ចិននឹងបោះទុនវិនិយោគ១.៥ប៊ីលានដុល្លារក្នុងការធ្វើពាណិជ្ជកម្មសេរីអាស៊ាន-ចិន
ប្រទេសចិនគ្រោងដាក់ទុនវិនិយោគក្នុងទំហំទឹកប្រាក់១.៥ប៊ីលានដុល្លារអាមេរិក(១៥០០លាន) សម្រាប់រយៈពេល៣ឆ្នាំ ក្នុងការធ្វើពាណិជ្ជកម្មសេរីអាស៊ាន-ចិន។ នេះជាផ្នែកមួយនៃសំណើ៥ចំណុចដែលចិនដាក់ទៅកាន់អាស៊ានដើម្បីពង្រឹងទំនាក់ទំនងអាស៊ាន-ចិន នៅក្នុងកិច្ចប្រជុំកំពូលអាស៊ាន-ចិន លើកទី១៥ នៅថ្ងៃទី១១វិច្ឆិកាម្សិលមិញ។ ទន្ទឹមនឹងនេះ អ្នកជំនាញសេដ្ឋកិច្ចនៅកម្ពុជាវាយតម្លៃថា កម្ពុជាក៏ បានប្រយោជន៍ពីនេះមិនតិចដែរ។
ចុះផ្សាយនៅថ្ងៃ៖
ស្តាប់ - ០៣:០២
គម្រោងវិនិយោគសម្រាប់ការអភិវឌ្ឍដែលមានទំហំទឹកប្រាក់ ១.៥ប៊ីលានដុល្លារអាមេរិកនេះ ស្ថិតនៅក្នុង បរិបទភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងតំបន់ពាណិជ្ជកម្មសេរីអាស៊ាន-ចិន ។ លោកបណ្ឌិត គី សេរីវឌ្ឍ អ្នកជំនាញសេដ្ឋកិច្ចនៃរាជ្យបណ្ឌិតសភាកម្ពុជាបានអះអាងជាថ្មីថា ទាំងចិននិងអាស៊ានសុទ្ធតែទទួលបានប្រយោជន៍ភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RCEP) ព្រោះទីផ្សារចិនធំ ដោយសារកំណើនប្រជាជនចិនមានចំនួនលើសប្រជាជនអាស៊ានពីរដងឯណោះ។
បើតាមអ្នកជំនាញសេដ្ឋកិច្ចរូបនេះ កម្ពុជាក៏ទទួលបានប្រយោជន៍មិនតិចដែរ ពីការធ្វើពាណិជ្ជកម្មរវាងអាស៊ាននិងចិន ព្រោះកុំភ្លេចថា ការតភ្ជាប់ទំនាក់ទំនងរវាងអាស៊ាននិងចិនកើតឡើងបាន ដោយសារតែទំនាក់ទំនងកម្ពុជានិងចិនមានស្រាប់។ ជាក់ស្ដែងកាលពី១០ឆ្នាំមុន ដែលកម្ពុជាទទួលធ្វើជាម្ចាស់ផ្ទះរៀបចំកិច្ចប្រជុំអាស៊ានលើកទី២ ជួយដោះស្រាយជម្លោះនៅសមុទ្រចិនខាងត្បូង និងស្របពេលដែលចិនជាដៃគូរពាណិជ្ជកម្មដ៏ធំមួយរបស់កម្ពុជា តាមរយៈកិច្ចព្រមព្រៀងសេរីកម្ពុជា-ចិន ហើយការវិនិយោគរបស់ចិនមកកាន់ប្រទេសកម្ពុជាកាន់តែមានទំហំធំឡើង។
ដូច្នេះចិននៅតែជាដៃគូរពាណិជ្ជកម្មដ៏សំខាន់របស់កម្ពុជានិយាយដោយឡែក និងនិយាយជារួមជាដៃគូរសំខាន់សម្រាប់អាស៊ានដើម្បីឲ្យកម្លាំងសេដ្ឋកិច្ចរវាងប្រទេសសមាជិកអាស៊ាន និងចិនមានល្បឿនប្រហាក់ប្រហែលគ្នា។ ប៉ុន្តែយ៉ាងណាមិញ បើនិយាយពីទំហំពាណិជ្ជកម្មរវាងចិន និងប្រទេសសមាជិកអាស៊ានគឺការធ្វើពាណិជ្ជកម្មរវាងចិននិងសិង្ហបុរីនាំមុខ តាមពីក្រោយដោយម៉ាឡេស៊ី ឥណ្ឌូណេស៊ី ថៃ ខណៈការធ្វើពាណិជ្ជកម្មរវាងចិននិងកម្ពុជានៅមានកម្រិត ហើយសម្រាប់លោកបណ្ឌិត គី សេរីវឌ្ឍចង់ឃើញទំហំពាណិជ្ជកម្មរវាងកម្ពុជានិងចិនកើនខ្ពស់។
គួរជម្រាបជូនថា នៅក្នុងកិច្ចប្រជុំកំពូលអាស៊ាន ចិន លើកទី១៥ នៅថ្ងៃទី១១ វិច្ឆិកា ចិន បានដាក់សំណើ៥ចំណុច ដើម្បីពង្រឹងទំនាក់ទំនង អាស៊ាន-ចិន ក្រោមទ្រឹស្ដីថា កសាងផ្ទះដែលមានសន្តិភាព។
ចំណុចទី១-សំដៅការធ្វើឲ្យស៊ីជម្រៅក្នុងវិស័យការពារជាតិ ឧក្រិដ្ឋកម្មឆ្លងដែន និងការចុះហត្ថលេខាលើសន្ធិសញ្ញាស្ដីពីតំបន់អាស៊ីអាគ្នេយ៍ គ្មានអាវុធនុយក្លេអ៊ែរ។
ទី២-កសាងផ្ទះ ដែលមានសន្តិសុខ សំដៅការប្ដេជ្ញាចិនរបស់ចិនគាំទ្ររបាំងការពារសុខភាព និងប្រឆាំងគ្រោះមហន្តរាយ។
ទី៣-កសាងផ្ទះ ដែលមានវិបុលភាព ដោយផ្ដល់គម្រោងវិនិយោគទឹកប្រាក់ ១.៥ ប៊ីលានដុល្លារអាមេរិក ក្នុងពេល៣ឆ្នាំ ពង្រឹងការអនុត្តភាពជាដៃគូសេដ្ឋកិច្ចគ្រប់ជ្រុងជ្រោយតំបន់ RCEP និងតំបន់សេដ្ឋកិច្ចសេរីអាស៊ាន ចិន។
ទី៤-កសាងផ្ទះ ដែលស្រស់ស្អាត សំដៅការអភិវឌ្ឈបៃតង និងសេដ្ឋកិច្ចពណ៌ខៀវ ព្រមទាំងកសាងផ្ទះដែលមានមេត្រីភាព សំដៅការលើកកម្ពស់វិស័យទេសចរណ៍ ការផ្លាស់ប្ដូរប្រជាជន រវាងប្រជាជន ជាពិសេសយុវជន និងថ្នាក់ដឹកនាំវ័យក្មេង។
ចិនបានក្លាយទៅជាដៃគូសន្ទនារបស់អាស៊ានកាលពីឆ្នាំ១៩៩១ ហើយចិនគឺជាដៃគូពាណិជ្ជកម្មដ៏ធំបំផុតរបស់អាស៊ាន ដែលមានទំហំពាណិជ្ជកម្មសរុបកើនដល់ ៦៦៩ពាន់លានដុល្លារ កាលពីឆ្នាំ២០២១ កើនឡើងជាង ២៨ភាគរយធៀបនឹងឆ្នាំ២០២០ ហើយការវិនិយោគផ្ទាល់ពីចិនមកអាស៊ានក៏កើនឡើងដល់ ១៣.៦ពាន់លានដុល្លារ កាលពីឆ្នាំ២០២១ ពោលគឺបានកើនឡើងជិត ២ដងធៀបនឹងឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ