អាស៊ានជំរុញឲ្យភូមាអនុវត្តកិច្ចព្រមព្រៀង ៥ចំណុចឲ្យបានទាំងស្រុង
ប្រទេសអាស៊ានបានបញ្ជាក់ជាថ្មីថា ភូមានៅតែជាផ្នែកសំខាន់របស់អាស៊ាន និងថាបើទោះជាមានភាពជឿនលឿនតិចតួចនៃការអនុវត្តកិច្ចព្រមព្រៀងជាឯកច្ឆន្ទ៥ចំណុច តែកិច្ចព្រមព្រៀងនេះ នៅតែជាឯកសារយោងដ៏សំខាន់ ដែលមានសុពលភាពរបស់អាស៊ាន។ នេះបើតាមសេចក្តីសម្រេច និងវាយតម្លៃមួយរបស់មេដឹកនាំអាស៊ាន កាលពីថ្ងៃទី១០ ខែវិច្ឆិកា និងថាកិច្ចព្រមព្រៀង៥ចំណុច គួរតែត្រូវបានអនុវត្តទាំងស្រុង។
ចុះផ្សាយនៅថ្ងៃ៖
ស្តាប់ - ០២:៤០
មេដឹកនាំអាស៊ានបានបញ្ជាក់ជាថ្មីថា ភូមានៅតែជាផ្នែកដ៏សំខាន់របស់អាស៊ាន។ នេះបើតាមសេចក្តីសម្រេច និងការវាយតម្លៃរបស់មេដឹកនាំអាស៊ាន៩ប្រទេស នៅក្នុងអំឡុងកិច្ចប្រជុំកំពូលអាស៊ានលើកទី៤០ និងទី៤១ ចំពោះការអនុវត្តកិច្ចព្រមព្រៀងជាឯកច្ឆន្ទ ៥ចំណុច ដែលបានឯកភាពនៅក្នុងកិច្ចប្រជុំថ្នាក់ដឹកនាំអាស៊ាន កាលពីខែមេសា ឆ្នាំ២០២១។
តាមរយៈសេចក្តីសម្រេច និងវាយម្លៃរបស់មេដឹកនាំអាស៊ាន ចេញផ្សាយកាលពីថ្ងៃទី១០ ខែវិច្ឆិកា ដែលមាន១៥ចំណុច បញ្ជាក់ទៀតថា ស្ថានការណ៍នៅភូមា នៅតែធ្ងន់ធ្ងរ និងមានភាពផុយស្រួយ ជាមួយ នឹងការកើនឡើងនៃអំពើហិង្សា ដែលជាកង្វល់ចម្បង ប៉ះពាល់មិនត្រឹមតែភូមាប៉ុណ្ណោះទេ ថែមទាំងដល់កិច្ចខិតខំប្រឹងប្រែងកសាងសហគមន៍អាស៊ានផងដែរ។ អាស៊ានប្ដេជ្ញាចិត្តជួយ ភូមាក្នុងការស្វែងរកដំណោះស្រាយដោយសន្តិវិធី និងយូរអង្វែងសម្រាប់វិបត្តិបច្ចុប្បន្ន។
ជាមួយនឹងភាពជឿនលឿនតិចតួច ដែលសម្រេចបានក្នុងការអនុវត្តកិច្ចព្រមព្រៀងជាឯកច្ឆន្ទ ៥ចំណុច កងទ័ពភូមាមានតួនាទីក្នុងការអនុវត្តតាមការប្តេជ្ញាចិត្តចំពោះថ្នាក់ដឹកនាំអាស៊ាន។ នេះ បើតាមការវាយតម្លៃ និងសេចក្តីសម្រេចចិត្តរបស់មេដឹកនាំអាស៊ាន ជុំវិញការអនុវត្តកិច្ចព្រមព្រៀងដែលមានគោលដៅស្រាយវិបត្តិនៅភូមា។
អាស៊ានបញ្ជាក់ថា កិច្ចព្រមព្រៀងជាឯកច្ឆន្ទ៥ចំណុច ត្រូវតែជាឯកសារយោង ដែលមានសុពលភាពរបស់អាស៊ាន និងគួរតែត្រូវបានអនុវត្តទាំងស្រុង។ មេដឹកនាំអាស៊ានក៏ទទូចឱ្យគ្រប់ភាគីពាក់ព័ន្ធទាំងអស់បន្ធូរបន្ថយភាពតានតឹង និងអត់ធ្មត់ជាអតិបរមា ហើយគ្រប់ភាគីពាក់ព័ន្ធទាំងអស់ ដែលកាន់អាវុធ គួរតែទទួលខុសត្រូវដោយតម្លាភាព និងត្រូវបានថ្កោល ទោសចំពោះអំពើហិង្សា ដោយកត់សម្គាល់ថា កងកម្លាំងប្រដាប់អាវុធភូមាគឺជាកម្លាំង យោធាដ៏ធំបំផុតតែមួយគត់នៅក្នុងភូមា។
ចំណុចសំខាន់មួយទៀត នៅក្នុងចំណោមសេចក្តីសម្រេច និងវាយម្លៃ ដែលមាន ១៥ចំណុចនោះ គឺអាស៊ានត្រូវពិចារណារិះរកវិធីសាស្ត្រផ្សេងទៀត ដែលអាចគាំទ្រដល់ការអនុវត្តកិច្ចព្រមព្រៀងជាឯកច្ឆន្ទ៥ចំណុច។
ក្នុងកិច្ចប្រជុំអាស៊ានលើកទី៤០ និង៤១ ដែលធ្វើឡើងនៅរាជធានីភ្នំពេញ ប្រធានាធិបតីឥណ្ឌូនេស៊ី លោក ចូកូ វីដូដូ (Joko Widodo) បានស្នើថា ការចូលរួមរបស់តំណាងមិនមែននយោបាយនៃរបបភូមា គួរតែត្រូវបានអនុវត្តលើសពីកិច្ចប្រជុំកំពូល និងកិច្ចប្រជុំរដ្ឋមន្ត្រីការបរទេស។ នេះបើតាមការចុះផ្សាយរបស់សារព័ត៌មាន Bloomberg។
សូមបញ្ជាក់ថា វត្តមានរបស់ភូមាត្រូវបានដកចេញពីកិច្ចប្រជុំរបស់អាស៊ានជាបន្តបន្ទាប់ នៅក្រោយរបបយោធាឡើងកាន់អំណាច កាលពីខែកុម្ភៈ ឆ្នាំ២០២១។ សម្រាប់កិច្ចប្រជុំកំពូលអាស៊ាន ដែលធ្វើឡើងក្នុងក្រុងភ្នំពេញនាវិច្ឆិកានេះ កៅអីភូមាក៏នឹងត្រូវទុកឲ្យទំនេរជាថ្មី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ