AIPA បញ្ចប់ដោយការរួមគ្នាជម្រុញភូមាឱ្យអនុវត្តក្រមប្រតិបត្តិ ៥ចំណុចរបស់អាស៊ាន
មហាសន្និបាតអន្តរសភាអាស៊ាន ហៅកាត់ថា AIPA លើកទី ៤៣ បានបញ្ចប់ហើយ ដោយគ្រប់ភាគីចូលរួមក្នុងកិច្ចប្រជុំ បានលើកការពិភាក្សាដោយ បន្តជម្រុញឱ្យមានការអនុវត្តក្រមប្រតិបត្តិ ៥ចំណុចរបស់អាស៊ាន ចំពោះដំណោះស្រាយនៅភូមា។ ជាមួយគ្នា មហាសន្និបាតដែលធ្វើឡើងនៅទីក្រុងភ្នំពេញ ពីថ្ងៃទី ២០ ដល់ថ្ងៃទី ២៥ខែវិច្ឆិកានេះ ក៏មានការរៀបចំកិច្ចប្រជុំសំខាន់ៗ ដើម្បីបង្កើតការទូតសភាសន្តិភាពផងដែរ។
ចុះផ្សាយនៅថ្ងៃ៖
ស្តាប់ - ០១:៥៥
បញ្ហាភូមា នៅតែជាបច្ចុប្បន្នដែលគ្រប់ភាគីចូលរួមក្នុងមហាសន្និបាតអន្តរសភាអាស៊ាន អាយប៉ា លើកទី ៤៣ យកមកពិភាក្សាគ្នា ក្រោមមូលបទ «បោះជំហានជាមួយគ្នា ដើម្បីនិរន្តរភាព បរិយាប័ន្ន និងភាពធន់របស់អាស៊ាន»។ ការពិភាក្សានេះ បានញុំាងឲ្យកិច្ចប្រជុំបានអនុម័ត ដាក់បញ្ចូលសេចក្តីសម្រេចចិត្តបន្ទាន់ដែលស្នើដោយឥណ្ឌូនេស៊ី ស្តីពីការជម្រុញឱ្យមានការអនុវត្តក្រមប្រតិបត្តិ ៥ចំណុចរបស់អាស៊ាន ចំពោះដំណោះស្រាយនៅភូមា ទៅក្នុងរបៀបវារៈនៃគណៈកម្មាធិការនយោបាយ ទោះបីសភាភូមា មិនបានចូលរួមក្នុងមហាសន្និបាតនេះក៏ដោយ។
ក្រៅពីនេះ ក្រោយកិច្ចប្រជុំ ភាគីទាំងអស់ បានឯកភាពគ្នា ក្នុងការពង្រឹងប្រព័ន្ធពហុភាគីនិយមឡើងវិញ ឱ្យកាន់តែមានភាពបើកចំហ និងផ្អែកលើច្បាប់។ ហើយមហាសន្និបាតលើកនេះ ក៏បានអនុម័តប្រគល់តំណែងប្រធានអាយប៉ាលើកទី ៤៤ ដល់សភាឥណ្ឌូនេស៊ី ចាប់ពីពេលនេះ ខណៈមហាសន្និបាតលើកក្រោយ នឹងធ្វើនៅខែសីហា ឆ្នាំ ២០២៣។
នៅក្នុងសន្និសីទកាសែតបញ្ចប់មហាសន្តិបាតអន្តរសភា អាយប៉ា នាថ្ងៃទី ២៤ខែវិច្ឆិកា លោក សួស យ៉ារ៉ា ប្រធានគណៈកម្មការកិច្ចការបរទេសសហប្រតិបត្តិការ ឃោសនា និងព័ត៌មាននៃរដ្ឋសភាជាតិកម្ពុជា បានលើកឡើងថា ការរៀបចំមហាសន្តិបាតអន្តរសភានេះ គឺដើម្បីបង្កើតការទូតសភាសន្តិភាព ខណៈសន្ទុះនៃការប្រកួតប្រជែងក្នុងភូមិសាស្ត្រនយោបាយ កំពុងកើតមានខ្លាំង។ ដូច្នេះហើយ ទើបការទូតសភា មានភាពចាំបាច់ក្នុងទំនាក់ទំនង ជាមួយកិច្ចប្រជុំកំពូលរបស់ប្រមុខរដ្ឋ នៃប្រមុខរដ្ឋាភិបាលប្រទេសអាស៊ាន ដើម្បីបំពេញគ្នាទៅវិញ ទៅមក។
សូមបញ្ជាក់ថា មហាសន្និបាតអន្តរសភាអាស៊ាន អាយប៉ា លើកទី ៤៣មានតែប្រទេសអាស៊ានចំនួន ៨ក្នុងចំណោម ១០ប៉ុណ្ណោះចូលរួម។ ភាគីអវត្តមាន គឺម៉ាឡេស៊ី និងភូមា ដោយហេតុផលគឺភូមា មិនមាននីតិសម្បទា សម្រាប់ការចូលរួមក្នុងមហាសន្និបាត ខណៈសភាម៉ាឡេស៊ី កំពុងស្ថិតក្នុងដំណើរការបោះឆ្នោតរៀបចំសភាអណត្តិថ្មី។ ប៉ុន្តែក្រៅពីអាស៊ាន មហាសន្និបាតក៏មានការចូលរួមពីសភាសង្កេតការណ៍របស់សភា ៤ប្រទេស ព្រមទាំងបណ្តាសភាមិនចូលបក្សសម្ព័ន្ធ និងសភាសហគមន៍អឺរុប ដែលជាសរុបមានប្រតិភូប្រមាណជាង ៤០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ