ក្រសួងកសិកម្មចាត់តាំងមន្រ្តីចុះទៅដោះស្រាយបញ្ហាស្រូវចុះថោក ខណៈអ្នកជំនាញមិនមានជំនឿ
ក្រសួងកសិកម្ម រុក្ខាប្រមាញ់និងនេសាទ បានចាត់តាំងមន្រ្តីចំនួនពីរូប និងក្រុមការងារនៃអគ្គនាយកដ្ឋានកសិកម្ម ដើម្បីចុះពិនិត្យជាក់ស្តែង និងរកដំណោះស្រាយសមស្រប ចំពោះការធ្លាក់ចុះតម្លៃស្រូវនៅខេត្តបាត់ដំបង និងបន្ទាយមានជ័យ។ ក៏ប៉ុន្តែសម្រាប់ប្រធានសមាគមសម្ព័ន្ធកសិករកម្ពុជាវិញ មិនមានជំនឿថាក្រសួងអាចដោះស្រាយបញ្ហានេះបាននោះទេ។
ចុះផ្សាយនៅថ្ងៃ៖
ស្តាប់ - ០៣:០៦
នៅពេលទទួលបានដំណឹងអំពីការធ្លាក់ចុះតម្លៃស្រូវនៅខេត្តបាត់ដំបង និងបន្ទាយមានជ័យ លោក ឌិត ទីណា រដ្ឋមន្រ្តីក្រសួងកសិកម្ម បានចាត់តាំងមន្រ្តីពីររូប កំរិតរដ្ឋលេខាធិការក្រសួងកសិកម្ម ព្រមទាំងក្រុមការងារនៃអគ្គនាយកដ្ឋានកសិកម្ម ដើម្បីចុះពិនិត្យជាក់ស្តែង និងរកដំណោះស្រាយសមស្រប ជូនដល់ប្រជាកសិករនៅទីនោះ។ បើតាមក្រសួងកសិកម្ម មូលហេតុដែលធ្វើឲ្យតម្លៃស្រូវនៅខេត្តបាត់ដំបង និងខេត្តបន្ទាយមានជ័យធ្លាក់ចុះ ដោយសារពេញមួយខែវិច្ឆិការហូតដល់ពាក់កណ្តាលខែធ្នូ គឺជាពេលវេលាប្រមូលផលស្រូវរដូវវស្សា ជាពិសេសប្រភេទស្រូវផ្ការំដួល ជាហេតុធ្វើឲ្យរោងម៉ាស៊ីនកិនស្រូវកំពុងកកស្ទះ និងជះឥទ្ធិពលដល់ថ្លៃស្រូវ ដូចកាលពីឆ្នាំកន្លងទៅ។
សម្រាប់លោក ថេង សាវឿន ប្រធានសមាគមសម្ព័ន្ធកសិករកម្ពុជាវិញ ថាបញ្ហានេះ ក្រសួងកសិកម្មមិនអាចដោះស្រាយបាននោះទេ។ ការដោះស្រាយបញ្ហាស្រូវធ្លាក់ថ្លៃនេះ ត្រូវធ្វើជាលក្ខខណៈយុទ្ធសាស្រ្ត និងជាលក្ខខណៈប្រព័ន្ធ គឺរដ្ឋត្រូវគិតគូក្នុងការបង្កើនថវិកាជាតិគាំទ្រវិស័យកសិកម្ម ដោយផ្ដល់ថវិកានេះទៅរោងម៉ាស៊ិនកិនស្រូវ ឬអ្នករកស៊ីកែឆ្នៃស្រូវ ដើម្បីឲ្យទិញស្រូវពីប្រជាកសិករក្នុងតម្លៃសមស្របអាចទទួលយកបាន។ ក៏ប៉ុន្តែប្រសិនបើទីផ្សារពឹងអាស្រ័យទៅលើប្រទេសជិតខាង និងឈ្មួញរកស៊ីទេ នោះបញ្ហានេះមិនអាចដោះស្រាយបានឡើយ។
ប្រធានសមាគមសម្ព័ន្ធកសិករកម្ពុជារូបនេះបញ្ជាក់ថា បើក្រសួងមិនអាចដោះស្រាយបញ្ហាស្រូវធ្លាក់ថ្លៃបានទេ នោះប្រជាកសិករនឹងអស់សង្ឃឹម ហើយអាចបោះបង់មុខរបរធ្វើស្រូវលក់ ងាកមកប្រកបមុខរបរផ្សេង។ បញ្ហានេះ ក៏អាចធ្វើឲ្យប៉ះពាល់ខ្សែសង្វាក់ផលិតកសិកម្មក្នុងការនាំចេញស្រូវអង្ករទៅថ្ងៃខាងមុខ និងអាចនាំចូលអង្ករមកវិញ ដោយសារកង្វះការផ្គត់ផ្គង់ក្នុងស្រុក ហើយបញ្ហានេះដូចទៅនឹងបញ្ហាការនាំចូលអំបិលយ៉ាងដូច្នោះដែរ ដោយសារយន្តការដោះស្រាយនៅមានកម្រិត។
យ៉ាងណាក៏ដោយក្រសួងកសិកម្មក៏បានបញ្ជាក់ថា ទោះបីឆ្នាំនេះដំណាំស្រូវត្រូវរងផលប៉ះពាល់ដោយសារទឹកជំនន់ក៏ដោយ ក៏ការប្រមូលផលនៅតែមានច្រើន និងសម្រុកធ្វើឡើងព្រមៗគ្នាចាប់ពីដើមខែវិច្ឆិកាមក។ បើតាមក្រសួងកសិកម្ម នៅខេត្តបាត់ដំបង និងខេត្តបន្ទាយមានជ័យ រោងម៉ាស៊ីនកិនស្រូវច្រើនកំពុងមមាញឹកក្នុងការប្រមូលទិញសម្ងួត និងកិនស្រូវប្រភេទផ្ការំដូលនេះ ទៅតាមសមត្ថភាព និងលទ្ធភាពរៀងៗខ្លួន។ ជាងនេះទៅទៀត ក្រសួងក៏បានស្នើឲ្យកសិករដែលជួបបញ្ហាជាក់ស្តែងទាក់ទងផ្ទាល់ទៅក្រុមការងារក្រសួង ដើម្បីឲ្យក្រុមការងារទទួលព័ត៌មានពេញលេញ និងធ្វើការសម្របសម្រួលជាមួយរោងម៉ាស៊ីនកិនស្រូវនៅក្នុងតំបន់នោះ។
ក្រសួងកសិកម្មក៏បានអំពាវនាវដល់ពលរដ្ឋក្នុងបណ្តាញសង្គមបញ្ឈប់នូវការបង្ហោះព័ត៌មានមិនពិតដែលថា ក្រសួងមិនអើពើជួយដោះស្រាយជូនដល់ប្រជាកសិករផងដែរ។ ក្រសួងសង្កត់ធ្ងន់ថា ការបង្ហោះព័ត៌មានបែបនេះ ធ្វើឲ្យមានការភ័យបារម្ភដល់ប្រជាកសិករ ដែលមិនទាល់ដល់ពេលប្រមូលផល ឲ្យប្រញាប់ច្រូតស្រូវមិនទាន់គ្រប់គុណភាពដើម្បីលក់ បណ្តាលឲ្យថ្លៃស្រូវកាន់តែធ្លាក់ចុះថែមទៀត។
សូមបញ្ជាក់ថា បញ្ហាតម្លៃស្រូវចុះថោកនារដូវប្រមូលផលនេះ មិនមែនជារឿងថ្មីឡើយសម្រាប់ប្រជាកសិករ ខណៈការដោះស្រាយមិនមានភាពប្រសើរទាល់តែសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ