា ក្រៅពីសាកសួរសាក្សីនៅថ្ងៃទី៥ ខែតុលា ក៏មានដែរគម្រោងសាក្សីផ្សេងទៀតនៅតាមខេត្ត នឹងត្រូវធ្វើនៅថ្ងៃទី១២ ខែតុលា ឆ្នាំ២០២២។
គួរឲ្យដឹងថា តាំងពីក្រោយចាប់ខ្លួនលោក កឹម សុខា នៅចុងឆ្នាំពី២០១៧ គឺមានសាក្សីជាច្រើនត្រូវបានតុលាការកោះហៅដូចជា លោក ឈឹម ផលវរុណ អតីតទីប្រឹក្សាលោក កឹម សុខា និងបច្ចុប្បន្នជាអ្នកនាំពាក្យគណបក្សប្រជាជនកម្ពុជា លោក គង់ គាំ អតីតមន្ត្រីជាន់ខ្ពស់អតីតគណបក្សសង្គ្រោះជាតិ លោក ប៉ា ងួនទៀន នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក មឿន តុលា នាយកអង្គការសង់ត្រាល់ ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ