ក្រុមអង្គការសង្គមស៊ីវិលស្នើក្រសួងកសិកម្មដោះស្រាយបញ្ហាព្រៃឈើ
ក្រុមសមាគមនិងអង្គការក្រៅរដ្ឋាភិបាល នៅថ្ងៃទី២៨ ខែវិច្ឆិកានេះ បានស្នើទៅក្រសួងកសិកម្មចំនួន ៦ ចំណុច ដើម្បីជំរុញឱ្យការពារព្រៃឈើ ជលផល និងគ្រប់គ្រងដីសម្បទានសេដ្ធកិច្ច។ នេះបើតាមលិខិតចំហមួយទៅកាន់ក្រសួងកសិកម្ម។ ការស្នើនេះធ្វើឡើងបន្ទាប់ពីមានមានបញ្ហាកាប់ព្រៃឈើ បញ្ហាគ្រប់គ្រងដីសម្បទានសេដ្ឋកិច្ច ការប្រមាញ់ និងការជួញដូរសត្វព្រៃជាដើម ខណៈដែលក្រសួងកំពុងដោះស្រាយបញ្ហាកសិកម្ម។
ចុះផ្សាយនៅថ្ងៃ៖
ស្តាប់ - ០២:០៧
សមាគមអង្គការមិនមែនរដ្ឋាភិបាល សហជីព សហគមន៍មូលដ្ឋាន និងក្រុមយុវជន បានស្នើឱ្យក្រសួងកសិកម្មពង្រឹង ការអនុវត្តច្បាប់ឱ្យបានម៉ឺងម៉ាត់ និងមានយុត្តិធម៌ពេញលេញ ក្នុងការទប់ស្កាត់សកម្មភាពកាប់បំផ្លាញព្រៃឈើ ការទន្ទ្រានដីព្រៃលិចទឹក ការនេសាទ ការប្រមាញ់ និងការជួញដូរសត្វព្រៃខុសច្បាប់។ នេះបើតាមលិខិតចំហមួយទៅកាន់ក្រសួងកសិកម្ម។
ក្រុមសមាគមនិងអង្គការសង្គមស៊ីវិលនេះក៏បានស្នើឱ្យមានការត្រួតពិនិត្យទីផ្សារ និងភោជនីយដ្ឋានដែលពាក់ព័ន្ធនឹងការជួញដូរ ឬលក់សាច់សត្វខុសច្បាប់ ព្រមទាំងស្នើឱ្យមានការស៊ើបអង្កេតពីការរត់ពន្ធឈើខុសច្បាប់។
បើតាមលិខិតដដែល ពួកគេបានស្នើសុំឱ្យមានការត្រួតពិនិត្យ វាយតម្លៃបណ្តាក្រុមហ៊ុនដីសម្បទានសេដ្ឋកិច្ច នៅជុំវិញតំបន់ការពារធម្មជាតិ។ ពួកគេស្នើឱ្យរដ្ឋាភិបាល ពន្លឿនការផ្ដល់ដំណោះស្រាយ ឬត្រូវធ្វើការដកកិច្ចព្រមព្រៀង និងអាជ្ញាប័ណ្ណ ក្នុងករណីរកឃើញមានក្រុមហ៊ុនដីសម្បទានសេដ្ឋកិច្ចណាមួយជាប់ពាក់ព័ន្ធទៅនឹងការកាប់បំផ្លាញ ដឹកជញ្ជូន និងការជួញដូរឈើខុសច្បាប់ ចេញពីតំបន់ការពារធម្មជាតិទាំងនោះ។
ក្រុមសមាគមនិងអង្គការក្រៅរដ្ឋាភិបាល ចង់ឱ្យមានការធ្វើអធិការកិច្ចលើមន្ត្រីដែលមានភារកិច្ចនៅតាមគោលដៅដែលមានបទល្មើសព្រៃឈើ នេសាទ និងការទន្ទ្រានយកដីរដ្ឋដោយខុសច្បាប់ កន្លងមក ឱ្យទទួលខុសត្រូវ លើភាពធ្វេសប្រហែសនៃការបំពេញមុខងារសាធារណៈរបស់ខ្លួន។
បន្ថែមពីនេះ សហគមន៍ព្រៃឈើ សហគមន៍នេសាទ សហគមន៍ជនជាតិដើមភាគតិច សហគមន៍មូលដ្ឋានត្រូវការការគាំទ្រទាំងធនធាន ហិរញ្ញវត្ថុបន្ថែម និងបច្ចេកទេស ដើម្បីការពារធនធានធម្មជាតិ ព្រៃឈើ ជលផល និងសត្វព្រៃជាទៀតទាត់យ៉ាងសកម្ម។
គួរជម្រាបជូនថា ក្នុងរយៈពេល២០ឆ្នាំចុង ក្រោយនេះ កម្ពុជាបាត់បង់គម្របព្រៃឈើប្រមាណ ១១,៧៤% ខណៈមានការរកឃើញមានក្រុមហ៊ុនដីសម្បទានសេដ្ឋកិច្ចមួយចំនួនពាក់ព័ន្ធនឹងសកម្មភាពកាប់បំផ្លាញ និងធ្វើអាជីវកម្មឈើខុសច្បាប់។ នេះបើតាមការលើកឡើងរបស់ក្រុមសមាគមនិងអង្គការក្រៅរដ្ឋាភិបាល។ គម្រប់ព្រៃឈើបានធ្លាក់ចុះពី ៥៨,៦% នៅឆ្នាំ១៩៩៦ មកត្រឹមតែ ៤៦,៨៦% នៅត្រឹមឆ្នាំ ២០១៨។ ក្រសួងកសិកម្មមិនទាន់មានការធ្វើអត្ថាធិបាយយ៉ាងណានៅឡើយទេជុំវិញសំណើរនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ