CAO នឹងចាត់វិធានការលើគ្រឹះស្ថានមីក្រូហិរញ្ញវត្ថុនិងធនាគារចំនួន៦ លើការរំលោភស្ដង់ដារសាជីវកម្មហិរញ្ញវត្ថុអន្តរជាតិ
ការិយាល័យភាពអនុលោម ទីប្រឹក្សាដោះស្រាយវិវាទ (CAO) នៃសាជីវកម្មហិរញ្ញវត្ថុអន្តរជាតិ នឹងចាត់វិធានការទៅលើគ្រឹះស្ថានមីក្រូហិរញ្ញវត្ថុ និងធនាគារចំនួន៦នៅកម្ពុជា ពីការរំលោភបំពានទៅលើស្តង់ដារអនុវត្តរបស់សាជីវកម្មហិរញ្ញវត្ថុអន្តរជាតិក្នុងការផ្តល់កម្ចីឥណទានខ្នាតតូចនៅកម្ពុជា។ ពីខាងធនាគារមកវិញ បានច្រានចោលចំពោះការចោទប្រកាន់នេះ។
ចុះផ្សាយនៅថ្ងៃ៖
ស្តាប់ - ០២:១២
តាមសេចក្ដីថ្លែងការណ៍រួមរបស់អង្គការលីកាដូ និងអង្គការសមធម៌កម្ពុជា បានឱ្យដឹងថា ការិយាល័យភាពអនុលោម ទីប្រឹក្សាដោះស្រាយវិវាទ (CAO) នៃសាជីវកម្មហិរញ្ញវត្ថុអន្តរជាតិ នឹងអនុលោមទៅតាមច្បាប់លើពាក្យបណ្ដឹងទៅលើ គ្រឹះស្ថានមីក្រូហិរញ្ញវត្ថុ និងធនាគារចំនួន៦នៅកម្ពុជា ដែលពាក់ព័ន្ធនឹងបញ្ហាពលកម្មកុមារ ការរំលោភសិទ្ធិដីធ្លីរបស់ជនជាតិដើមភាគតិច និងរំលោភបំពានទៅលើបទដ្ឋានអនុវត្តស្តង់ដាររបស់សាជីវកម្មហិរញ្ញវត្ថុអន្តរជាតិមួយចំនួនទៀត។ ការឈានដល់ដំណាក់កាលអនុលោមទៅតាមច្បាប់នេះ គឺបន្ទាប់ពីម្ចាស់បណ្ដឹងដែលជាអ្នកខ្ចីប្រាក់ និងគ្រឹះស្ថានមីក្រូហិរញ្ញវត្ថុទាំង ៦ មិនអាចរកដំណោះស្រាយលើបញ្ហានេះ។
គ្រឹះស្ថានមីក្រូហិរញ្ញវត្ថុ និងធនាគារទាំងនោះរួមមាន ធនាគារអេស៊ីលីដា ធនាគារហត្ថា ធនាគារស្ថាបនា គ្រឹះស្ថានមីក្រូហិរញ្ញវត្ថុអម្រឹត គ្រឹះស្ថានមីក្រូហិរញ្ញវត្ថុអិលអូអិលស៊ី និងគ្រឹះស្ថានមីក្រូហិរញ្ញវត្ថុប្រាសាក់។
អ្នកនាង ណាលី ពីឡុក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ បានឱ្យដឹងតាមរយៈសេចក្ដីថ្លែងការណ៍ដដែលថា មានការលក់ដីដោយសារការជំពាក់បំណុល កើតឡើងនៅរៀងរាល់១៦នាទីម្តង នៅក្នុងប្រទេសកម្ពុជា។
លោក អៀង វុទ្ធី នាយកប្រតិបត្តិនៃអង្គការសមធម៌កម្ពុជា បានលើកឡើងថា ប្រជាពលរដ្ឋខ្មែររាប់លាននាក់នៅតែកំពុងជាប់ផុងក្នុងវិបត្តិបំណុល ដូច្នេះត្រូវកែទម្រង់ពិតប្រាកដដើម្បីបញ្ចប់ការអនុវត្តបែបកេងប្រវ័ញ្ច និងការរំលោភសិទ្ធិមនុស្ស នៅក្នុងវិស័យនេះ។ នេះបើតាមសេចក្ដីថ្លែងការណ៍របស់អង្គការទាំងពីរ។
ជាការឆ្លើយតប លោកអ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា បានច្រានចោលការចោទប្រកាន់របស់អង្គការទាំងពីរ ដោយលោកចាត់ថាជាព័ត៌មានមិនពិត។ លោកអះអាងថា គ្មានគោលការណ៍ណាមួយដែលអនុញ្ញាតឱ្យសហគ្រាសដែលខ្ចីប្រាក់ពីគ្រឹះស្ថានមីក្រូហិរញ្ញវត្ថុ និងធនាគារ ជំរុញការប្រើពលកម្មកុមារនិងរំភោភបំពានឡើយ។
លោកអ៊ិន ចាន់នី ចាក់ទុករបាយការណ៍ដែលចេញដោយអង្គការទាំងពីរថា ជារបាយការណ៍ដែលបំផ្លាញសុខុមាលភាពហិរញ្ញវត្ថុនៅកម្ពុជាដែលកំពុងបម្រើដល់ការអភិវឌ្ឍប្រទេស។
គួរជម្រាបជូនថា ពាក្យបណ្ដឹងដែលអង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ និងអង្គការសមធម៌កម្ពុជា បានដាក់ទៅការិយាល័យភាពអនុលោម ទីប្រឹក្សាដោះស្រាយវិវាទ(CAO) កាលពីខែកុម្ភៈ ឆ្នាំ២០២២ ទើបបានចេញផ្សាយជាសាធារណៈនៅពេលថ្មីៗកន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ