កម្ពុជាដាក់ផែនការនាំចេញអង្ករឱ្យបាន ៧៥ម៉ឺនតោននៅឆ្នាំ២០២៣ និង ១លានតោននៅឆ្នាំ២០២៥
សហព័ន្ធស្រូវអង្ករកម្ពុជាដាក់ផែនការនាំចេញអង្ករឱ្យបាន ៧៥ម៉ឺនតោននៅឆ្នាំ២០២៣ និង១លានតោននៅឆ្នាំ២០២៥។ នេះបើតាមសេចក្ដីប្រកាសព័ត៌មានរបស់សហព័ន្ធស្រូវអង្ករកម្ពុជា ក្រោយសន្និបាតបូកសរុបការងារឆ្នាំ២០២២ និងលើកទិសដៅការងារឆ្នាំ២០២៣ កាលពីថ្ងៃទី២៣ វិច្ឆិកា។ សមាគមសម្ព័ន្ធកសិករកម្ពុជាមើលឃើញថា ផែនការនេះអាចសម្រចទៅបានលុះត្រាតែមានការចូលរួមអនុវត្តពីកសិករ។
ចុះផ្សាយនៅថ្ងៃ៖
ស្តាប់ - ០២:០៦
សហព័ន្ធស្រូវអង្ករកម្ពុជាបានដាក់ចេញនូវផែនការគោលសម្រាប់ឆ្នាំ២០២៣-២០២៥ ជំរុញការនាំចេញដោយរៀបចំផែនការយុទ្ធសាស្ត្រទីផ្សារគោលដៅស្របតាមប្រភេទពូជស្រូវ និង អង្ករ។ ក្នុងផែនការនាំចេញនេះ សហព័ន្ធស្រូវអង្ករកម្ពុជាបានកំណត់បរិមាណនាំចេញអង្ករឱ្យបាន ៧៥ម៉ឺនតោននៅឆ្នាំ២០២៣ និង១លានតោនៅឆ្នាំ២០២៥។ ក្នុងផែនការបានកំណត់ឱ្យការនាំចេញក្រោមរូបភាពក្រុមហ៊ុនឯកជននីមួយៗ និងក្រុមហ៊ុនរួមគ្នា (CRF-EXPORT CONS ORIUM) ដែលនាំចេញក្នុងបរិមាណទ្រង់ទ្រាយធំ។ នេះបើតាមសេចក្ដីប្រកាសព័ត៌មានរបស់សហព័ន្ធស្រូវអង្ករកម្ពុជា។
លោក ថេង សាវឿន ប្រធានសមាគមសម្ព័ន្ធកសិករកម្ពុជា(CCFC) បានលើកឡើងថា ផែនការនាំចេញអង្ករនេះអាចសម្រេចទៅបាន លុះត្រាតែមានការជជែកពិភាក្សា និងរៀបចំយុទ្ធសាស្ត្រច្បាស់លាស់ និងមានការចូលរួមពីកសិករនិងប្រជាពលរដ្ឋ។ លោកបន្ដថា ផែនការនេះអាចនឹងបរាជ័យ ប្រសិនបើប្រជាពលរដ្ឋមិនបានយល់ដឹងពីយុទ្ធសាស្ត្រនៃនាំចេញឱ្យបានច្បាស់លាស់។
យ៉ាងណាមិញ ក្នុងផែនការគោលសម្រាប់ឆ្នាំ២០២៣-២០២៥ សហព័ន្ធស្រូវអង្ករកម្ពុជាក៏បាន ដាក់ផែនការពង្រឹងអភិបាលកិច្ចរបស់ខ្លួនឱ្យកាន់តែប្រសើរឡើងប្រកបដោយការទទួលខុសត្រូវ និងគណនេយ្យភាព។ សហព័ន្ធស្រូវអង្ករកម្ពុជា ក៏មានផែនការជំរុញផលិតកម្មពូជស្រូវ ដោយបន្តនិងចូលរួមសហការជាមួយក្រសួងកសិកម្ម ដើម្បីជំរុញការផលិត និងចែកចាយពូជស្រូវដល់កសិករ និងធ្វើកិច្ចសន្យាកសិកម្មសម្រាប់ធានាបាននូវតម្លៃស្រូវផងដែរ។
តាមសេចក្ដីប្រកាសព័ត៌មានដដែល សហព័ន្ធស្រូវអង្ករកម្ពុជាបានដាក់ផែនការការស្រាវជ្រាវ និងអភិវឌ្ឍន៍ ដោយរៀបចំឱ្យមានមូលនិធិឯកជនរបស់សហព័ន្ធស្រូវអង្ករកម្ពុជាបន្ថែម សម្រាប់ស្រាវជ្រាវ អភិវឌ្ឍន៍លើប្រភេទពូជស្រូវ ដែលអាចឆ្លើយតបនិងការប្រែប្រួលអាកាសធាតុ ទីផ្សារ និងទិន្នផល។
គួរជម្រាបជូនថា គិតត្រឹមថ្ងៃទី១៧ ខែវិច្ឆិកា ឆ្នាំ២០២២ ធនាគារអភិវឌ្ឍន៍ជនបទ និងកសិកម្ម បានផ្តល់ឥណទានចំនួន ១៦១លានដុល្លារសហរដ្ឋអាមរិក សម្រាប់ការសាងសង់ឃ្លាំង ឡសម្ងួតស្រូវ និងឥណទានជាទុនបង្វិលក្នុងការទិញស្រូវ។ ហើយថ្មីៗនេះ រដ្ឋាភិបាលក៏បានបន្ថែមថវិកាចំនួន ១០លានដុល្លារអាមេរិក សម្រាប់អន្តរាគមន៍ដល់រោងម៉ាស៊ីនកិនស្រូវ និងក្រុមហ៊ុនកែច្នៃនាំចេញអង្ករ ក្នុងការប្រមូលទិញស្រូវពីប្រជាកសិករ តាមតម្លៃសមស្រប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ