ធនាគារ និងមីក្រូហិរញ្ញវត្ថុ ប្រកាសអនុគ្រោះដល់អ្នកខ្ចីប្រាក់ដែលប៉ះពាល់ដោយសារទឹកជំនន់
សមាគមនធនាគារ និងមីក្រូហិរញ្ញវត្ថុកម្ពុជា នៅថ្ងៃទី១៩ ខែតុលា ឆ្នាំ២០២២ យោគយល់ និងអនុគ្រោះ ដល់អតិថិជនដែលរងគ្រោះដោយសារទឹកជំនន់ធ្ងន់ធ្ងរ ដោយអនុវត្តតាមលក្ខខណ្ឌមួយចំនួនដែលបានបានកំណត់ដោយធនាគារជាតិនៃកម្ពុជា។ ការអនុគ្រោះនេះ ធ្វើឡើងតាមការអំពាវនាវរបស់រដ្ឋាភិបាលកម្ពុជានាពេលថ្មីៗនេះ។
ចុះផ្សាយនៅថ្ងៃ៖
ស្តាប់ - ០១:៤៣
សេចក្ដីថ្លែងការណ៍រួមរបស់សមាគមនធនាគារ និងសមាគមមីក្រូហិរញ្ញវត្ថុកម្ពុជា បានឱ្យដឹងថា សមាគមន៍ទាំងពីរសម្រេចយល់ព្រមយោគយល់ និងអនុគ្រោះដល់អ្នកខ្ចីប្រាក់ដែលរងផលប៉ះពាល់ពីទឹកជំនន់ តាមរយៈការរៀបចំឥណទានឡើងវិញ តបតាមការអំពាវនាវរបស់រដ្ឋាភិបាល និងតាមលក្ខខណ្ឌដែលបានកំណត់ដោយធនាគារជាតិនៃកម្ពុជា កាលពីថ្ងៃទី១៨ ខែតុលា ឆ្នាំ២០២២។
ធនាគារជាតិនៃកម្ពុជា បានស្នើឱ្យគ្រឹះស្ថានធនាគារនិងហិរញ្ញវត្ថុ សហការក្នុងក្របខណ្ឌកិច្ចការពារអតិថិជន និងបន្តការអនុគ្រោះតាមរយៈការរៀបចំឥណទានឡើងវិញតាមលក្ខខណ្ឌចំនួន ៩ចំណុច ដែលលក្នុងនោះរួមមាន ការកាត់បន្ថយចំនួនប្រាក់ដើមឥណទាន ឬចំនួនដែលត្រូវសងនៅឥណប្រតិទាន ការបន្ថយអត្រាការប្រាក់ទាបជាងលក្ខខណ្ឌនៃកិច្ចសន្យាដើម ការពន្យារពេលទូទាត់សងប្រាក់ដើម ឬការប្រាក់ ឬការធ្វើមូលធនកម្មការប្រាក់ និងការពន្យារឥណប្រតិទានជាដើម។ នេះបើតាមសេចក្ដីជូនដំណឹងរបស់ធនាគារជាតិ។
បើតាមសេចក្ដីថ្លែងការណ៍រួមរបស់សមាគមនធនាគារ និងសមាគមមីក្រូហិរញ្ញវត្ថុ សមាជិកសមាគមទាំងពីរនឹងពិចារណាទៅលើការបន្ធូរបន្ថយអត្រាការប្រាក់ និងកម្រៃផ្សេងៗ ពាក់ព័ន្ធនឹងឥណទាន ឬលើកលែងការផាកពិន័យ និងចៀសវាងការរឹបអូសទ្រព្យធានា របស់អតិថិជនស្របតាមស្ថានភាពជាក់ស្តែងរបស់អតិថិជន។
គួរជម្រាបជូនថា លោកនាយករដ្ឋមន្ត្រី ហ៊ុន សែន កាលពីថ្ងៃទី១៧ ខែតុលា ឆ្នាំ២០២២ កន្លងទៅនេះ បានអំពាវនាវចំពោះមីក្រូហិរញ្ញវត្ថុ ផ្នែកធនាគារ និងហិរញ្ញវត្ថុ ផ្ដល់នូវការអនុគ្រោះ សម្រាប់អ្នកដែលទទួលផលប៉ះពាល់ ពីគ្រោះទឹកជំនន់ តាមរយៈនៃការពន្យារពេលសម្រាប់ការសង, បន្ធូរបន្ថយការប្រាក់ ឬតាមរយៈការរៀបចំឥណទានឡើងវិញ។ បើតាមលោកនាយករដ្ឋមន្ដ្រី ក្នុងចំណោមប្រជាពលរដ្ឋប្រមាណ១០ម៉ឺនគ្រួសារ មានអ្នកដែលទទួលផលប៉ះពាល់ពីគ្រោះទឹកជំនន់ ប្រមាណ១៨% ឬស្មើនឹងប្រមាណជិត២ម៉ឺនគ្រួសារ ដែលនឹងត្រូវទទួលបានការអន្ដរាគមន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ