គណបក្សប្រឆាំងទាញអាស៊ានឲ្យគិតគូរពីសិទ្ធិមនុស្ស ខណៈអាមេរិកបង្ហាញកង្វល់ពីកាត់ទោសជាក្រុម
គណបក្សភ្លើងទៀនអំពាវនាវឲ្យប្រទេសជាសមាជិកអាស៊ានដែលមកជួបប្រជុំគ្នានៅទីក្រុងភ្នំពេញនៅពេលនេះ រួមគ្នាលើកកម្ពស់នីតិរដ្ឋ ប្រជាធិបតេយ្យ និងគោរពសិទ្ធិមនុស្ស ជាពិសេសធានាដំណើរការបោះឆ្នោតនៅកម្ពុជា២០២៣។ ការអំពាវនាវនេះ ស្របពេលដែលក្រសួងការបរទេសអាមេរិក បានបង្ហាញកង្វល់របស់ខ្លួនជាថ្មីម្តងទៀតជុំវិញការឃុំខ្លួន កញ្ញា សេង ធារី មេធាវីសញ្ជាតិអាមេរិកាំង និងការកាត់ទោសក្រុមសកម្មជនគណបក្សប្រឆាំងនៅកម្ពុជាជាបន្តបន្ទាប់មកនេះ។
ចុះផ្សាយនៅថ្ងៃ៖
ស្តាប់ - ០២:០២
ការបង្ហាញកង្វល់របស់ក្រសួងការបរទេសអាមេរិកបែបនេះ ធ្វើនៅក្នុងសន្និសិទរបស់ខ្លួន នៅថ្ងៃទី៨វិច្ឆិកា ពោលមុនតែប៉ុន្មានថ្ងៃ ដែលលោក ចូ បៃឌិន ប្រធានាធិតីអាមេរិកមកជាន់ទឹកដីកម្ពុជា ដើម្បីចូលរួមកិច្ចប្រជុំកំពូលអាស៊ាន។
លោក Ned Price អ្នកនាំពាក្យក្រសួងការបរទេសអាមេរិកថ្លែងថា អាមេរិកអំពាវនាវដល់អាជ្ញាធរកម្ពុជា ឱ្យដោះលែងរាល់អ្នកទាំងឡាយណាដែលត្រូវបានឃុំខ្លួនដោយអយុត្តិធម៌ រួមទាំងកញ្ញា សេង ធារី និងត្រូវធានានូវសេរីភាពនៃការបញ្ចេញមតិ សេរីភាពនៃការបង្កើតសមាគម និងការប្រមូលផ្តុំដោយសន្តិវិធី ដែលស្របទៅតាមរដ្ឋធម្មនុញ្ញរបស់កម្ពុជា និងកាតព្វកិច្ច ព្រមទាំងការប្តេជ្ញាចិត្តជាអន្តរជាតិរបស់ប្រទេសនេះ។
បើតាមអ្នកនាំពាក្យរូបនេះ អាមេរិកតែងតែឈរនៅជាមួយប្រជាពលរដ្ឋកម្ពុជា ហើយគាំទ្រដោយឥតងាករេក្នុងក្តីបំណងប្រាថ្នារបស់ពួកគេដើម្បីទទួលបានលទ្ធិប្រជាធិបតេយ្យ និងការគោរពសិទ្ធិមនុស្សប្រសើរឡើង។
មួយថ្ងៃក្រោយការបង្ហាញជំហរយ៉ាងដូច្នេះរបស់សហរដ្ឋអាមេរិក គណបក្សភ្លើងទៀន បានចេញសេចក្តីថ្លែងការណ៍មួយនៅថ្ងៃទី៩វិច្ឆិកា ដោយអំពាវនាវឲ្យប្រទេសជាសមាជិកអាស៊ានដែលមកជួបប្រជុំគ្នានៅទីក្រុងភ្នំពេញនៅពេលនេះ រួមគ្នាលើកកម្ពស់នីតិរដ្ឋ ប្រជាធិបតេយ្យ និងគោរពសិទ្ធិមនុស្ស ជាពិសេសធានាដំណើរការបោះឆ្នោតនៅកម្ពុជា២០២៣។
បើតាមគណបក្សប្រឆាំងមួយនេះ លទ្ធិប្រជាធិបតេយ្យ និងការគោរពសិទ្ធិមនុស្សនៅប្រទេសជាសមាជិកអាស៊ានដូចជា ភូមា ថៃ និងកម្ពុជា កំពុងធ្លាក់ចុះគួរឲ្យព្រួយបារម្ភ ខណៈដែលបញ្ហាជម្លោះសមុទ្រចិនខាងត្បូង ក៏ក្តីបារម្ភធំធេងសម្រាប់សន្តិសុខក្នុងតំបន់។
គណបក្សភ្លើងទៀន កត់សំគាល់ថា អព្យក្រឹត្យភាពរបស់កម្ពុជាដែលចែងក្នុងរដ្ឋធម្មនុញ្ញ និងកិច្ចព្រមព្រៀងក្រុងប៉ារីសត្រូវបានរំលោភបំពាន ដោយទំនាក់ទំនងជិតស្និទ និងការពឹងផ្អែកទាំងស្រុងទៅលើប្រទេសចិន។ កត្តានេះហើយ ដែលបើតាមគណបក្សប្រឆាំង គឺធ្វើឲ្យបណ្តាប្រទេសលោកសេរីបង្ហាញក្តីបារម្ភពីវត្តមានយោធាចិននៅកម្ពុជា និងបង្កជាក្តីបារម្ភដល់សន្តិសុខតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ