ស្ថានទូត និងវិទ្យាស្ថានបារាំងតាំងពិព័រណ៌ព្រះឆាយាលក្ខណ៍សម្តេចនរោត្តម សីហនុ ដើម្បីរំលឹកខួប១០០ឆ្នាំនៃការប្រសូត
ស្ថានទូតបារាំង និងវិទ្យាស្ថានបារាំងនៅកម្ពុជានៅឆ្នាំ២០២២នេះ បានរៀបចំពិព័រណ៌ព្រះឆាយាលក្ខណ៍ សម្តេចព្រះនរោត្តម សីហនុ ដោយមានការតាំងបង្ហាញរូបឆាយាលក្ខណ៍ធំៗនៅរបងស្ថានទូតបារាំង។ ការរៀបចំរបស់ស្ថានទូតបារាំងដូច្នេះ ធ្វើឡើងដើម្បីឧទ្ធិសដល់ព្រះវិញ្ញាណក្ខន្ធព្រះករុណា ព្រះបាទសម្តេចព្រះនរោត្តម សីហនុ ក្នុងឱកាសខួប១០០ឆ្នាំ នៃការប្រសូតររបស់ព្រះអង្គ និងស្របពេលដែលប្រទេសកម្ពុជាត្រូវគោរពព្រះវិញ្ញាណក្ខន្ធខួប១០ឆ្នាំនៃការសោយទិវង្គតរបស់សម្តេចព្រះមហាវីរក្សត្រនៅថ្ងៃទី១៥តុលាខាងមុខនេះផងដែរ។
ចុះផ្សាយនៅថ្ងៃ៖
ស្តាប់ - ០២:៥៦
ផ្ទាំងរូបថតព្រះឆាយាលក្ខណ៍ ស-ខ្មៅ និងធម្មជាតិធំៗជាច្រើនផ្ទាំងត្រូវបានដាក់តាំងនៅរបងស្ថានទូតបារាំង ដោយផ្ទាំងរូបថតទាំងនេះបង្ហាញពីព្រះរាជសកម្មភាពរបស់ព្រះករុណា ព្រះបាទសម្តេចព្រះនរោត្តម សីហនុ ដែលមានទំនាក់ទំនងយ៉ាងជិតស្និទ្ធជាមួយនឹងមេដឹកនាំបារាំងជាច្រើន។
ផ្ទាំងរូបភាពព្រះឆាយាលក្ខណ៍របស់ព្រះករុណាសម្តេចឪ នៅក្នុងដំណើរការស្វែងរកសន្តិភាពទីក្រុងប៉ារីស សម្រាប់កម្ពុជាថ្ងៃ២៣ តុលា ក៏ត្រូវបានបង្ហាញផងដែរ ក្រោមកិច្ចជ្រោមជ្រែងពីប្រទេសបារាំង។ តាមស្ថានទូតបារាំងប្រចាំនៅកម្ពុជា ព្រះឆាយលក្ខណ៍ទាំងនេះបង្ហាញនូវព្រឹត្តិការណ៍ និងជំនួបនានា ដែលបានដិតជាប់ក្នុងឆាកជីវិតដ៏អស្ចារ្យរបស់ទ្រង់ក្នុងពេលព្រះអង្គបំពេញព្រះរាជកិច្ច ដើម្បីបម្រើប្រជាពលរដ្ឋកម្ពុជា ក្នុងមិត្តភាពជាមួយប្រទេសបារាំង។
ដោយបានលើកយកព្រះបន្ទូលព្រះអង្គដែលថា“ខ្ញុំ សីហនុ តែងផ្តល់សារសំខាន់ទីមួយនៅកម្ពុជាមិនមែនតែដល់ហ្រ្វង់កូហ្វូនីទេ គឺដល់ប្រទេសបារាំង។” ពិព័រណ៌នេះ ក៏ដើម្បីរម្លឹកដល់ខ្សែជីវិត និងស្នាព្រះហស្ថរបស់ករុណាព្រះបាទសម្តេចព្រះ នរោត្តម សីហនុ ក្នុងព្រះនាមជាអ្នកនិពន្ធ ផលិតករភាពយន្ត តន្រ្តីករ និងអ្នកចម្រៀង ដោយព្រះករុណាគឺជាអ្នកលើកស្ទួយវប្បធម៌ខ្មែដ៏ពិតប្រាដកមួយអង្គ។
ក្រៅពីនេះ ស្ថានទូតបារាំង និងវិទ្យាស្ថានបារាំងក៏បានលើកឡើងដែរថា ព្រះករុណាព្រះបាទសម្តេចព្រះ នរោត្តម សីហនុ បានតំណាងឱ្យនិរន្តរភាព និងឯកភាពជាតិកម្ពុជាអស់រយៈពេលជាង៧០ឆ្នាំ។ ព្រះអង្គបានឡើងគ្រងរាជ្យជាព្រះមហាក្សត្រនៃព្រះរាជាណាចក្រកម្ពុជានៅពេលដែលព្រះអង្គមានព្រះជន្ម១៩ព្រះវស្សា។ ព្រះអង្គបានបូជាព្រះកាយពលពេញមួយព្រះជន្ម ដើម្បីបុព្វហេតុសន្តិភាព វិបុលភាព និងឯករាជ្យភាពនៃប្រទេសរបស់ទ្រង់។ ពិព័រណ៍រូបថតឯសារទាំងនេះបង្ហាញពីព្រឹត្តឹការណ៍ និងជំនួបនានា ដែលបានដិតជាប់នៅក្នុងឆាកជីវិតដ៏អស្ចារ្យរបស់ទ្រង់នៅក្នុងការបម្រើឧត្តមប្រយោជន៍នៃប្រជាជនកម្ពុជា ដោយមានប្រទេសបារាំងជាមិត្ត។
ជាមួយគ្នានេះ វិទ្យាស្ថានបារាំង ក៏បានបង្ហាញនូវកាលវិភាគចាក់បញ្ចាំងភាពយន្តដែលទាក់ទងទៅនឹងព្រះរាជសកម្មភាពរបស់ព្រះករុណា ព្រះបាទសម្តេចព្រះនរោត្តម សីហុន ផងដែរ នៅវិទ្យាស្ថានបារាំង និងនៅមជ្ឈមណ្ឌលបុប្ផាណា ដូចជារឿងកុលាបនៃភ្នំបូកគោ បក្សីឋានសួគ៌ និងព្រៃប្រសិទ្ធិ៍ជាដើម។
បន្ថែមពីពិធីរំលឹកព្រះវិញ្ញាណក្ខន្ធថ្នាក់ជាតិ សហភាពសហព័ន្ធយុវជនកម្ពុជា(ស.ស.យ.ក) ក៏បានរៀបចំផងដែរកម្មវិធី «សមាធិរលឹកដួងព្រះវិញ្ញាណក្ខន្ធ» នៅថ្ងៃទី១៥ ខែតុលា ឆ្នាំ២០២២ នៅសួនច្បារខាងមុខព្រះបរមរាជវាំង តែក្រោយមកត្រូវដូរទៅសាលាធម្មសភាមុខវត្តបុទុមវិញដោយសារបញ្ហាអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ