អ្នកធ្វើកិច្ចការងារបរិស្ថានសាទរ ខណៈការដាំកូនឈើនៅតំបន់ភ្នំតាម៉ៅរួចរាល់លើដីជាង៥០០ហិកតា
លោកកើត សារ៉ាយ ប្រធានសមាគមនិស្សិតបញ្ញវន្តខ្មែរ ដែលធ្វើកិច្ចការងារសង្គម និងបរិស្ថាន បានសាទរនៅពេលដីតំបន់ភ្នំតាម៉ៅ ត្រូវបានដាំដុះរួចរាល់ដោយបញ្ជាការដ្ឋានអង្គរក្សលោកនាយករដ្ឋមន្ត្រី ហ៊ុន សែន។ ជាមួយគ្នានេះ លោក កើត សារ៉ាយ ស្នើដល់រដ្ឋាភិបាលពិចារណាឲ្យបានច្បាស់លាស់មុននឹងធ្វើការសម្រេចឲ្យមានការអភិវឌ្ឍនៅកន្លែងណាមួយ។
ចុះផ្សាយនៅថ្ងៃ៖
ស្តាប់ - ០២:១០
កម្លាំងបញ្ជាការដ្ឋានអង្គរក្សលោកនាយករដ្ឋមន្ត្រី ហ៊ុន សែន បានប្រកាសពីភាពជោគជ័យរបស់ខ្លួនក្នុងការដាំដុះកូនឈើឡើងវិញ នៅតំបន់ភ្នំតាម៉ៅ សរុបជាង ១៥ ម៉ឺនដើម ជីកស្រះចំនួន០២ និងធ្វើរបងក្នុងទំហំដីប្រមាណជាង ៥០០ហិកតា ហើយបានធ្វើលិខិតប្រគល់-ទទួលការគ្រប់គ្រងបន្តដីនៅតំបន់ភ្នំតាម៉ៅនេះ ទៅរដ្ឋបាលខេត្តតាកែវ រដ្ឋបាលព្រៃឈើ និងអាជ្ញាធរមូលដ្ឋានមូលដ្ឋានខេត្តតាកែវ ជាអ្នកគ្រប់គ្រងបន្ដ នៅថ្ងៃទី០៧ ខែតុលា ឆ្នាំ២០២២កន្លងទៅនេះ។
លោក កើត សារ៉ាយ ប្រធានសមាគមនិស្សិតបញ្ញវន្តខ្មែរ ដែលធ្វើកិច្ចការងារសង្គមនិងបរិស្ថាន បានសាទរ និងលើកទឹកចិត្តនៅពេលលឺថា បញ្ជាការដ្ឋានអង្គរក្សលោកនាយករដ្ឋមន្ត្រី ហ៊ុន សែន បានប្រកាសដាំដុះកូនឈើរួចរាល់នៅតំបន់ភ្នំតាម៉ៅ។ ទន្ទឹមនឹងការសាទរ លោក កើត សារ៉ាយ ក៏ស្នើដល់រដ្ឋាភិបាលមុនសម្រេចឲ្យធ្វើការអភិវឌ្ឍកន្លែងណាមួយ ត្រូវពិចារណាឲ្យបានច្បាស់លាស់ ចៀសវាងមានបញ្ហាកើតឡើងដូចនៅតំបន់ភ្នំតាម៉ៅតទៅទៀត ពីព្រោះការដាំដុះកូនឈើឡើងវិញមិនមែន១ឆ្នាំឬ២ឆ្នាំ កូនឈើអាចធំលឿននោះទេ។
គួររំលឹកថា កន្លងមករដ្ឋាភិបាលបានសម្រេចឲ្យក្រុមហ៊ុនមួយចំនួន ធ្វើការអភិវឌ្ឍនៅតំបន់ភ្នំតាម៉ៅ ក្នុងនោះក្រុមហ៊ុន «ឡេង ណាវ៉ាត្រាគ្រុប» និងក្រុមហ៊ុន «TP Moral Group» របស់ឧកញ៉ា ឃុន សៀជាដើម។ ក្រោយពីទទួលបានសិទ្ធិអភិវឌ្ឍ ក្រុមហ៊ុនទាំងនេះបានដាក់គ្រឿងចក្រចុះទៅឈូសឆាយដីព្រៃនៅតំបន់ភ្នំតាម៉ៅ ធ្វើឲ្យសាធារណជននិងក្រុមយុវជនដែលស្រលាញ់បរិស្ថានមិនសប្បាយចិត្តឡើយ ហើយបានធ្វើយុទ្ធនាការទាមឲ្យមានការបញ្ឈប់ការឈូសឆាយផងដែរ ដោយសារតំបន់ភ្នំតាម៉ៅជាតំបន់ទេចរណ៍ធម្មជាតិ និងជាជម្រកសត្វព្រៃ។
ក្រោយពីមានប្រតិកម្មពីសាធារណជន និងមានការសំណូមពរពីប្រជាពលរដ្ឋ លោកនាយករដ្ឋមន្រ្តីហ៊ុន សែន បានសម្រេចឲ្យបញ្ឈប់ការឈូសឆាយ លែងឲ្យមានការភិវឌ្ឍនៅតំបន់ភ្នំតាម៉ៅតទៅទៀត ហើយតម្រូវឲ្យមានការដាំកូនឈើឡើងវិញនៅតំបន់ភ្នំតាម៉ៅដែលក្រុមហ៊ុនបានឈូសឆាយ ដោយប្រគល់ភារកិច្ចទៅបញ្ជាការដ្ឋានអង្គរក្ស ជាអ្នកត្រួតពិនិត្យនិងធ្វើការដាំដុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ