សង្គមស៊ីវិលថា បើរដ្ឋាភិបាលមានឆន្ទៈនឹងការពារកម្ពុជាពីឋានសួគ៌នៃឧក្រិដ្ឋកម្ម
បន្ទាប់ពីប្រមុខរដ្ឋាភិបាល លោក ហ៊ុន សែន នៅថ្ងៃទី២៩ខែកញ្ញានេះ អំពាវនាវទៅកាន់អ្នកពាក់ព័ន្ធរួមគ្នាការពារប្រទេសកម្ពុជា«កុំឲ្យក្លាយជាឋានសួគ៌នៃឧក្រិដ្ឋកម្ម» មន្រ្តីអង្គការសង្គមស៊ីវិលមួយចំនួនបានមើលឃើញថា មិនពិបាកទេក្នុងការទប់ស្កាត់បញ្ហានេះឲ្យមានប្រសិទ្ធិភាពនោះ បើរដ្ឋាភិបាលពិតជាមានឆន្ទៈក្នុងការទប់ស្កាត់មែននោះ។
ចុះផ្សាយនៅថ្ងៃ៖
ស្តាប់ - ០២:៤៦
ដើម្បីកុំឲ្យក្លាយជាឋានសួគ៌នៃឧក្រិដ្ឋកម្ម អាជ្ញាធរពាក់ព័ន្ធក្នុងប្រទេសកម្ពុជាត្រូវមានការតាំងចិត្ត ឆន្ទៈ និងដកខ្លួនពីបញ្ហាពុករលួយ។ នេះការលើកឡើងរបស់ លោក អំ សំអាត នាយកប្រតិបត្តិនៃអង្គការលីកាដូ។ លោកបន្ថែមថា មន្ត្រីអនុវត្តច្បាប់ត្រូវធានាថា ការអនុវត្តច្បាប់របស់ខ្លួនធ្វើឡើងដោយស្មើភាពមិនប្រកាន់បក្ខពួក ទោះបីជាអ្នកនោះមានឋានៈបុណ្យសក្ដិអ្វីក៏ដោយ ហើយសំខាន់ជាងនេះទៀមន្ត្រីដកខ្លួនចេញពីសំណូកសូកប៉ាន់ពាក់ព័ន្ធបទល្មើសជួញដូរមនុស្សនិងបទល្មើសឧក្រិដ្ឋផ្សេងទៀត។ ដូច្នេះគ្រប់យ៉ាងផ្ដើមចេញពីមន្ត្រីទៅមុនសិន ទើបប្រតិបត្តិការសង្គ្រោះកម្ពុជាចេញពីឋានសួគ៌នៃឧក្រិដ្ឋកម្មគ្រប់ប្រភេទមានប្រសិទ្ធិភាព។
មន្ត្រីសិទ្ធិមនុស្សរូបនេះចាត់ទុកស្ថានភាពដែលកំពុងតែកើតមាននៅកម្ពុជាសព្វថ្ងៃ ដែលក្លាយជាទីតាំងជួញដូរមនុស្ស ទីតាំងផលិតគ្រឿងញៀនសម្រាប់នាំចេញ រួមនឹងការប្រព្រឹត្តល្បែងស៊ីសង់មិនថា អនល្បែងតាមអនឡាញឬការប្រព្រឹត្តល្បែងស៊ីសង់ថ្នាក់មូលដ្ឋាន ហាក់ដូចជាស្ថានភាពអាសន្នដែលទាមទារឲ្យពង្រឹងការយកចិត្តទុកដាក់ដោះស្រាយឲ្យបានខ្ពស់។
ដំណាលគ្នានេះ លោក សេក សុជាតិ ជាស្ថាបនិកនៃអង្គការអភិវឌ្ឍន៍ផ្នត់គំនិតហៅកាត់ថា MDOលើកឡើងថា ដើម្បីរួមចំណែកលុបបំបាត់រូបភាពទាំងនេះ រដ្ឋាភិបាលត្រូវវែកមុខមន្ត្រីពាក់ព័ន្ធនឹងរឿងនេះយកមកផ្ដន្ទាទោសតាមផ្លូវច្បាប់ បើពុំដូច្នេះទេ ការអំពាវនាវទៅកាន់អ្នកពាក់ព័ន្ធរួមគ្នាការពារប្រទេសកម្ពុជា«កុំក្លាយជាឋានសួគ៌នៃឧក្រិដ្ឋកម្ម»មិនមានប្រសិទ្ធភាពឡើយ។ ទោះជាបែបណាក្ដី លោក សេក សុជាតិ បានឲ្យយោបល់ថា គេមិនត្រូវរួមគ្នាដោះស្រាយលើបញ្ហាដែលកំពុងតែមាននេះដោយកុំដាក់បន្ទុកលើភាគីណាមួយតែម្ខាងនោះ។
យ៉ាងណាមិញលោកនាយករដ្ឋមន្ត្រី ហ៊ុន សែន បានចាត់ទុកការជួញដូរមនុស្សជាបញ្ហាសាកល មិនមែនមានតែកម្ពុជានោះទេ តែបើមិនឆាប់រួមទប់ស្កាត់ទេវានឹងក្លាយជាគោលដៅសុវត្ថិភាពរបស់ពួកឧក្រិដ្ឋជនរត់ពន្ធមនុស្សដែលយកកម្ពុជាជាទីតាំងប្រព្រឹត្តបទល្មើសនេះ។ បន្ថែមលើនេះរដ្ឋាភិបាលបានកំណត់យកថ្ងៃទី២០ ខែសីហា ដើម្បីប្រារព្ធទិវាជាតិអន្តរសាសនាប្រឆាំងការជួញដូរមនុស្ស។
នៅក្នុងវេទិកាអន្តរសាសនាប្រឆាំងការជួញដូរមនុស្សលើកទី៦នៅព្រឹកថ្ងៃទី២៩ ខែកញ្ញា ឆ្នាំ២០២២នេះដែរ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានលើកយករបាយការណ៍ស្ទង់មតិ ពលរដ្ឋជាង១ពាន់នាក់ក្នុង១៣រាជធានីខេត្តមកបង្ហាញថា ដើមហេតុដែលនាំឲ្យមានការជួញដូរមនុស្សកើតឡើងដោយសារ បន្ទុកគ្រួសារនិងបំណុល ខ្វះការយកចិត្តទុកដាក់ថែរក្សាពីគ្រួសារនិងសង្គម ខ្វះការសិក្សានិងការអប់រំ កង្វះការទទួលបានព័ត៌មានដែលផ្ដល់ដោយរដ្ឋនិងសង្គមស៊ីវិល និងការចាញ់ល្បែងស៊ីសង ការសេពគ្រឿងញៀននិងគ្រឿងស្រវឹង។
សូមញ្ជាក់ជូនថា ប្រតិបត្តិរបស់អាជ្ញាធរដើម្បីលាងសម្អាតកម្ពុជាពីរឿងអាស្រូវមួយចំនួននៅចំពោះមុខ ធ្វើឡើងក្រោយការបាយការណ៍ស្តីពីការជួញដូរមនុស្សឆ្នាំ២០២២ របស់ក្រសួងការបរទេសអាមេរិក កាលពីថ្ងៃទី១៩ ខែកក្កដា បានទម្លាក់ចំណាត់ថ្នាក់កម្ពុជាមកកម្រិតទី៣អាក្រក់បំផុត ពុំធ្លាប់មានតាំងពីឆ្នាំ២០១៥មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ