AFD ផ្ដល់ជំនួយឥតសំណងប្រមាណ ២លានដុល្លារ សម្រាប់ពង្រឹងសមត្ថភាពពាណិជ្ជកម្មក្នុងវិស័យទេសចរណ៍
ទីភ្នាក់ងារបារាំងសម្រាប់ការអភិវឌ្ឍន៍(AFD) បានផ្ដល់ហិរញ្ញប្បទានឥតសំណងប្រមាណ ២លានដុល្លារ ដើម្បីពង្រឹងសមត្ថភាពពាណិជ្ជកម្មក្នុងវិស័យទេសចរណ៍។ AFD ក៏បានផ្ដល់កម្ចីហិរញ្ញប្បទាន ប្រមាណ១២ លានដុល្លារ ដល់គម្រោងសាងសង់សាលាវិជ្ជាជីវៈទេសចរណ៍គឺនៅភ្នំពេញ និងខេត្តព្រះសីហនុ។ នេះបើតាមក្រសួងទេសចរណ៍នៅក្រោយជំនួបជាមួយ AFD កាលពីថ្ងៃទី១៧ វិច្ឆិកា។
ចុះផ្សាយនៅថ្ងៃ៖
ស្តាប់ - ០២:០៩
ទីភ្នាក់ងារបារាំងសម្រាប់ការអភិវឌ្ឍន៍(AFD) បានផ្ដល់ហិរញ្ញប្បទានឥតសំណង ១,៥លានអឺរូ ឬស្មើនឹងប្រមាណ ២លានដុល្លារអាមេរិក ដែលមានគោលដៅពង្រឹងសមត្ថភាពពាណិជ្ជកម្មក្នុងវិស័យទេសចរណ៍ បន្ទាប់ពីកម្ពុជាទទួលផលប៉ះពាល់ក្រោយវិបត្តិជំងឺកូវីដ-១៩។ ជាមួយគ្នានេះ AFD ក៏បានផ្តល់កម្ចីហិរញ្ញប្បទាន ចំនួន ១១លានអឺរ៉ូ ឬប្រហែល ១២លានដុល្លាអាមេរិក ដល់គម្រោងសាងសង់សាលាវិជ្ជាជីវៈទេសចរណ៍ចំនួនពីរ នៅភ្នំពេញ និងនៅខេត្តព្រះសីហនុ។
លោក ថោង ខុន រដ្ឋមន្ត្រីក្រសួងទេសចរណ៍ បានឱ្យដឹងនៅក្នុងជំនួបជាមួយ AFD ថា ការវិនិយោគលើការបង្កើតសាលាជាតិវិជ្ជាជីវៈទាំង២នេះ ចំណាយថវិកាសរុបប្រមាណ២៦,៥លានដុល្លាអាមេរិក។ រដ្ឋមន្ត្រីក្រសួងទេសចរណ៍បញ្ជាក់ថា ថវិកានេះប្រមាណ១២លានដុល្លារអាមេរិក បានពីកម្ចីហិរញ្ញប្បទានឥណទានរបស់ AFD និងប្រមាណជាង ១៤លានដុល្លារទៀតជាថវិកាជាតិរបស់កម្ពុជា។
បើតាមក្រសួងទេសចរណ៍ ការដ្ឋានសាងសង់សាលាជាតិវិជ្ជាជីវៈទេសចរណ៍គ្រោងនឹងចាប់ផ្ដើមដំណើរការនៅថ្ងៃទី២៤ ខែវិច្ឆិកា ឆ្នាំ២០២២ ខាងមុខនេះ។
ជាមួយគ្នានេះ លោកស្រី Boucher Sandrine នាយិកាAFD ជឿជាក់ថាវិស័យទេសចរណ៍កម្ពុជានឹងងើបឡើងយ៉ាងឆាប់រហ័ស ដោយលោកស្រីមើលឃើញពីសក្តានុពលសម្រាប់ការអភិវឌ្ឍន៍។ នាយិកាAFD ដែលទើបត្រូវបានតែងតាំងថ្មីរូបនេះបានកោតសរសើរកម្ពុជាថា មានទាំងធនធានវប្បធម៌ បេតិកភ័ណ្ឌពិភពលោកទាំងរូបី អរូបីទាក់ទាញ ធនធានធម្មជាតិសម្បូរបែប ហើយប្រជាជនមានភាពរស់រាយរាក់ទាក់ និងមានបដិសណ្ឋារកិច្ចល្អ។
លោកស្រីនាយិការបន្ដថា AFD នឹងបន្តគាំទ្រដល់ការបណ្តុះបណ្តាល ពង្រឹងសមត្ថភាពទាំងស្ថាប័ន និងបុគ្គលិកក្នុងវិស័យទេសចរណ៍ ដូចជាការបង្កើតសាលាជាតិវិជ្ជាជីវៈទេសចរណ៍នៅភ្នំពេញ និងនៅខេត្តព្រះសីហនុ។ លោកស្រីក៏បានឱ្យដឹងថា AFD អាចនឹងបន្តជួយក្នុងការបង្កើតសាលាជាតិបន្ថែមនៅតាមបណ្តាខេត្តសក្តានុពលដ៏ទៃទៀតនៅកម្ពុជា។
គួរជម្រាបជូនថា ក្នុងរយៈពេល៩ខែ ឆ្នាំ២០២២ កម្ពុជាទទួលបានភ្ញៀវទេសចរអន្តរជាតិជាង១លាន២០ម៉ឺននាក់ កើនឡើង៨៦១% បើធៀបនឹងរយៈពេលដូចគ្នានៅឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ