លោក ហ៊ុន សែន ចំអកឲ្យអ្នករិះគន់រឿងដក លោក វេង សាខុន ថាមិនចេះច្បាប់
ប្រមុខរដ្ឋាភិបាលកម្ពុជាបានពន្យល់ពីទិដ្ឋច្បាប់ទាក់ទងនឹងការដកតំណែង លោក វេង សាខុន ចេញពីរដ្ឋកសិកម្មយ៉ាងតក់ក្រហល់ថា ធ្វើឡើងផ្អែកទៅលើរដ្ឋធម្មនុញ្ញ និងច្បាប់ស្តីពីការរៀបចំ និងការប្រព្រឹត្តទៅនៃគណៈរដ្ឋមន្ត្រី។ ការពន្យល់ហេតុផលបែបនេះរបស់លោក ហ៊ុន សែន គឺបន្ទាប់ពីមានមតិខ្លះសំដែងការងឿងឆ្ងល់ថា នៅពេលឡើងកាន់តំណែងជារដ្ឋមន្ត្រីណាមួយគឺមានការបោះឆ្នោតផ្តល់សេចក្តីទុកចិត្តពីរដ្ឋសភា ប៉ុន្តែនៅពេលដកចេញពីតំណែងហេតុអ្វី ធ្វើទៅតាមឆន្ទានុសិទ្ធិរបស់នាយករដ្ឋមន្ត្រី។
ចុះផ្សាយនៅថ្ងៃ៖
ស្តាប់ - ០២:៣៥
«ដើម្បីចូលរួមចំណែកជួយក្រុមប្រឆាំងផ្កាប់មុខឲ្យមានចំណេះដឹងដែលអាចឈានទៅកាន់អំណាចនៅជាតិក្រោយ សូមអស់លោកបើកមើលមាត្រា២១ ជំពូក២នៃរដ្ឋធម្មនុញ្ញដែលចែងអំពីព្រះមហាក្សត្រ។
បន្ទាប់ទៅសូមអានមាត្រា២០ជំពូកទី៣នៃច្បាប់ស្តីពីការរៀបចំនិងការប្រព្រឹត្តទៅនៃគណៈរដ្ឋមន្ត្រី»។ នេះគឺជាឆ្លើយតបរបស់លោកនាយករដ្ឋមន្ត្រី ហ៊ុន សែន នៅលើទំព័រហ្វេសប៊ុករបស់លោកនៅថ្ងៃទី៩តុលា ដែលសំដៅដល់ការដកតំណែងរដ្ឋមន្ត្រីក្រសួងកសិកម្ម ខណៈលោក វេង សាខុន នៅក្រៅប្រទេសនៅឡើយ។
លោក ហ៊ុន សែន ថែមទាំងចំអកទៅកាន់អ្នករិះគន់ថា ដោយសារតែខ្វះការចេះដឹងទើបបានតែចេះតែជាប់គុកនិងរត់ចោលស្រុកហើយមកចោទគេថាផ្តាច់ការ។ លោកថា គប្បីប្រឹងរៀនសូត្របន្ថែមដើម្បីឈានទៅកាន់អំណាចនៅជាតិក្រោយនិងសូមកុំវក់ជាមួយល្បែងច្រើនពេក។ នេះជាបំណងល្អរបស់លោកសម្រាប់ក្រុមល្ងង់។
ជាការកត់សំគាល់ការដកតំណែងរដ្ឋមន្ត្រីកសិកម្មនៅពេលនេះបានធ្វើឲ្យមានមតិយល់ឃើញខុសគ្នាៗ។ អ្នកខ្លះសំដែងការសារទ ខណៈអ្នកខ្លះសំដែងការខកចិត្ត។ ខកចិត្តដោយពួកគេយល់ថា លោក វេង សាខុន ជារដ្ឋមន្ត្រីដែលមានបច្ចេកទេសច្បាស់លាស់មិនចេះរណែបរណប។ ប៉ុន្តែអ្នកខ្លះយល់ថា រដ្ឋមន្ត្រីរូបនេះ អសកម្ម មិនអាចធ្វើឲ្យផលិតផលកសិកម្មមានទីផ្សារ។
ទោះជាមិនទាន់មានការបញ្ជាក់ចំៗពីមូលហេតុនៃការដកតំណែងរដ្ឋមន្ត្រីក្រសួងកសិកម្មក៏ដោយ តែការដែលលោក វេង សាខុន មិនមានវត្តមាននៅកន្លែងទឹកជំនន់ ខណៈដែលលោកនៅក្រៅប្រទេស គឺជាហេតុផលមួយដែលត្រូវបានលើកឡើង ដោយ លោក សុខ ឥសាន អ្នកនាំពាក្យគណបក្សប្រជាជនកម្ពុជា។ ការយល់ឃើញ របស់លោក សុខ ឥសាន ក៏ផ្អែកលើសារជាសំឡេងរបស់ប្រមុខរដ្ឋាភិបាលដែលបញ្ជាឲ្យលោក អូន ព័ន្ធមុនីរ័ត្ន ជារដ្ឋមន្ត្រីស្តីទី ក្រសួងកសិកម្ម ដោះស្រាយជាបន្ទាន់ករណីទឹកជំនន់ក្នុងខេត្តមួយចំនួន ក្រោយពីដកតំណែង លោក វេង សាខុន ភ្លាមៗ កាលពីថ្ងៃទី៨តុលា។
ប៉ុន្តែមតិខ្លះទៀតយល់ថា លោក វេង សាខុន មានគុណសម្បត្តិច្រើនតាំងពីលោកកាន់តំណែងមក គឺធ្វើឲ្យផលិតផលកសិកម្មកើនឡើងទាំងដំណាំដាំដុះ ស្រូវ និងការចិញ្ចឹមសត្វជាដើម។ ក្រុមអ្នករិះគន់នឹងការដកតំណែងរដ្ឋមន្ត្រីកសិកម្ម យល់ថា មកពីលោក វេង សាខុន ជារដ្ឋមន្ត្រីម្នាក់ដែលហ៊ានចេញមុខប្រឆាំងនឹងការនាំជ្រូកចូលពីប្រទេសជិតខាង ដើម្បីការពារកសិករខ្មែរដែលចិញ្ចឹមសត្វក្នុងស្រុកឲ្យមានទីផ្សារ។
ទោះជាយ៉ាងណា សម្រាប់ លោក សុខ ឥសាន បញ្ហានេះជារឿងចាស់ទេ ចំណែករឿងថ្មីដែលឈានដល់ការសម្រេចដកតំណែងដោយឆន្ទានុសិទ្ធិរបស់ប្រមុខបក្សកាន់អំណាចនៅពេលនេះ គឺ ដោយសារ លោក វេង សាខុន អសកម្មក្នុងពេលដែលប្រជាជនកំពុងរងគ្រោះទឹកជំនន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ