មន្ត្រីការបរទេស៖ ការទទួលស្គាល់អ៊ុយក្រែនជាសមាជិក TAC ជាសមទ្ធិផលដ៏ធំមួយរបស់កម្ពុជា
មន្ត្រីការបរទេសកម្ពុជា អះអាងថា ការដែលអ៊ុយក្រែនបានក្លាយជាសមាជិកនៃសន្ធិសញ្ញាមិត្តភាព និងដៃគូសហប្រតិបត្តិការអាស៊ីអាគ្នេយ៍ (TAC) ជាផ្លូវការ គឺជាសមទ្ធិផលដ៏ធំមួយរបស់កម្ពុជា។ ការថ្លែងបែបនេះ គឺបន្ទាប់ពីរដ្ឋមន្ត្រីការបរទេសអ៊ុយក្រែន បានចូលរួមចុះហត្ថលេខាលើសន្ធិសញ្ញា TAC នៅក្នុងកិច្ចប្រជុំកំពូលអាស៊ាន នាទីក្រុងភ្នំពេញ នៅថ្ងៃព្រហស្បតិ៍នេះ។ អ៊ុយក្រែននឹងក្លាយជាសមាជិកទី៥០នៅក្នុងសន្ធិសញ្ញាមិត្តភាព និងដៃគូអាស៊ាន ដែលអាចមានកិច្ចសហប្រតិបត្តិការរវាងគ្នា នៅក្នុងការងារសេដ្ឋកិច្ច និងវប្បធម៌ ជាដើម ខណៈប្រទេសមួយនេះកំពុងយាយីដោយសង្រ្គាមជាមួយរុស្ស៊ី។
ចុះផ្សាយនៅថ្ងៃ៖
ស្តាប់ - ០១:៥៩
ដូចការគ្រោងទុកនៅក្នុងរបៀបវារៈនៃកិច្ចប្រជុំកំពូលនៅទីក្រុងភ្នំពេញ អ៊ុយក្រែនបានក្លាយជាសមាជិកទី៥០នៃសន្ធិសញ្ញាមិត្តភាព និងភាពជាដៃគូសហប្រតិបត្តិជាមួយបណ្តាប្រទេសក្នុងតំបន់អាស៊ាន ដែលហៅកាត់ថា TAC។ ការចូលជាសមាជិកTAC របស់អ៊ុយក្រែន ធ្វើឡើងដោយមានវត្តមានរបស់រដ្ឋមន្ត្រីការបរទេស លោក Dmytro Kuleba ជាមួយនឹងបណ្តាមេដឹកនាំអាស៊ាន រួមទាំងលោក ប្រាក់ សុខុន ដែលជាប្រមុខការទូតកម្ពុជា។
លោក គង់ ភោគ រដ្ឋលេខាធិការ និងជាអ្នកនាំពាក្យកិច្ចប្រជុំអាស៊ាន បញ្ជាក់នៅមុនពេលចុះហត្ថលេខាទទូលអ៊ុយក្រែនថា នេះជាសមទ្ធិផលដ៏ធំមួយសម្រាប់កម្ពុជា នៅខណៈដែលជាប្រធានប្តូរវេនឆ្នាំនេះ មានប្រទេសចំនួន៧បានចូលជាសមាជិក។ បើតាមលោក គង់ ភោគ អាស៊ានជាអង្គការតំបន់ដែលបើកចំហសម្រាប់កិច្ចសហប្រតិបត្តិការជាមួយបណ្តាប្រទេសនានា ទៅលើវិស័យសេដ្ឋកិច្ច សង្គមកិច្ច វប្បធម៌ជាដើម ហើយបណ្តាប្រទេសទាំងនោះ ក៏អាចក្លាយជាដៃគូយុទ្ធសាស្ត្រគ្រប់ជ្រុងជ្រោយរបស់អាស៊ាន។
គួរកត់សម្គាល់ថា ការបញ្ចូលអ៊ុយក្រែនជាសមាជិកTACពេលនេះ ធ្វើឡើងនាអំឡុងពេលដែលប្រទេសមួយនេះកំពុងរ៉ាំរ៉ៃដោយសង្រ្គាមជាមួយនឹងរុស្ស៊ីតាំងពីខែកុម្ភៈមកនេះ។ ក្នុងការសង្រ្គាមជាមួយរុស្ស៊ី អ៊ុយក្រែនទទួលបានការគាំទ្រពីសហគមន៍អាស៊ាននិយាយជារួម និងនិយាយដោយឡែកពីកម្ពុជា ក្នុងការបោះឆ្នោតនៅអង្គការសហប្រជាជាតិចំនួន៣លើក។
បន្ថែមពីនេះ នៅមុនការចុះហត្ថលេខាមួយសប្តាហ៍ ប្រមុខរដ្ឋអ៊ុយក្រែន លោក Vlodymir Zelenskyy ក៏បានជួបជាមួយលោកនាយករដ្ឋមន្ត្រី ហ៊ុន សែន តាមខ្សែទូរស័ព្ទ ក្នុងការជជែកពីការណ៍ដែលរុស្ស៊ីឈ្លានពានអ៊ុយក្រែន និងការស្នើសុំលោក ហ៊ុន សែន ដើម្បីថ្លែងការណ៍នៅក្នុងកិច្ចប្រជុំកំពូលអាស៊ាន។
ក៏ប៉ុន្តែយ៉ាងណាសំណើរបស់អ៊ុយក្រែន ត្រូវបានបដិសេធដោយអាស៊ាន ដ្បិតអាស៊ានមានជំហររួមកឺកុងសង់ស៊ីស។ នេះបើតាមការបញ្ជាក់ស្ថានទូតអ៊ុយក្រែនចំពោះប្រទេសវៀតណាម បញ្ជាក់ប្រាប់កាសែត Khmertimes។
គួរបញ្ជាក់ថា អ៊ុយក្រែនបានក្លាយជាសមាជិកទី៥០នៃសន្ធិសញ្ញាមិត្តភាព និងដៃគូសហប្រតិបត្តិការរបស់អាស៊ាន ខណៈដែលអេស្ប៉ាញដែលត្រូវចូលជាមាជិកទី៥១នៅទីក្រុងភ្នំពេញដែរនោះ បានអវត្តមាន ដោយសារបញ្ហាផ្ទៃក្នុង។ នេះបើតាមមន្ត្រីក្រសួងការបរទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ