ក្តីក្តាំបរិហាកេរ្តិ៍៖ លោក សុន ឆ័យ ថាតុលាការឲ្យឱកាសមេធាវី គ.ជ.ប បកស្រាយច្រើនជាងមេធាវីលោក
លោក សុន ឆ័យ អនុប្រធានគណបក្សភ្លើងទៀន បានចូលរួមទៅជំនុំជម្រះសំណុំរឿងបរិហាកេរ្តិ៍ ពាក់ព័ន្ធនឹងការលើកឡើងពីការលួចបន្លំសន្លឹកឆ្នោត នៅសាលាដំបូងរាជធានីភ្នំពេញ។ ការជំនុំជម្រះក្តីទីមួយលោក សុន ឆ័យ បានចាយពេលអស់ជាង៣ម៉ោង តែលោក សុន ឆ័យ ហាក់មិនសប្បាយចិត្ត ដ្បិតតុលាការឲ្យឱកាសទៅមេធាវី គ.ជ.ប ច្រើនជាងមេធាវីរបស់លោក ក្នុងការបកស្រាយបំភ្លឺ។
ចុះផ្សាយនៅថ្ងៃ៖
ស្តាប់ - ០២:១៤
ក្តីក្តាំដំបូងដែលលោក សុន ឆ័យ អនុប្រធានគណបក្សភ្លើងទៀន ចូលទៅតទល់នៅសាលាដំបូងរាជធានីភ្នំពេញ នៅព្រឹកថ្ងៃព្រហស្បតិ៍នេះ គឺជាក្តីក្តាំនៃបណ្តឹងរបស់គណៈកម្មាធិការជាតិរៀបចំការបោះឆ្នោត ដែលបានប្តឹងលោក សុន ឆ័យ ពីបទបរិហាកេរ្តិ៍ ពាក់ព័ន្ធនឹងការលើកឡើងពីការលួចបន្លំសន្លឹកឆ្នោតនៃការបោះឆ្នោតឃុំ-សង្កាត់ អាណត្តិទី៥។
ជាង៣ម៉ោងនៃការតតាំង លោក សុន ឆ័យ បានឆ្លើយប្រាប់ក្រុមអ្នកសារព័ត៌មានថា ការជំនុំជម្រះហាក់មានភាពតឹងសសៃក ព្រោះលោកត្រូវលើកឡើងភស្តុតាងមកគាំទ្រចម្លើយរបស់លោក។ លោក សុន ឆ័យ អះអាងថា ភស្តុតាងទាំងអស់ដែលលោកបានដាក់ មានភាពជាក់ស្តែង ហើយការអះអាងជាដដែលៗរបស់លោក និងមេធាវីការពារក្តី លោក ជូង ជូងី គឺការលើកឡើងរបស់លោក សុន ឆ័យ មិនមានកំហុសសោះឡើយ។ បើតាមលោក សុន ឆ័យ គឺអ្វីដែលលោកលើកឡើង គឺមិនមានចំណុចណាមួយបានបរិហាកេរ្តិ៍ គ.ជ.ប នោះទេ។
ក្នុងអំឡុងពេលសវនាការកំពុងបន្តនីតិវិធីក្នុងតុលាការ លោក សុន ឆ័យ បានកត់សម្គាល់ថា មេធាវីរបស់លោក ហាក់មិនសូវទទួលបានឱកាសឆ្លើយបំភ្លឺទៅនឹងការចោទប្រកាន់សោះឡើយ។ ផ្ទុយមកវិញ លោកអះអាងថា តុលាការបានឲ្យឱកាសច្រើនទៅភាគីមេធាវីដើមបណ្តឹង គ.ជ.ប ក្នុងការបកស្រាយបំភ្លឺ ច្រើនជាងការឲ្យឱកាសមកមេធាវីរបស់លោក។ លោកថា ចំណុចនេះ បានធ្វើឲ្យមេធាវីរបស់លោកមិនសប្បាយ ទៅនឹងការឲ្យសិទ្ធិរបស់តុលាការ។
សម្រាប់លោក សុន ឆ័យ ការណ៍នេះហាក់ធ្វើឲ្យក្តីក្តាំរបស់លោក មិនសូវមានសង្ឃឹមក្នុងការទទួលបានការជំនុំជម្រះមួយ ដោយយុត្តិធម៌។
ក៏ប៉ុន្តែលោក ប្លង់ សុផល អ្នកនាំពាក្យតំណាង អយ្យការអមសាលាដំបូងរាជធានីភ្នំពេញ បានប្រាប់វិទ្យុបារាំងអន្តរជាតិ ថា សវនាការនៅព្រឹកនេះបានប្រព្រឹត្តិទៅតាមនីតិវិធី ហើយគ្រប់ភាគីទាំងអស់សុទ្ធតែត្រូវបានអនុញ្ញាតឲ្យអនុវត្តសិទ្ធិរបស់ខ្លួនទៅតាមច្បាប់។
គួរជម្រាបថា លោក សុន ឆ័យ បានរងនូវបណ្តឹងចំនួនពីរ ពីគណៈកម្មាធិការជាតិរៀបចំការបោះឆ្នោត និងគណបក្សប្រជាជនកម្ពុជា ក្រោយពេលអ្នកនយោបាយកំពុងមានប្រជាប្រិយរូបនេះ បានថ្លែងពីភាពមិនប្រក្រតីនៃការលួចបន្លំសន្លឹកឆ្នោត។ នៅព្រឹកថ្ងៃព្រហស្បតិ៍ តុលាការក៏បានសម្រេចបើកការជំនុំជម្រះលើបណ្តឹងរបស់គណៈកម្មាធិការជាតិរៀបចំការបោះឆ្នោត និងត្រៀមប្រកាសសាលក្រមនៅថ្ងៃសុក្រទី០៧តុលា ខណៈដែលបណ្តឹងរបស់គណបក្សកាន់អំណាច ដែលទាមទារសំណងជាទឹកប្រាក់ជាង១លានដុល្លារអាមេរិក តុលាការនឹងបើកការជំនុំជម្រះនៅថ្ងៃទី០៧តុលាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ