នាយកIMF៖ សរសើរកម្ពុជា ប៉ុន្តែលើកឡើងពីការថមថយនៃសេដ្ឋកិច្ចពិភពលោកប្រឈមនឹងវិបត្តិ
យើងកំពុងដើរចូលទៅក្នុងពិភពលោកមួយដែលភាពក្រីក្រកើនឡើងជាមុន និងមិនសូវមានសុវត្ថិភាព។ នេះជាការសម្តែងក្តីបារម្ភរបស់ប្រធានមូលនិធិរូបិយវត្ថុអន្តរជាតិ(IMF) ប្រាប់មេដឹកនាំអាស៊ានក្នុងកិច្ចប្រជុំកំពូលនាទីក្រុងភ្នំពេញ។ អមដោយក្តីបារម្ភនេះ ប្រធានមូលនិធិរូបិយវត្ថុអន្តរជាតិក៏ឆ្លៀតសរសើរកម្ពុជាដែរ។
ចុះផ្សាយនៅថ្ងៃ៖
ស្តាប់ - ០២:៤១
តាមរយៈសេចក្តីថ្លែងការណ៍របស់ខ្លួននៅចំពោះមុខមេដឹកនាំអាស៊ានក្នុងកិច្ចប្រជុំ កាលពីថ្ងៃទី១០ ដល់ថ្ងៃទី១៣ ខែវិច្ឆិកា ក្នុងក្រុងភ្នំពេញ ប្រធានមូលនិធិរូបិយវត្ថុអន្តរជាតិ អ្នកស្រី Kristalina Georgieva បានលើកឡើងបីចំណុចពាក់ព័ន្ធនឹង ទស្សនវិស័យសេដ្ឋកិច្ចពិភពលោក លក្ខណៈពិសេសរបស់អាស៊ានក្នុងទស្សនវិស័យនេះ និងគោលនយោបាយអាទិភាព។
ប្រធានមូលនិធិរូបិយវត្ថុអន្តរជាតិបានផ្តើមថ្លែងការណ៍ដោយការសរសើរកម្ពុជាចំពោះសមិទ្ធិផលដ៏គួរឱ្យកត់សម្គាល់ក្នុងរយៈពេលពីរទសវត្សរ៍ចុងក្រោយនេះ។ អ្នកស្រីបញ្ជាក់ថា លោក ហ៊ុន សែន បានយកប្រទេសនេះពីគ្រាដ៏ខ្មៅងងឹតបំផុតក្នុងប្រវត្តិសាស្ត្ររបស់ខ្លួន មកឥឡូវនេះ ក្លាយជាប្រទេសដែលមានសេដ្ឋកិច្ចលូតលាស់លឿនបំផុតមួយក្នុងពិភពលោក។
អ្នកស្រីបន្តថាក្នុងរយៈពេលបីឆ្នាំចុងក្រោយនេះ ពោលគឺជារយៈពេលដ៏ខ្លីមួយ ដែលពិភពលោកបានទទួលការវាយប្រហារដោយភាពតក់ស្លុតម្តងហើយម្តងទៀតដូចជា ជំងឺរាតត្បាតសកល សង្គ្រាមនៅអឺរ៉ុប និងវិបត្តិតម្លៃទំនិញ។ វិបត្តិទាំងអស់នេះ បាននាំទៅរករូបភាពដ៏អាប់អួរលើផ្នែកសេដ្ឋកិច្ចពិភពលោក សម្រាប់ឆ្នាំនេះ និងជាពិសេសសម្រាប់ឆ្នាំក្រោយ។
បើតាមអ្នកស្រី Kristalina Georgieva ការរំខានសង្វាក់ផ្គត់ផ្គង់ដោយសារជំងឺរាតត្បាតសកល និងការកើនឡើងយ៉ាងឆាប់រហ័សនៃតម្លៃថាមពល និងតម្លៃអាហារ បានរុញឲ្យអតិផរណាកាន់តែឡើងខ្ពស់ ដែលនាំឱ្យមានការរឹតបន្តឹងលើគោលនយោបាយហិរញ្ញវត្ថុ និងធ្វើឲ្យមានការធ្លាក់ចុះយ៉ាងឆាប់រហ័សនៃកំណើនសេដ្ឋកិច្ចពិភពលោកពី ៦ភាគរយក្នុងឆ្នាំ២០២១ មក ៣.២ភាគរយនៅឆ្នាំ២០២២។ មូលនិធិរូបិយវត្ថុអន្តរជាតិ(IMF) ព្យាករថាពិភពលោកនឹងមានកំណើន ២.៧ភាគរយសម្រាប់ឆ្នាំ២០២៣ ប៉ុន្តែមានឱកាស២៥ភាគរយដែលកំណើនសេដ្ឋកិច្ចអាចធ្លាក់ទៅក្រោម ២ភាគរយ។
អ្នកស្រីបញ្ជាក់ថា ខណៈពេលដែលយើងឃើញរូបភាពដ៏អាប់អួរនេះ ភាពលំបាកក៏មាននិន្នាការឆ្ពោះទៅរកការកើនឡើងនៃការបែកបាក់ នៅពេលដែលយើងត្រូវការគ្នាបំផុត។ អ្នកស្រីមានការព្រួយបារម្ភយ៉ាងខ្លាំងថាយើងអាចនឹងកំពុងដើរចូលទៅក្នុងពិភពលោកមួយ ដែលនឹងមានភាពក្រីក្រជាងមុន និងមិនសូវមានសុវត្ថិភាព ដែលជាលទ្ធផលនៃវិបត្តិខាងលើ។
បើតាមរបាយការណ៍របស់មូលនិធិរូបិយវត្ថុអន្តរជាតិ IMF ចេញផ្សាយ កាលពីចុងខែតុលា ស្តីពីស្ថានភាពសេដ្ឋកិច្ចក្នុងតំបន់អាស៊ី និងប៉ាស៊ីហ្វិក កម្ពុជារក្សាកំណើន GDP ៥.១ភាគរយសម្រាប់ឆ្នាំ២០២២នេះ ហើយសេដ្ឋកិច្ចរបស់ប្រទេសកម្ពុជាត្រូវបានគេរំពឹងថានឹងកើនឡើង ដល់៦.២ភាគរយសម្រាប់ឆ្នាំ២០២៣។ របាយការណ៍ថ្មីនេះឲ្យដឹងថា អតិផរណាខ្ពស់នឹងបំផ្លាញប្រាក់ចំណូល និងជំរុញឱ្យគ្រួសារកាន់តែច្រើនធ្លាក់ទៅក្រោមបន្ទាត់នៃភាពក្រីក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ