ADB ផ្តល់កម្ចីសម្បទាននិងជំនួយ ៣២,៥លានដុល្លារ ជំរុញសេវាសុខាភិបាលតាមព្រំដែន
ធនាគារអភិវឌ្ឍន៍អាស៊ី(ADB) បានអនុម័តហិរញ្ញប្បទានចំនួន ៣២,៥លានដុល្លារ បង្កើនលទ្ធភាពទទួលបានសេវាសុខាភិបាលក្នុងខេត្តជាប់ព្រំដែន។ ជាសេវាសុខាភិបាលផ្តោតជាពិសេសលើពលរដ្ឋចំណាកស្រុកចាកចេញ និងត្រឡប់មកវិញ រួមទាំងអ្នក ដែលស្វែងរកការងារធ្វើនៅតំបន់សេដ្ឋកិច្ចពិសេស។ នេះបើតាមសេចក្តីប្រកាសព័ត៌មាន នៅថ្ងៃទី១៩ ខែតុលា។ មន្ត្រីឃ្លាំមើលស្ថានភាពពលករ បានស្វាគមន៍ចំពោះការផ្តល់ជំនួយនេះ។
ចុះផ្សាយនៅថ្ងៃ៖
ស្តាប់ - ០២:២៨
ហិរញ្ញប្បទានចំនួន ៣២,៥លានដុល្លារ មានគោលដៅបង្កើនលទ្ធភាពទទួលបានសេវាសុខាភិបាលប្រកប ដោយគុណភាពនៅក្នុងខេត្តបន្ទាយមានជ័យ ដែលជាខេត្តជាប់ព្រំដែននៅភាគពាយព្យរបស់កម្ពុជា និងជាតំបន់ដែលពលរដ្ឋចំណាកស្រុកចាកចេញ និងត្រឡប់មកវិញ ព្រមទាំងជាទីតាំងសម្រាប់អ្នកដែល ស្វែងរកការងារធ្វើនៅតំបន់សេដ្ឋកិច្ចពិសេសរបស់ខេត្ត។ នេះបើតាមសេចក្តីប្រកាសព័ត៌មានរបស់ ADB នៅថ្ងៃទី១៩ ខែតុលា។
បើតាម ADB គម្រោងនេះនឹងបង្កើនកម្ចីសម្បទានចំនួន ២៧លានដុល្លារ និងជំនួយរហូតដល់ ៥,៥ លាន ដុល្លារដល់រាជរដ្ឋាភិបាលកម្ពុជា ដើម្បីសាងសង់ និងបំពាក់បរិក្ខារសុខាភិបាលនៅតាមតំបន់ព្រំដែន ពង្រីក កិច្ចគាំពារហិរញ្ញវត្ថុទាក់ទងនឹងការថែទាំសុខភាពដល់ជនចំណាកស្រុក។ ក្រៅពីនេះក៏មានការពង្រឹងប្រព័ន្ធសម្រាប់សមាហរណកម្មនៃការផ្តល់សេវាសុខាភិបាលឆ្លងកាត់ព្រំដែន រួមទាំងការបង្កើតឱ្យមានកំណត់ត្រាសុខភាពអេឡិចត្រូនិចចល័តសម្រាប់ជនចំណាកស្រុកផងដែរ។
ប្រព័ន្ធសុខាភិបាលនៅតាមតំបន់ព្រំដែនជារឿយៗ មិនទាន់មានលក្ខណៈគ្រប់គ្រាន់ ដើម្បីឆ្លើយតបទៅនឹងបញ្ហាប្រឈមផ្នែកសុខភាព។ ADBបានរកឃើញថាក្នុងអំឡុង ការរីករាលដាលនៃជំងឺកូវីដ១៩ ពលករចំណាកស្រុកកម្ពុជាជាង ២៦ម៉ឺននាក់បាន ត្រឡប់មកផ្ទះវិញតាមព្រំដែនគោល ដែលបានធ្វើឱ្យហួសសមត្ថភាពនៃប្រព័ន្ធសុខាភិបាល នៅតាមព្រំដែនក្នុងការកំណត់ ធ្វើចត្តាឡីស័ក និងព្យាបាល ករណីកូវីដ១៩។
លោក លឹង សុផុន ជាមន្ត្រីគម្រោងនៃមជ្ឈមណ្ឌលសម្ពន្ធភាពការងារ និងសិទ្ធិមនុស្ស អង្គការសង់ត្រាល់ បានថ្លែងប្រាប់វិទ្យុបារាំងអន្តរជាតិ នៅថ្ងៃទី២០ ខែតុលាថា ពលករចំណាកស្រុក ឬអ្នកធ្វើការនៅតាមព្រំដែនប្រឈមនឹងបញ្ហាច្រើន ទាំងបញ្ហាឯកសារផ្លូវច្បាប់ និងផ្នែកសុខភាព។ លោកបន្តថា ការគិតដល់បញ្ហាសុខភាពរបស់ពលករគឺជារឿងសំខាន់ ដោយសារតែពួកគាត់ខ្លះ មិនមានថវិកាសម្រាប់ប្រើប្រាស់សេវាសុខាភិបាល។
លោក លឹង សុផុន បន្តថាប្រសិនបើរដ្ឋាភិបាលមានគម្រោងផ្តល់សេវាសុខាភិបាល និងលើកកម្ពស់សេវាសុខាភិបាលនៅតាមខេត្តជាប់ព្រំដែន ជាពិសេសសម្រាប់ពលករចំណាកស្រុក គឺជាមធ្យោបាយដ៏ល្អ។ កន្លងមកលោកសង្កេតឃើញថាមានការផ្តល់សេវាសុខាភិបាលនៅតាមព្រំដែន និងតំបន់ផ្សេងៗដែរ ប៉ុន្តែពលករមិនមានថិវកាគ្រប់គ្រាន់សំរាប់ចំណាយលើសេវាទាំងនោះទេ ហើយប្រសិនបើមានការផ្តល់ជូនសេវាដោយឥតគិតថ្លៃគឺកាន់តែល្អ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ