១០ខែ៖ កម្ពុជារកឃើញជនអន្តោប្រវេសន៍ធ្វើការខុសច្បាប់ជាង ២ពាន់នាក់
អគ្គនាយកដ្ឋានអន្តោប្រវេសន៍នៃក្រសួងមហាផ្ទៃនៅថ្ងៃសៅរ៍ម្សិលមិញនេះ បានបង្ហាញតួលេខចុះត្រួតពិនិត្យជនបរទេសខុសច្បាប់នៅកម្ពុជា ក្នុងរយៈពេល១០ខែ ឆ្នាំ២០២២ នៅតាមទីតាំងចំនួនជាង ៣០០០ពាន់ទីតាំងនៅទូទាំងប្រទេស។ តាមរបាយការណ៍ អគ្គនាយកដ្ឋានអន្តោប្រវេសន៍ បានរកឃើញមជនអន្តោប្រវេសន៍ធ្វើការខុសច្បាប់ជាង ២ពាន់នាក់។
ចុះផ្សាយនៅថ្ងៃ៖
ស្តាប់ - ០២:៣០
ចាប់តាំងពីខែមករាដល់ខែតុលា ឆ្នាំ២០២២នេះ ប្រតិបត្តិការចុះត្រួតពិនិត្យជនបរទេសរបស់សមត្ថកិច្ចកម្ពុជានៅទូទាំងប្រទេស ទៅលើជនបរទេសចំនួនជាង ៣ម៉ឺន៨ពាន់នាក់ (៣០.៨៣៤នាក់) បានរកឃើញជនបរទេសចំនួន ២.៤១៦នាក់ ដែលមកធ្វើការងារខុសច្បាប់ គ្មានបណ្ណការងារនៅក្នុងប្រទេសកម្ពុជា។ នេះបើតាមរបាយការណ៍របស់អគ្គនាយកដ្ឋានអន្តោប្រវេសន៍ចេញផ្សាយនៅថ្ងៃទី២២តុលា។ ជនបរទេសទាំងជាង ២០០០នាក់នោះ បានទទួលការផាកពិន័យជាទឹកប្រាក់សរុបចំនួនជាង ២ពាន់លានរៀល (១.២០៨លានរៀល)។ ប្រតិបត្តិការខាងលើនេះធ្វើឡើង ដោយមានកិច្ចសហការជាមួយក្រសួងការងារ។
តែយ៉ាងណាមិញ ផ្អែកតាមស្ថានភាពជាក់ស្តែង ក្រសួងមហាផ្ទៃនិងក្រសួងការងារ នៅថ្ងៃទី២២តុលា បានចេញសេចក្តីប្រកាសព័ត៌មានរួម អំពាវនាវដល់ក្រសួង-ស្ថាប័នពាក់ព័ន្ធទាំងអស់ ឱ្យចូលរួមគាំទ្រក្រុមការងារអន្តរក្រសួង ក្នុងការប្រយុទ្ធប្រឆាំងអំពើជួញដូរមនុស្សនៅកម្ពុជា តាមរយៈប្រតិបត្តិការបង្ក្រាបល្បែងស៊ីសងខុសច្បាប់ ប្រតិបត្តិការចុះត្រួតពិនិត្យបណ្ណការងារខុសច្បាប់ និងប្រតិបត្តិការបង្ក្រាបការជួញដូរមនុស្សគ្រប់ទម្រង់នានា។
ក្នុងយុទ្ធនាការប្រយុទ្ធប្រឆាំងអំពើជួញដូរមនុស្ស ជារឿយៗ កម្ពុជាតែងប្រកាសបណ្តេញជនបរទេសធ្វើការនិងរស់នៅខុសច្បាប់ក្នុងប្រទេសម្តងៗរាប់រយនាក់ និងដោយត្រូវហាមឃាត់ចូលប្រទេសកម្ពុជារយៈពេល៣ឆ្នាំផង។ ជាក់ស្តែង ដោយគ្រាន់ប្រតិបត្តិការតែរយៈពេលថ្ងៃ ចាប់ពីថ្ងៃទី២១-២២ ខែតុលាកន្លងទៅនេះ អគ្គនាយកដ្ឋានអន្តោប្រវេសន៍ បានប្រកាសពីការបណ្តេញចេញជនអន្តោប្រវេសន៍ខុសច្បាប់ចំនួន ២៦៣នាក់ ដែលក្នុងនោះ ភាគច្រើនជាជនជាតិវៀតណាម និងជនជាតិចិន។
ជាការកត់សម្គាល់ ការបណ្តេញជនបរទេសចេញខុសច្បាប់ពីកម្ពុជាពេលនេះ កើតឡើងចំពេលដែលអាជ្ញាធរកំពុងសម្រួលផ្តល់បណ្ណស្នាក់នៅអចិន្ត្រៃយ៍ឱ្យជនបរទេសនៅកម្ពុជា។ ក៏ប៉ុន្តែការផ្តល់បណ្ណស្នាក់នៅអចិន្ត្រៃយ៍ដល់ជនបរទេសនេះ ត្រូវបានតំណាងប្រជាពលរដ្ឋមួយចំនួន ដាក់លិខិតជំទាស់ទៅក្រសួងមហាផ្ទៃកាលពីខែកញ្ញា។
គួរបញ្ជាក់ថា គិតត្រឹមអំឡុងខែកញ្ញា អាជ្ញាធរកម្ពុជាបានសម្រួលផ្តល់បណ្ណស្នាក់នៅដល់ជនអន្តោប្រវេសន៍ យ៉ាងតិច៦ម៉ឺននាក់ ដែលមានអាយុ១៨ឡើងទៅ ខណៈដែលមានជនអន្តោប្រវេសន៍ប្រមាណជាង១ម៉ឺននាក់ កំពុងស្នាក់នៅក្នុងប្រទេសកម្ពុជា ដោយខុសច្បាប់ មិនបានធ្វើលិខិតសុំបណ្ណស្នាក់នៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ