អ្នកតាមដាន ថាការបញ្ចូលអ៊ុយក្រែនក្នុងសន្ធិសញ្ញាTAC ជាជោគជ័យមួយរបស់កម្ពុជាក្នុងនាមជាប្រធានប្តូរវេន
អ្នកតាមដានកិច្ចការអន្តរជាតិ លើកឡើងថា ការត្រៀមបញ្ចូលអ៊ុយក្រែនជាសមាជិកសន្ធិសញ្ញាមិត្តភាពនិងដៃគូសហការរបស់អាស៊ាន គឺជាជោគជ័យមួយរបស់កម្ពុជា ក្នុងនាមជាប្រធានប្តូរវេននៅឆ្នាំនេះ។ ការលើកឡើងនេះ ធ្វើឡើងបន្ទាប់ពីរដ្ឋមន្ត្រីការបរទេសអ៊ុយក្រែន បានមកដល់ទីក្រុងភ្នំពេញ ដើម្បីចូលរួមកិច្ចប្រជុំកំពូលអាស៊ាន និងចូលជាសមាជិកនៃសន្ធិសញ្ញាមិត្តភាពនិងដៃគូសហការជាមួយអាស៊ាន។
ចុះផ្សាយនៅថ្ងៃ៖
ស្តាប់ - ០១:៥៦
វត្តមានរបស់លោក Dmytro Kuleba រដ្ឋមន្ត្រីការបរទេសអ៊ុយក្រែន នៅទីក្រុងភ្នំពេញ គឺដើម្បីចុះហត្ថលេខាក្នុងសន្ធិសញ្ញាមិត្តភាព និងជាដៃគូសហការជាមួយអាស៊ាន ដែលនឹងធ្វើឡើងនៅថ្ងៃព្រហស្បតិ៍ទី១០វិច្ឆិកា។ ការណ៍ដែលមកដល់ទីក្រុងភ្នំពេញ លោក Dmytro Kuleba បានជួបជាមួយលោកនាយករដ្ឋមន្ត្រី ហ៊ុន សែន នៅថ្ងៃពុធនេះ ដើម្បីជជែកការងារមុននឹងចូលជាសមាជិកសន្ធិសញ្ញា TAC។
ចំពោះការចូលជាសមាជិកសន្ធិសញ្ញា TAC របស់អ៊ុយក្រែន ត្រូវបានអ្នកតាមដាននយោបាយការទេសយល់ថា អាចជាបញ្ហាលំបាកបន្តិច ដ្បិតជំហរបស់អាស៊ានត្រូវការការឯកភាពរួម នាខណៈដែលអាស៊ានបច្ចុប្បន្នបានផាត់ភូមាចេញពីកិច្ចប្រជុំជាប្រចាំ ដោយសារការកាន់កាប់ដោយរបបយោធា។
លោក ឯម សុវណ្ណារ៉ា សាស្ត្រាចារ្យវិទ្យាសាស្រ្តនយោបាយ យល់ថា អាចជាការលំបាកក្នុងការបញ្ចូលអ៊ុយក្រែនជាសមាជិកសន្ធិសញ្ញា TAC ព្រោះអាស៊ានត្រូវការកុងសង់ស៊ីស។ ក៏ប៉ុន្តែអ្នកតាមដានកិច្ចការអន្តរជាតិរូបនេះ លើកឡើងថា ភាគីភូមាក៏នៅឲ្យតម្លៃអាស៊ានច្រើន បើទោះជាខ្លួនមិនបានចូលរួមកិច្ចប្រជុំកំពូល និងទោះបីជារបបសឹកមានការគាំទ្រពីភាគីរុស្ស៊ី ដែលឈ្លានពានប្រទេសអ៊ុយក្រែនក្តី។
សម្រាប់លោក ឯម សុវណ្ណារ៉ា ការណ៍ដែលអាស៊ានដែលកម្ពុជាម្ចាស់ផ្ទះប្តូរវេននៅឆ្នាំនេះ អាចរាប់ថាជាចំណុចវិជ្ជមានក្នុងការបង្ហាញជំហរគាំទ្រច្បាប់អន្តរជាតិ ក្នុងការគោរពអធិបតេយ្យភាព និងអនុញ្ញាតឲ្យអ៊ុយក្រែនចូលជាសមាជិកនៃសន្ធិសញ្ញា TAC។ ក៏ប៉ុន្តែក៏នៅមានប្រធានបទក្តៅមួយចំនួនទៀត ដែលនឹងត្រូវដោះស្រាយនៅក្នុងកិច្ចប្រជុំកំពូលខាងមុខ តួយ៉ាងដូចជាវិបត្តិភូមាជាដើម។ នេះបើតាមលោក ឯម សុវណ្ណារ៉ា។
សូមបញ្ជាក់ថា នៅក្នុងឆ្នាំនេះ អាស៊ាននឹងបញ្ចូលសមាជិកចំនួន២បន្ថែមទៀត គឺ អ៊ុយក្រែន និងអេស្ប៉ាញ ទៅក្នុងសន្ធិសញ្ញាមិត្តភាព និងដៃគូសហការរបស់អាស៊ាន (TAC)។ អ៊ុយក្រែន និងអេស្ប៉ាញនឹងក្លាយជាសមាជិកទី៥០និង៥១នៃសន្ធិសញ្ញាTAC ខណៈដែលបច្ចុប្បន្នសន្ធិសញ្ញាវ័យ៤៦ឆ្នាំនេះ មានបណ្តាប្រទេសជាសមាជិកចំនួន៤៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ