ក្រសួងទេសចរណ៍ដាក់យុទ្ធសាស្រ្ត៣ធំៗ ក្នុងការលើកស្ទួយវិស័យទេសចរណ៍ក្រោយវិបត្តិកូវីដ
ក្នុងឱកាសនៃការប្រារព្ធទិវាទេសចរណ៍ពិភពលោក ២០២២ នៅថ្ងៃទី៣ តុលាម្សិលមិញ ក្រសួងទេសចរណ៍កម្ពុជា សម្រេច ដាក់ចេញនូវយុទ្ធសាស្រ្ត៣ធំៗ ដើម្បីលើកស្ទួយវិស័យទេសចរណ៍ក្នុងដំណាក់កាលក្រោយវិបត្តិកូវីដ។ យុទ្ធសាស្រ្តទាំង៣ មានដូចជា ការបណ្តុះបណ្តាលអក្ខរកម្មឌីជីថលដល់គ្រប់តួអង្គទាំងអស់ក្នុងវិស័យទេសចរណ៍ បង្កើនការអភិវឌ្ឈទេសចរណ៍ជនបទ និងបន្តការគាំទ្រសហគ្រាសខ្នាតតូចបំផុត ខ្នាតតូច និងខ្នាតមធ្យម។ ជុំវិញការដាក់ចេញនូវយុទ្ធសាស្ត្រនេះ អ្នកជំនាញវិស័យទេសចរណ៍យល់ឃើញថា នេះជាយុទ្ធសាស្ត្រដែលស្របនឹងតម្រូវការពិភពលោក និងកម្ពុជា។
ចុះផ្សាយនៅថ្ងៃ៖
ស្តាប់ - ០១:៥៩
ថ្លែងនៅក្នុងទិវាទេសចរណ៍ពិភពលោក ២០២២ លោក ថោង ខុន រដ្ឋមន្ត្រីក្រសួងទេសចរណ៍ បានដាក់ចេញនូវយុទ្ធសាស្រ្ត៣ធំៗ ក្នុងការលើកស្ទួយវិស័យទេសចរណ៍ក្រោយវិបត្តិកូវីដ។ យុទ្ធសាស្រ្តទាំង៣ រួមមានទី១ បរិវត្តកម្មឌីជីថលក្នុងវិស័យទេសចរណ៍ គឺការបង្កើនការបណ្តុះបណ្តាលអក្ខរកម្មឌីជីថលដល់គ្រប់តួអង្គទាំងអស់ក្នុងវិស័យទេសចរណ៍កម្ពុជា ជាពិសេសប្រជាពលរដ្ឋដែលជាអ្នកផ្តល់សេវាកម្មនៅមូលដ្ឋាន។
ចំណែកឯយុទ្ធសាស្រ្តទី២ បង្កើនការអភិវឌ្ឍទេសចរណ៍ជនបទ គឺរៀបចំផែនការអភិវឌ្ឍទេសចរណ៍ជនបទថែមទៀត ឱ្យឆ្លើយតបទៅនឹងនិន្នាការទេសចរណ៍ថ្មីៗ ចូលរួមដោះស្រាយបញ្ហាប្រឈមពាក់ព័ន្ធនឹងបម្រែបម្រួលអាកាសធាតុ និងចំណាកស្រុក។ យុទ្ធសាស្រ្តទី៣ បង្កើនការអភិវឌ្ឍមូលធនមនុស្សក្នុងវិស័យទេសចរណ៍ គឺការបង្កើនកម្មវិធីបណ្តុះបណ្តាលជំនាញបន្ថែម និងជំនាញថ្មី ដល់សិស្ស-និស្សិតកំពុងសិក្សា អ្នកកំពុងបម្រើការងារ និងអ្នកធ្លាប់បម្រើការងារទេសចរណ៍។
ជុំវិញការដាក់ចេញនូវយុទ្ធសាស្ត្រទាំង ៣ របស់ក្រសួងទេសចរណ៍ លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាយល់ឃើញថា ជាការដាក់យុទ្ធសាស្ត្រដែលស្របនឹងតម្រូវការរបស់ពិភពលោក និងកម្ពុជា។ លោកស្រីបន្ដថា កម្ពុជាត្រូវតាមឱ្យទាន់នូវការវិវត្តរបស់បច្ចេកវិទ្យា មិនអាចរំលងឧស្សាហកម្ម ៤.០ផ្នែកបច្ចេកវិទ្យាឡើយ ពោលគឺអ្វីៗត្រូវធ្វើឡើងតាមប្រព័ន្ធឌីជីថល ទោះបីស្ថានភាពនៃជំងឺកូវីដមានការថមថយវិលត្រឡប់ទៅស្ថានភាពដើមក៏ដោយ។ លោកស្រីក៏បានយល់ឃើញផងដែរថា សមត្ថភាពរបស់ពលរដ្ឋជនបទក្នុងសហគមន៍ទេសចរណ៍ក៏មានតួនាទីក្នុងការទាកទាញភ្ញៀវទេសចរមកទស្សនាកម្សាន្តរយៈពេលយូរផងដែរ។
ជាការកត់សម្គាល់ កម្ពុជានឹងចូលរួមក្នុងកម្មវិធីភូមិទេសចរណ៍ឆ្នើម (UNWTO Best Tourism Village) ដែលបានរៀបចំដោយអង្គការទេសចរណ៍ពិភពលោក (UNWTO) បង្កើតកម្មវិធីយុវជន និងធុរកិច្ចទេសចរណ៍ជនបទ ផ្ដោតលើការអភិវឌ្ឈ ការច្នៃប្រឌិតទេពកោសល្យជនបទ និងយុទ្ធនាការ ការបង្កើតថ្មី និងនវាវុវត្តន៍ទេសចរណ៍។ នេះបើតាមសេចក្ដីប្រកាសព័ត៌មានរបស់ក្រសួងទេសចរណ៍។
គួរជម្រាបជូនថា ទិវាទេសចរណ៍ពិភពលោកឆ្នាំ២០២២នេះ ធ្វើឡើងក្រោមប្រធានបទ «ការគិតគូរឡើងវិញពីទេសចរណ៍»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ