លោក ហ៊ុន សែន ខកខានចូលរួមប្រជុំG20 និងAPEC នៅឥណ្ឌូណេស៊ី និងថៃ ដោយសារឆ្លងកូវីដ-១៩
លោកនាយករដ្ឋមន្ត្រី ហ៊ុន សែន និងគណៈប្រតិភូជាន់ខ្ពស់កម្ពុជាបានសម្រេចវិលត្រលប់មកប្រទេសវិញ ដែលតាមគម្រោងនឹងមកដល់ល្ងាចនេះ បន្ទាប់ពីលោក និងគណៈប្រតិភូកម្ពុជាបានទៅដល់ប្រទេសឥណ្ឌូណេស៊ីកាលពីយប់ម្សិលមិញ ដើម្បីចូលរួមកិច្ចប្រជុំកំពូល G20 និងកិច្ចសន្ទនាក្រៅផ្លូវការរបស់មេដឹកនាំ APEC។ ការខកខានរបស់កម្ពុជាក្នុងការចូលរួមកិច្ចប្រជុំដ៏សំខាន់ទាំងនេះ បន្ទាប់ពីលោក ហ៊ុន សែន ប្រកាសតាមហ្វេសប៊ុករបស់លោកនៅថ្ងៃអង្គារនេះថាលោកវិជ្ជមានជំងឺកូវីដ-១៩។
ចុះផ្សាយនៅថ្ងៃ៖
ស្តាប់ - ០២:៤៩
លោកនាយករដ្ឋមន្ត្រី ហ៊ុន សែន សម្រេចចិត្តដឹកនាំគណៈប្រតិភូជាន់ខ្ពស់កម្ពុជាវិលត្រលប់មកប្រទេសវិញបន្ទាប់ពីគ្រូពេទ្យឥណ្ឌូណេស៊ីធ្វើតេស្ត និងរកឃើញថាលោកវិជ្ជមានជំងឺកូវីដ-១៩។ លោកនាយករដ្ឋមន្ត្រីបានបង្ហោះសារនៅលើហ្វេសប៊ុករបស់លោកថា មុនចេញពីកម្ពុជាលោកធ្វើតេស្តរាល់ថ្ងៃ ពិសេសមុនចេញដំណើរ ដោយធ្វើតេស្តរហ័សមុនឡើងយន្តហោះ តែពុំឃើញអ្វីនោះឡើយ។
លោក ហ៊ុន សែន ថាលោកមិនច្បាស់ថាមេរោគនេះមកនៅជាមួយខ្លួនលោកចាប់ពីពេលណាមកនោះទេ តែអ្វីដែលច្បាស់ពេលទៅដល់ពេទ្យឥណ្ឌូណេស៊ីយកសំណាកពេលល្ងាច លុះព្រឹកឡើងបញ្ជាក់ថាវិជ្ជមានកូវីដ-១៩ ដែលនេះលោកត្រូវតែទទួលស្គាល់បើទោះជានៅក្នុងខ្លួនលោកមិនមានអាការៈចម្លែកក៏ដោយ។
លោកនាយករដ្ឋមន្ត្រីយល់ថាជាសំណាងដោយសារការទៅដល់របស់លោកយឺត មិនបានចូលរួមបាយល្ងាចជាមួយប្រមុខរដ្ឋ ប្រមុខរដ្ឋាភិបាលមួយចំនួនដែលរៀបចំដោយប្រធានាធិបតីបារាំង។ ដូច្នេះដើម្បីសុវត្ថិភាពសម្រាប់ប្រតិភូ ដែលចូលរួមប្រជុំលោក ហ៊ុន សែន សម្រេចឲ្យប្រតិភូរបស់លោកវិលត្រលប់មកកម្ពុជាវិញទាំងអស់។ រីឯតំណាងប្រទេសអាស៊ាន កម្ពុជាកំពុងចរចាប្រគល់ជូនឥណ្ឌូណេស៊ីជាតំណាងតែម្តង។ នេះបើតាមលោក ហ៊ុន សែន។
សូមបញ្ជាក់ថា G20 ឬ (Group of Twenty) គឺជាវេទិកាអន្តរជាតិដ៏ធំមួយ ដែលប្រមូលផ្តុំទៅដោយប្រទេសសេដ្ឋកិច្ចជឿនលឿនជាច្រើន ក៏ដូចជាប្រទេសកំពុងអភិវឌ្ឍន៍សំខាន់ៗ នៅលើពិភពលោក។ ការដែលមិនបានចូលរួមប្រជុំរបស់កម្ពុជាទៅក្នុងវេទិកាដ៏សំខាន់នេះ ក៏ដូចជាកិច្ចសន្ទនា APEC ត្រូវអ្នកតាមដានសង្គម និងនយោបាយកម្ពុជាមើលឃើញថាពិតជាគួរឲ្យសោកស្តាយយ៉ាងខ្លាំង ដែលកម្ពុជាបាត់បង់ឱកាសដ៏កម្រដូច្នេះ។
សូមរំលឹកថា តាមគម្រោង លោកនាយករដ្ឋមន្ត្រី ហ៊ុន សែន នឹងចូលរួមកិច្ចប្រជុំកំពូល G20 នៅឥណ្ឌូណេស៊ី និងចូលរួមកិច្ចសន្ទនាក្រៅផ្លូវការរបស់មេដឹកនាំ APEC នៅប្រទេសថៃ ចាប់ពីថ្ងៃទី១៥ ដល់១៨ ខែវិច្ឆិកា ឆ្នាំ២០២២នេះ។ នៅកោះបាលីឥណ្ឌូណេស៊ី លោក ហ៊ុន សែន គ្រោងនឹងថ្លែងបទអន្តរាគមន៍២សម័យប្រជុំ ទី១.ស្តីពីសន្តិសុខស្បៀង និងថាមពល និងទី២.ស្តីពីបញ្ហាសុខភាព។
ដោយឡែកសម្រាប់កិច្ចសន្ទនាក្រៅផ្លូវការរបស់មេដឹកនាំ APEC នៅប្រទេសថៃវិញ លោក ហ៊ុន សែន ក៏មានសុន្ទរកថាទាក់ទងទៅនឹង «ការលើកកម្ពស់ពាណិជ្ជកម្ម និងការវិនិយោគប្រកបដោយចីរភាពរវាង APEC និងដៃគូពាណិជ្ជកម្ម» ព្រមទាំងចូលរួមក្នុង«កិច្ចសន្ទនាក្រៅផ្លូវការរបស់ថ្នាក់ដឹកនាំ APEC ជាមួយភ្ញៀវ»។
ការរំខានពីកូវីដ-១៩ ទៅលើលោក ហ៊ុន សែន ពេលនេះ ធ្វើឲ្យលោកខកខានគម្រោងជំនួបសំខាន់ៗមួយចំនួនដូចជា ជួបជាមួយប្រធានាធិបតីចិន និងជួបប្រធានាធិបតីបារាំង ព្រមទាំងខកខានចូលគាល់ព្រះមហាក្សត្រថៃផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ