កម្ពុជាស្ដារប្រព័ន្ធស្បៀងដោយផ្ដោតលើអាទិភាព ៤ ក្រោយវិបត្តិកូវីដ និងវិបត្តិផ្សេងៗ
នៅក្នុងសន្និសីទអាស៊ីប៉ាស៊ីហ្វិកស្តីពីការផ្លាស់ប្តូរប្រព័ន្ធកសិកម្ម នៅថ្ងៃទី ៥ ខែតុលា ឆ្នាំ២០២២ នៅប្រទេសថៃ កម្ពុជាដាក់គោលដៅផ្លាស់ប្តូរប្រព័ន្ធស្បៀងដែលផ្តោតលើអាទិភាពចំនួនបួន ពាក់ព័ន្ធទៅនឹងការផ្លាស់ប្តូរប្រព័ន្ធអាហារនៅកម្ពុជា។ការដាក់គោលដៅផ្លាស់ប្តូរប្រព័ន្ធស្បៀងនេះ ធ្វើឡើងដើម្បីស្ដារប្រព័ន្ធកសិកម្ម និងស្បៀងឱ្យបានឆាប់រហ័ស បន្ទាប់ពី រងការខូចខាតដោយវិបត្តិកូវីដ១៩ ការប្រែប្រួលអាកាសធាតុ និងការឡើងថ្លៃ។
ចុះផ្សាយនៅថ្ងៃ៖
ស្តាប់ - ០២:១២
គោលដៅអាទិភាពទាំង ៤ ក្នុងការស្ដារប្រព័ន្ធកសិកម្ម និងស្បៀង ក្រោយវិបត្តិកូវីដ១៩ និងវិបត្តិ 5Fs រួមមាន ការលើកកម្ពស់របបអាហារដែលមានសុខភាពល្អសម្រាប់ទាំងអស់គ្នា ការផ្តល់សិទ្ធិអំណាចដល់យុវជន និងអ្នកដែលងាយរងគ្រោះបំផុតក្នុងការចូលរួមក្នុងការផ្លាស់ប្តូរប្រព័ន្ធអាហារ ការពង្រឹងភាពធន់របស់កសិករខ្នាតតូច និង ការពង្រឹងអភិបាលកិច្ចសម្រាប់ប្រព័ន្ធអាហារ។
តាមរយៈសេចក្ដីប្រកាសព័ត៌មានរបស់អង្គការស្បៀង និងកសិកម្មនៃសហប្រជាជាតិ (FAO) បន្ទាប់ពីសន្និសីទអាស៊ីប៉ាស៊ីហ្វិកស្តីពីការផ្លាស់ប្តូរប្រព័ន្ធកសិកម្ម លោក សុខ ស៊ីឡូ អគ្គលេខាធិការនៃក្រុមប្រឹក្សាស្ថារអភិវឌ្ឍន៍វិស័យកសិកម្ម និងជនបទ និងជាអ្នកកោះប្រជុំជាតិសម្រាប់កិច្ចប្រជុំកំពូលស្តីពីប្រព័ន្ធស្បៀងដែលរៀបចំឡើងដោយអង្គការសហប្រជាជាតិ (UNFSS) បានគូសបញ្ជាក់ថា កម្ពុជានឹងមិនខ្វះខាតស្បៀងអាហារធ្ងន់ធ្ងរនោះទេ ដោយសារជាប្រទេសនាំចេញអាហារសុទ្ធ ក៏ប៉ុន្តែការលេចឡើងនូវជំងឺកូវីដ-១៩ និងវិបត្តិ 5Fs ដែលរួមមាន កង្វះអាហារ ចំណី ប្រេងឥន្ធនៈ ជី និងហិរញ្ញវត្ថុ បានបង្កការគំរាមកំហែងថ្មីដល់ប្រព័ន្ធអាហារកម្ពុជា។
លោកអគ្គលេខាធិការនៃក្រុមប្រឹក្សាស្ថារអភិវឌ្ឍន៍វិស័យកសិកម្មរូបនេះបន្តថា កង្វះថវិកា និងសមត្ថភាព តម្រូវការក្នុងការរួមបញ្ចូលគ្នា រួមទាំងអ្នកប្រើប្រាស់ យុវជន ស្ត្រី និងអ្នកងាយរងគ្រោះ ការវិនិយោគកាន់តែច្រើនក្នុងសកម្មភាពអាកាសធាតុ ការកាត់បន្ថយការបាត់បង់ចំណីអាហារ និងកាកសំណល់ ការកែលម្អសុវត្ថិភាពចំណីអាហារ ភាពសម្បូរបែប និងគុណភាពគឺជាផ្នែកមួយចំនួននៃ បញ្ហាប្រឈមនានាដែលត្រូវដោះស្រាយរួមគ្នាដោយប្រទេសកម្ពុជា ដើម្បីសម្រេចបាននូវប្រព័ន្ធស្បៀងអាហារប្រកបដោយនិរន្តរភាព និងធន់។
ជាមួយគ្នានេះ លោក Qu Dongyu អគ្គនាយក FAO បានឱ្យដឹងថា ការផ្លាស់ប្តូរក្នុងតំបន់ត្រូវការផ្តោតលើលទ្ធផលដែលនាំឱ្យផលិតកម្មកសិកម្មកាន់តែប្រសើរ អាហារូបត្ថម្ភកាន់តែប្រសើរ បរិស្ថានកាន់តែប្រសើរ និងជីវិតកាន់តែប្រសើរឡើងសម្រាប់ទាំងអស់គ្នា ដើម្បីធានាថាគ្មាននរណាម្នាក់ត្រូវបានទុកចោលឡើយ។
គួរជម្រាបជូនថា បើយោងតាមរបាយការណ៍របស់អង្គការសហប្រជាជាតិនាពេលថ្មីៗនេះ កម្ពុជាមានប្រជាជនប្រហែល 2.5 លាននាក់មានបញ្ហាអសន្តិសុខស្បៀងយ៉ាងធ្ងន់ធ្ងរ ដែលស្មើនឹងប្រមាណ 15% នៃចំនួនប្រជាជនសរុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ