លោក ស ខេង៖ បទល្មើសជួញដូរមនុស្ស និងគ្រឿងញៀនពិបាកស្រាវជ្រាវ បើមានមន្រ្តីពាក់ព័ន្ធ
លោក ស ខេង រដ្ឋមន្រ្តីក្រសួងមហាផ្ទៃ បានបញ្ជាក់ថា បទល្មើសគ្រឿងញៀន បញ្ហាជួញដូរមនុស្ស និងបទល្មើសផ្សេងៗទៀត បើគ្មានមន្រ្តីជាប់ពាក់ព័ន្ធទេ បញ្ហាទាំងនេះគឺងាយស្រួលដោះស្រាយបំផុត។ លោក ស ខេង បានត្អូញត្អែរថា ពិបាកស្រាវជ្រាវណាស់ បើមានមន្រ្តីជាប់ពាក់ព័ន្ធ ព្រោះបើមានជាប់ពាក់ព័ន្ធ ការដោះស្រាយ គឺផ្អែកតាមអារម្មណ៍ មិនបានផ្អែកតាមគោលការណ៍ច្បាប់នោះទេ។
ចុះផ្សាយនៅថ្ងៃ៖
ស្តាប់ - ០២:២០
ក្នុងពិធីប្រកាសចូលកាន់មុខតំណែងអភិបាលនៃគណៈអភិបាលខេត្តពោធិ៍សាត់ កាលពីថ្ងៃទី២១វិច្ឆិកា លោក ស ខេង បានលើកឡើងថា ឧក្រិដកម្មឆ្លងដែន និងបញ្ហាជួញដូរមនុស្ស ពួកឧក្រិដជន និងមេខ្លោងបានយកកម្ពុជា ជាកន្លែងសម្រាប់ប្រព្រឹត្តបទល្មើសទាំងនេះ។ លោកបញ្ជាក់ថា ខេត្តព្រះសីហនុ ជាកន្លែងក្រុមឧក្រិដជនបានកាច់សំបុកនៅទីនោះ ប្រព្រឹត្តបទល្មើសជួញដូរមនុស្ស តែឥលូវត្រូវបានបង្រ្កាប ដោយមេខ្លោងខ្លះរត់ចេញពីខេត្តព្រះសីហនុ ទៅសម្ងំនៅតាមខេត្តផ្សេងៗដើម្បីប្រព្រឹត្តបទល្មើសតទៅទៀត។
រដ្ឋមន្រ្តីក្រសួងមហាផ្ទៃ បានព្រមានថា នៅព្រំដែនថ្មដា ខេត្តពោធិ៍សាត់ ក៏ជាគោលដៅនៃក្រុមពួកឧក្រិដជន ប្រព្រឹត្តបទល្មើសជួយដូរមនុស្សដែរ ដូច្នេះបើមិនបង្រ្កាបចាប់ពីឥលូវទេ នៅព្រំដែនថ្មដា ខេត្តពោធិ៍សាត់ នឹងក្លាយជាកន្លែងរបស់ក្រុមឧក្រិដ្ឋជនកាច់សំបុក ប្រព្រឹត្តបទល្មើសជួញដូរមនុស្ស ដូចខេត្តព្រះសីហនុដែរ។ ជាមួយគ្នា លោក ស ខេង ក៏បានអំពាវនាវកុំឲ្យមន្រ្តីជាប់ពាក់ព័ន្ធក្នុងរឿងនេះឲ្យសោះ។ លោកថាបើមានមន្រ្តីជាប់ពាក់ព័ន្ធ ពិបាកស្រាវជ្រាវណាស់ តែបើមន្រ្តីមិនជាប់ពាក់ព័ន្ធទេ បញ្ហានេះនឹងងាយស្រួលដោះស្រាយជាទីបំផុត។
យ៉ាងណាក៏ដោយពាក់ព័ន្ធបញ្ហាអំពើជួញដូរមនុស្ស និងឧក្រិដកម្មឆ្លងដែន ដែលក្រុមឧក្រិដជនអាចប្រព្រឹត្តនៅកម្ពុជាបាន ត្រូវសង្គមស៊ីវិល និងអ្នកឃ្លាំមើលលើកឡើងថា ករណីនេះ អាចជាប់ពាក់ព័ន្ធនឹងអំពើពុករលួយ ជុំវិញការអនុវត្តច្បាប់របស់កម្ពុជា។ ពួកគេបានផ្ដល់យោបល់ថា ដើម្បីដោះស្រាយបញ្ហាជួញដូរមនុស្សឲ្យមានប្រសិទ្ធភាព រដ្ឋាភិបាលត្រូវពង្រឹងការអនុវត្តច្បាប់ ដូចជាការរឹតបន្តឹងតាមព្រំដែនចំពោះជនបរទេសដែលចូលមកកម្ពុជា និងមានកិច្ចសហការជាមួយបណ្ដាប្រទេសជាដៃគូជាដើម។
សូមបញ្ជាក់ថា ពាក់ព័ន្ធបញ្ហាជួញដូរមនុស្សនេះ របាយការណ៍ប្រចាំឆ្នាំរបស់ក្រសួងការបរទេសអាមេរិក បង្ហាញថា កម្ពុជាបានធ្លាក់ទៅកម្រិតទី៣ ឬបញ្ជីខ្មៅ នៃសកម្មជួញដូរមនុស្សប្រចាំឆ្នាំ២០២២។ ក្រោយពីអាមេរិកចេញរបាយការណ៍ទម្លាក់កម្ពុជាទៅកម្រិតទី៣ ឬបញ្ជីខ្មៅ នៃសកម្មជួញដូរមនុស្ស រដ្ឋាភិបាលតាមរយៈក្រសួងមហាផ្ទៃ និងគណៈកម្មាធិការប្រយុទ្ធប្រឆាំងនឹងអំពើជួញដូរមនុស្ស បានចេញប្រតិបត្តិការបង្រ្កាប ដោយបានចាប់ខ្លួនមេខ្លោង និងអ្នកពាក់ព័ន្ធមួយចំនួន ហើយជួយសង្រ្គោះមនុស្សបានជាច្រើននាក់ពីការជួញដូរនេះ ខណៈប្រតិបត្តិនេះបានចាប់ផ្ដើមធ្វើនៅខេត្តព្រះសីហនុ និងខេត្តដទៃទៀតជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ