មន្ត្រីខ្មែរម្នាក់រងការចោទប្រកាន់៤ករណី ក្រោយឆ្លងដែន និងកាន់កាប់អាវុធខុសច្បាប់ក្នុងប្រទេសថៃ
មន្ត្រីយោធាខ្មែរសក្តិប្រាំម្នាក់ ត្រូវបានអាជ្ញាធរថៃឃាត់ខ្លួន និងចោទប្រកាន់៤ករណី ជុំវិញការបើកឡានចូលក្នុងទឹកដីថៃដោយខុសច្បាប់។ បើតាមការចុះផ្សាយពីសារព័ត៌មានថៃ មន្ត្រីយោធាខ្មែររូបនេះ មានឋានៈជាវរសេនីយ៍ឯក ចំណុះអគ្គលេខាធិការដ្ឋាន នៃក្រសួងការពារជាតិ ហើយបច្ចុប្បន្នជនល្មើសកំពុងស្ថិតក្រោមការស៊ើបអង្កេតពីប៉ូលីសថៃ។
ចុះផ្សាយនៅថ្ងៃ៖
ស្តាប់ - ០២:២៧
មន្ត្រីខ្មែរដែលត្រូវបានអាជ្ញាធរថៃចាប់ឃាត់ខ្លួនកាលពីថ្ងៃទី០៦ វិឆ្ឆិកាកន្លងទៅ កំពុងរងបទចោទចំនួន៤ ករណី រួមមាន៖ ការចូលទឹកដីថៃដោយខុសច្បាប់, ការនាំយកយានជំនិះចូលទឹកដីថៃដោយគ្មានឆ្លងកាត់មន្ត្រីគយ, ការរារាំងតតាំងនឹងសមត្ថកិច្ច និងការប្រើប្រាស់អាវុធខុសច្បាប់។
ក្នុងនោះ មន្ត្រីថៃបានអះអាងតាមរយៈសារព័ត៌មានក្នុងស្រុកថា មន្ត្រីខ្មែររូបនេះបានបំពានចូលទឹកដីថៃ និងព្រមទាំងមានការកាន់កាប់អាវុធខុសច្បាប់ថែមទៀត។ មន្ត្រីថៃបន្តថា បទល្មើសនេះកើតមានឡើង ក្រោយជនល្មើសបានបើករថយន្តម៉ាក Jeep ពណ៌ខ្មៅ ពាក់ស្លាកលេខកម្ពុជា PICH. NIK បើកចូលតាមច្រកព្រំដែន បានខៅឌីន ស្រុកខ្លងហាត ខេត្តស្រះកែវ ក្នុងស្ថានភាពស្រវឹងខ្លាំង។
បើតាមសារព័ត៌មានប្រទេសថៃឈ្មោះ ថៃរាដបាននិយាយថា មន្រ្តីខ្មែរដែលបានបើករថយន្តចូលទឹកដីថៃកាលពីថ្ងៃទី០៥ វិឆ្ឆិកា គឺ មានអត្តចរិកកោងកាច ដោយមិនព្រមប្រគល់ខ្លួនជូនសមត្ថកិច្ចថៃដោយសន្តិវិធីឡើយ ប៉ុន្តែបែរជាដកកាំភ្លើងបាញ់តតាំងជាមួយមន្ត្រីយោធាថៃទៅវិញ។
សារព័ត៌មានដដែលបានឱ្យដឹងទៀតថា ក្រោយមក មន្ត្រីខ្មែរដែលមានឈ្មោះថា សុខ បានផល ត្រូវបានឃាត់ខ្លួនដោយកងកម្លាំងសមត្ថកិច្ចពិសេសថៃនៅវេលាម៉ោងប្រមាណ៩ព្រឹក ថ្ងៃទី ០៦ វិឆ្ឆិកា និងបន្ទាប់មកក៏បានបញ្ចូនទៅកាន់មន្ទីរពេទ្យដើម្បីពិនិត្យរកសារធាតុញៀន។
ក្នុងសំណេររបស់សារព័ត៌មានថៃជាច្រើនបានសរសេរថា ក្រោយកើតហេតុការណ៍នេះ អាជ្ញាធរកម្ពុជាបានចូលមកសហការជាមួយអាជ្ញាធរថៃ ដើម្បីបញ្ចូនខ្លួនជនល្មើសមកអនុវត្តទោសនៅកម្ពុជា ក៏ប៉ុន្តែភាគីថៃនៅមិនទាន់ឆ្លើយតបឱ្យបានលម្អិតនៅឡើយ។
ជុំវិញរឿងនេះ វិទ្យុបារាំងអន្តរជាតិRFI ក៏មិនអាចសុំការឆ្លើយតបពីលោក ឈុំ សុជាតិ អ្នកនាំពាក្យក្រសួងការពារជាតិកម្ពុជា និងលោក ជុំ សន្ទរី អ្នកនាំពាក្យក្រសួងការបរទេសកម្ពុជាបានឡើយទេនាព្រឹកថ្ងៃចន្ទនេះ។
ដោយឡែក លោក យ៉ង់ គីមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពបានចាត់ទុកសកម្មភាពរបស់មន្ត្រីយោធាខ្មែរខាងលើ ថាជាទង្វើដែលជះផលប៉ះពាល់ដល់កេរ្តិ៍ឈ្មោះស្ថាប័នរបស់ជាតិ ជាពិសេសបញ្ហានេះធ្វើឱ្យប្រទេសជិតខាងវាយតម្លៃនូវសមត្ថភាព និងសេចក្តីថ្លៃថ្នូររបស់មន្ត្រីយោធាខ្មែរផង។
គួរជម្រាបថា អាជ្ញាធរថៃបានបញ្ជាក់នូវព័ត៌មានចុងក្រោយថា មូលហេតុដែលធ្វើឱ្យមន្ត្រីខ្មែរសក្តិប្រាំខាងលើបើកឡានឆ្លងចូលទឹកដីថៃដោយខុសច្បាប់នោះ គឺបណ្តាលមកពីបញ្ហាក្នុងគ្រួសារ និងបញ្ហាផ្លូវអារម្មណ៍មិនល្អរបស់ជនល្មើស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ