លោក ហ៊ុន សែន គ្រោងជួបប្រធានាធិបតីអ៊ុយក្រែនតាមទូរស័ព្ទ ខណៈកម្ពុជាអញ្ជើញរុស្ស៊ីចូលកិច្ចប្រជុំកំពូលអាស៊ាន
ក្នុងនាមជាប្រធានអាស៊ាននៅឆ្នាំនេះ លោកនាយករដ្ឋមន្ត្រី ហ៊ុន សែន បានបញ្ជាក់នៅថ្ងៃសៅរ៍នេះថា លោកនឹងជួបជជែកជាមួយលោក Volodymyr Zelenskyy ប្រធានាធិបតីអ៊ុយក្រែន តាមខ្សែទូរស័ព្ទ នៅថ្ងៃទី០១វិច្ឆិកាខាងមុខ។ ការបញ្ជាក់នេះ ធ្វើឡើងបន្ទាប់ពីប្រមុខរដ្ឋាភិបាលកម្ពុជា ក្នុងនាមខ្លួនជាប្រធានអាស៊ាននៅឆ្នាំនេះ ទទួលយកការស្នើសុំពីប្រធានាធិបតីអ៊ុយក្រែន។ ភ្ជាប់ជាមួយគ្នានេះ លោក ហ៊ុន សែន បានឲ្យដឹងថា សម្រាប់កិច្ចប្រជុំកំពូលអាស៊ានខាងមុខ កម្ពុជាក៏បានអញ្ជើញលោក ពូទីន ប្រធានាធិបតីរុស្ស៊ី ដើម្បីចូលរួមដោយផ្ទាល់ដែរ តែមិនទាន់មានការឆ្លើយតប។
ចុះផ្សាយនៅថ្ងៃ៖
ស្តាប់ - ០២:២០
ការជួបសន្ទនាតាមខ្សែទូរស័ព្ទជាមួយលោក Volodymyr Zelenskyy ត្រូវបានលោកនាយករដ្ឋមន្ត្រី ហ៊ុន សែន អះអាងថា នឹងអាចធ្វើឡើងនៅម៉ោង ៣ ឬ៤រសៀលនៅកម្ពុជា ដែលជាពេលវេលាថ្ងៃត្រង់នៅប្រទេសអ៊ុយក្រែន។ លោក ហ៊ុន សែន មិនបានបញ្ជាក់លម្អិតទេថា ការជួបសន្ទនានេះឡើងអាចលើកយកបញ្ហាអ្វីខ្លះមកពិភាក្សា ក៏ប៉ុន្តែអ្វីដែលលោកអះអាងនោះ គឺដោយសារតែ កម្ពុជាជាប្រធានប្តូរវេនអាស៊ាននៅឆ្នាំ២០២២នេះ ទើបអ៊ុយក្រែនចង់មានទំនាក់ទំនងកិច្ចសហប្រតិបត្តិការជាមួយបណ្តាប្រទេសអាស៊ីអាគ្នេយ៍។ នេះបើតាមការថ្លែងរបស់ប្រមុខរដ្ឋាភិបាល ពីខេត្តកំពង់ធំ នៅព្រឹកថ្ងៃសៅរ៍នេះ។
ការណ៍ដែលលោកប្រមុខរដ្ឋាភិបាលកម្ពុជា អះអាងអំពីការជជែកជាមួយមេដឹកនាំអ៊ុយក្រែនពេលនេះ គឺធ្វើឡើងនៅអំឡុងពេលដែលអ៊ុយក្រែនកំពុងត្រូវបានឈ្លានពាន និងកំពុងផុងក្នុងភ្នក់សង្រ្គាមជាមួយនឹងប្រទេសរុស្ស៊ី តាំងពីខែកុម្ភៈមកម្ល៉េះ។
យ៉ាងណាមិញ នៅចំពោះមុខនៃការអះអាងរបស់លោក ហ៊ុន សែន លោកបានបន្ថែមថា កិច្ចប្រជុំកំពូលរបស់អាស៊ាននៅទីក្រុងភ្នំពេញ គឺលោកក៏បានអញ្ជើញលោក Vladimir Putin ប្រធានាធិបតីរុស្ស៊ី មកចូលរួមកិច្ចប្រជុំផងដែរ។ ក៏ប៉ុន្តែ បើតាមលោក ហ៊ុន សែន គឺកម្ពុជាមិនទាន់ទទួលបានការឆ្លើយតបពីរុស្ស៊ីនៅឡើយនោះទេ។
សម្រាប់ការអញ្ជើញភាគីរុស្ស៊ី គឺលោកប្រធានាធិបតី ពូទីន មកចូលរួមកិច្ចប្រជុំកំពូលនៅទីក្រុងភ្នំពេញ ត្រូវបានអ្នកជំនាញផ្នែកកិច្ចការអន្តរជាតិ យល់ថា ជាតួនាទីរបស់អាស៊ាន តាមរយៈប្រធានប្តូរវេននីមួយៗដែលត្រូវធ្វើ។ លោក ឯម សុវណ្ណារ៉ា សាស្រ្តាចារ្យវិទ្យាសាស្រ្តនយោបាយ លើកឡើងថា ជាទូទៅអាស៊ានមានដៃគូ ដូចជា អាស៊ានបូករុស្ស៊ី អាស៊ានបូកចិន អាស៊ានបូកអាមេរិក។ ដូច្នេះការណ៍ដែលអញ្ជើញរុស្ស៊ីចូលរួមកិច្ចប្រជុំនេះ គឺជាការគិតគូពីជំហរបស់អាស៊ានមិនថ្កោលទោសរុស្ស៊ី។
ក៏ប៉ុន្តែនៅក្នុងលក្ខខណ្ឌ កម្ពុជា-រុស្ស៊ី វិញ គឺជាការបន្ទន់ឥរិយាបថ ឬភាពខឹងសម្បារបស់រុស្ស៊ីចំពោះកម្ពុជា ព្រោះកម្ពុជាធ្លាប់បោះឆ្នោតថ្កោលទោសរុស្ស៊ី ចំពោះការឈ្លានពាន និងកាត់យកទឹកដីអ៊ុយក្រែន។ នេះបើតាមលោក ឯម សុវណ្ណារ៉ា។
នៅចំពោះមុខនៃកិច្ចប្រជុំកំពូលអាស៊ានខាងមុខ ថ្នាក់ដឹកនាំធំៗខ្លះ បានបញ្ជាក់ពីការចូលរួមដោយផ្ទាល់នៅទីក្រុងភ្នំពេញ។ សេចក្តីប្រកាសរបស់សេតវិមាន នៅថ្ងៃសុក្រ ទី២៨តុលា បញ្ជាក់ថា លោក ចូ បៃឌិន ប្រធានាធិបតីអាមេរិកនឹងមកប្រទេសកម្ពុជានៅថ្ងៃទី១២ និង១៣វិច្ឆិកា ដើម្បីចូលរួមកិច្ចប្រជុំភាពជាដៃគូរវាង អាស៊ាន-អាមេរិក និងកិច្ចប្រជុំកំពូលអាស៊ីបូព៌ា។ តាមសេចក្តីប្រកាស គឺលោក បៃឌិន នឹងបញ្ជាក់ជាថ្មីពីការប្តេជ្ញាចិត្តរបស់អាមេរិកចំពោះអាស៊ាន និងសារៈសំខាន់រវាងភាគីទាំងពីរ ក្នុងការធានាសន្តិសុខ និងភាពរីកចម្រើនក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ