សមាគមគ្រូបង្រៀនទាមទារតម្លើងប្រាក់ខែឲ្យបាន១ភាគ៤នៃប្រាក់ខែតំណាងរាស្ត្រ
នៅថ្ងៃទី៥តុលាស្អែកនេះគឺជាទិវាគ្រូបង្រៀនពិភពលោក។ នៅកម្ពុជា សមាគមគ្រូបង្រៀនកម្ពុជាឯករាជ្យដែលជាអ្នករៀបចំការជួបជុំគ្រូបង្រៀននៅទីលានប្រជាធិបតេយ្យបានដាក់ចេញនូវការទាមទារជាច្រើនចំណុចទាក់ទងនឹងអត្ថប្រយោជន៍របស់គ្រូបង្រៀន។ ដូចរៀងរាល់ឆ្នាំដែរ ការទាមទារតម្លើងប្រាក់ខែគ្រូបង្រៀនគឺជាប្រធានបទសំខាន់មួយក្នុងចំណោមប្រធានបទផ្សេងទៀតនៃការប្រារព្ធទិវាគ្រូបង្រៀននៅឆ្នាំនេះ។
ចុះផ្សាយនៅថ្ងៃ៖
ស្តាប់ - ០១:៥១
ការទាមទារតម្លើងប្រាក់ខែគ្រូបង្រៀនឲ្យបានយ៉ាងតិច១ភាគ៤នៃប្រាក់ខែតំណាងរាស្ត្រ ឬស្មើនឹងជាង៧០០ដុល្លារអាមេរិក គឺជាចំណុចទី១សំខាន់ជាងគេ ដែលត្រូវលើកឡើងនៅក្នុងវេទិកាសាធារណៈនៅទីលានប្រជាធិបតេយ្យនៅថ្ងៃទី៥តុលា។
លើសពីការទាមទារតម្លើងប្រាក់ខែគ្រូបង្រៀន សមាគមគ្រូបង្រៀនកម្ពុជាឯករាជ្យក៏ទាមទារផងដែរ ផ្តល់សិទ្ធិសេរីភាពជូនគ្រូបង្រៀន ឲ្យបានពេញលេញ និងបញ្ឈប់ការរើសអើងទៅលើគ្រូបង្រៀននៅកន្លែងការងារ។ ការទាមទារយ៉ាងដូច្នេះដោយសារតែគ្រូបង្រៀនមួយចំនួនដែលមាននិន្នាការគាំទ្រគណបក្សប្រឆាំងអះអាងថាពួកគេរងការរើសអើង ខណៈខ្លះទៀតត្រូវរងបណ្តឹង និងការចាប់ដាក់ពន្ធនាគារមកដល់សព្វថ្ងៃនេះ។ តួយ៉ាង លោក ពៀត ម៉ាប់ លោក ជុំ ចាន់ លោក កែវ ថៃ និងលោក ស៊ុន ធន់ ជាដើម។
ក្រៅពីនោះ សមាគមគ្រូបង្រៀនក៏ស្នើសុំបញ្ចុះប្រេងឥន្ធៈមកនៅត្រឹម៤០០០រៀលក្នុង១លីត្រ និងបញ្ចុះតម្លៃទំនិញលើទីផ្សារមកនៅតម្លៃសមរម្យផងដែរ។
ឆ្លើយតបនឹងការទាមទារនេះ ក្រសួងអប់រំបានគូសបញ្ជាក់ថា ក្រសួងបាននិងបន្តលើកកម្ពស់គុណភាព និងជីវភាពគ្រូបង្រៀនដោយបន្តដុះឡើងប្រាក់ខែជូនគ្រូបង្រៀនតាមលទ្ធភាពរបស់រាជរដ្ឋាភិបាល។
លទ្ធភាពរបស់រដ្ឋាភិបាល គឺចាប់ពីឆ្នាំ២០១៥មក ប្រាក់ខែគ្រូបង្រៀន មានចន្លោះជាង៥សែនរៀល ដល់១លាន២សែនរៀល ហើយបន្តឡើងដល់ចន្លោះ១លាន២សែនរៀល ដល់២លាន១សែនរៀល នៅឆ្នាំ២០២២នេះ។
បើតាមប្រមុខរដ្ឋាភិបាលកម្ពុជា លោក ហ៊ុន សែន បានគូសបញ្ជាក់ថា ចាប់ពីដើមឆ្នាំ២០២៣តទៅ ប្រាក់ខែគ្រូបង្រៀននឹងឡើងដល់១លាន៥សែនយ៉ាងតិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ