លោក យ៉ង សាំងកុមារ ត្រូវការពេល៥ឆ្នាំដើម្បីជួយកសិករជាង១លានគ្រួសារឲ្យមានភាពប្រសើរឡើង
ក្រោយពីមានលិខិតប្រកាសចុះចូលជាមួយគណបក្សប្រជាជនកម្ពុជា លោក យ៉ង សាំងកុមារ អតីតប្រធានគណៈកម្មាធិការប្រតិបត្តិនៃគណបក្សប្រជាធិបតេយ្យមូលដ្ឋាន បានលើកគម្រោងថ្មីមួយដើម្បីជួយដោះស្រាយបញ្ហារបស់កសិករ។ គម្រោងថ្មីរបស់បណ្ឌិតកសិកម្មរូបនេះ គឺប្រើពេល៥ឆ្នាំ ដើម្បីជួយគ្រួសារកសិករខ្មែរជាង១លានគ្រួសារឲ្យមានភាពល្អប្រសើរឡើង។
ចុះផ្សាយនៅថ្ងៃ៖
ស្តាប់ - ០២:៥៦
ដោយទទួលស្គាល់ថា កសិករខ្មែរដែលភាគច្រើនបំផុតជាកសិករអ្នកធ្វើស្រែកំពុងជួបការលំបាកដែលបញ្ហានេះនាំមកនូវផលប៉ះពាល់អវិជ្ជមានដល់សង្គមជាតិទាំងមូល លោកយ៉ង សាំងកុមារ អះអាងថា បញ្ហានេះត្រូវការសហការគ្នាដើម្បីចូលរួមដោះស្រាយបញ្ហាកសិករតាមគោលការណ៍ទុក្ខវេទនារបស់កសិករជាទុក្ខវេទនារបស់ជាតិទាំងមូល។
ការលើកឡើងនេះ គឺជាការប្រកាសបញ្ជាក់ថា លោកបានទៅចូលរួមជីវភាពនយោបាយជាមួយគណបក្សប្រជាជនកម្ពុជាកំពុងកាន់អំណាច។
អតីតប្រធានគណៈកម្មាធិការប្រតិបត្តិនៃគណបក្សប្រជាធិបតេយ្យមូលដ្ឋានលោក យ៉ង សាំងកុមារ លើកជាសំណើរចំនួន១២ ចំណុចដែលត្រូវពិភាក្សា និងទទួលឯកភាពជាផ្លូវការពីរដ្ឋាភិបាលក្នុងការដោះស្រាយបញ្ហាផលិតកម្ម និងទីផ្សារស្រូវអង្ករ ដែលនេះគឺជាអ្វីដែលលោកបញ្ជាក់ថាជាមូលហេតុដែលលោកសម្រេចចិត្តចូលរួមជាមួយរដ្ឋាភិបាលធ្វើកិច្ចការនេះ។
បើតាមបណ្ឌិតផ្នែកកសិកម្មរូបនេះ ការអនុវត្តសំណើទាំង១២ ចំណុចនេះបានជោគជ័យគឺអាចជួយដោះស្រាយបញ្ហាជូនគ្រួសារកសិករខ្មែរជាង ១លានគ្រួសារបានល្អប្រសើរ។
នៅក្រោមគម្រោង«សង្វាក់ផលិតកម្ម និងទីផ្សារស្រូវអង្ករកម្ពុជា» លោក យ៉ង សាំងកុមារលើកឡើងថា កសិករមានសមត្ថភាពផលិតស្រូវដែលមានគុណភាពល្អ សម្រាប់ផ្គត់ផ្គង់ទីផ្សារ ជាមួយថ្លៃដើមទាប និងទទួលបានតម្លៃសមរម្យ ខណៈរោងម៉ាស៊ីនកិនស្រូវទទួលបានស្រូវល្អក្នុងតម្លៃសមរម្យ សម្រាប់កែច្នៃលក់មកកាន់ទីផ្សារក្នុងស្រុក និងក្រៅប្រទេស។
ប៉ុន្តែដើម្បីអន្តរាគមន៍លើគម្រោងលោកលើកឡើងថា ត្រូវពង្រឹង និងពង្រីកការស្រាវជ្រាវផលិត និងផ្គត់ផ្គង់គ្រាប់ពូជស្រូវសុទ្ធល្អ ដល់កសិករ។ បណ្ដុះបណ្ដាលដល់កសិករ ជាពិសេសលើការប្រើប្រាស់ពូជ ធាតុចូល និងការគ្រប់គ្រងក្រោយពេលប្រមូលផល។ រៀបចំឲ្យមានប្រព័ន្ធគ្រប់គ្រងទិន្នន័យកសិករអ្នកផលិតស្រូវ ដោយធ្វើបច្ចុប្បន្នភាពរាល់រដូវ។ រៀបចំឲ្យមាន និងពង្រឹងសហគមន៍កសិករអ្នកផលិតនៅតាមភូមិ ឃុំ ដោយមានកន្លែងប្រមូលផ្ដុំ កន្លែងសម្ងួត និងឃ្លាំងស្តុកស្រូវ។ រៀបចំឲ្យមានប្រព័ន្ធទិន្នន័យរោងម៉ាស៊ីនស្រូវ ដោយសហការណ៍ជាមួយ CRF។ ធ្វើកិច្ចសន្យារវាងសហគមន៍កសិករនិងរោងម៉ាស៊ីនកិនស្រូវ និងក្រុមហ៊ុនជំនួញស្រូវអង្ករ។ កំណត់ស្តង់ដារត្រួតពិនិត្យ និងបញ្ជាក់គុណភាពស្រូវ និងការកំណត់តម្លៃអប្បបរមាស្រូវតាមប្រភេទពូជ។ ធ្វើការជាមួយធនាគារកសិកម្ម និងអភិវឌ្ឍន៍ជនបទ និងស្ថាប័នហិរញ្ញវត្ថុនានា ដើម្បីបង្កើនទុនដល់រោងម៉ាស៊ីន ក្រុមហ៊ុនជំនួញស្រូវអង្ករ និងសហគមន៍កសិករជាដើម។
សូមបញ្ជាក់ថា ការបង្កើតគម្រោងនេះ គឺបន្ទាប់ពីលោក យ៉ង សាំងកុមារ និងលោក ឡឹក សុធា ជាមន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន បានដាក់លិខិតពីរដោយឡែកពីគ្នានៅថ្ងៃទី២៣វិច្ឆិកា សុំចូលរួមជាមួយគណបក្សប្រជាជនកម្ពុជា។
លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋានបានធ្វើសេចក្តីថ្លែងការណ៍ផ្ទាល់មាត់កុំឲ្យអ្នគាំទ្រគណបក្សនេះមានការជ្រួលប្រចល់ ដោយបញ្ជាក់ថា ការចាកចេញរបស់មន្ត្រីជាន់ខ្ពស់ទាំងនេះ គឺដើម្បីទៅជួយវិស័យកសិកម្មដូចអ្វីដែលគណបក្សបានដាក់លិខិតសុំជួបរដ្ឋមន្ត្រីកសិកម្ម នៅថ្ងៃទី១៨វិច្ឆិកា២០២២នោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ