អ្នកវិភាគថា ប្រេសិតពិសេសអាស៊ានទំនងជាមិនទៅភូមាទៀតទេ ក្រោយស្ថានភាពវិវត្តន៍កាន់តែធ្ងន់ជាងមុន
គម្រោងទស្សនកិច្ចជាលើកទី៣របស់ប្រេសិតពិសេសអាស៊ានទៅកាន់ភូមានាចុងឆ្នាំនេះ ស្ថិតក្នុងភាពស្រពិចស្រពិល និងមិនទាន់ច្បាស់ការ។ ក្នុងនោះ អ្នកវិភាគផ្នែកនយោបាយមកពីរាជបណ្ឌិតសភាកម្ពុជាក៏មិនរំពឹងថា កម្ពុជានឹងបញ្ចូនប្រេសិតពិសេសទៅ ភូមានាចុងខែធ្នូនេះដែរ ក៏ព្រោះមើលឃើញថា ស្ថានភាពវិបត្តិនយោបាយនៅប្រទេសដែលដឹកនាំដោយរបបសឹកមួយនេះមិនមានវឌ្ឍនភាពល្អប្រសើរដែលអាស៊ានបានខិតខំដោះស្រាយតាមកិច្ចព្រមព្រៀងជាឯកច្ឆន្ទទាំង៥ចំណុច។
ចុះផ្សាយនៅថ្ងៃ៖
ស្តាប់ - ០២:១៦
លោកបណ្ឌិត យង់ ពៅ អគ្គលេខាធិការនៃអគ្គលេខាធិការដ្ឋានរាជបណ្ឌិត្យសភាកម្ពុជាបានឱ្យដឹងថា កម្ពុជាក្នុងនាមជាប្រធានអាស៊ានដែលជិតផុតអាណត្តិទំនងជាមិនបញ្ចូលលោក ប្រាក់ សុខុន ប្រេសិតពិសេសប្រធានអាស៊ានទៅកាន់ប្រទេសភូមានាចុងឆ្នាំនេះទេ ព្រោះដោយហេតុថា វិបត្តិនយោបាយដ៏រុំាំរ៉ៃនៅក្នុងប្រទេសមួយនេះរឹតតែធ្លាក់ចូលទៅក្នុងវិបត្តិដ៏ធ្ងន់ធ្ងរជាងមុន ហើយកម្ពុជាក៏មិនឃើញមានការវិវត្តន៍ឱ្យល្អប្រសើរស្របតាមកិច្ចខិតខំប្រឹងប្រែងរបស់ប្រធានអាស៊ាន និងបណ្តាសមាជិកផ្សេងទៀត។
លោកបណ្ឌិតបន្តលើកឡើងហេតុផលមួយទៀតដែលប្រេសិតពិសេសអាស៊ានអាចនឹងមិនធ្វើដំណើរទស្សនកិច្ចទៅភូមា នោះគឺការកាត់ទោសប្រហារជីវិតដល់និសិត្សចំនួន៧នាក់នាពេលថ្មីនេះ ហើយនេះអាចជាហេតុផលចម្បងដែលបង្អាក់ការសម្រេចចិត្តរបស់ប្រធានអាស៊ាន។
តែយ៉ាងណា អ្នកវិភាគភូមិសាស្ត្រនយោបាយរូបនេះយល់ថា ការមិនទៅភូមាជាលើកចុងក្រោយរបស់ប្រេសិតពិសេសអាស៊ាន មិនមែនឆ្លុះបញ្ចាំងថា កម្ពុជាបោះបង់កិច្ចខិតខំប្រឹងប្រែងរបស់ខ្លួនឡើយ ផ្ទុយទៅវិញ កម្ពុជានឹងបន្តដើរតួនាទីរបស់ខ្លួនក្នុងការជួយភូមាឱ្យស្វែងរកពន្លឺនៃការចរចារគ្នា ហើយកម្ពុជានៅតែគោរពតាមគោលការណ៍និងកិច្ចព្រមព្រៀងជាឯកច្ឆន្ទទាំង៥ចំណុចរបស់អាស៊ានដដែល។ ហើយបើទោះបីប្រេសិតពិសេសអាស៊ានអញ្ជើញទៅមែនពិត ក៏លោកអ្នកវិភាគរូបនេះមិនរំពឹងថា ប្រេសិតពិសេសអាចជួបជាមួយលោកស្រី អ៊ុង សានស៊ូជី និងអ្នកទោសនយោបាយផ្សេងៗទៀតដែរ។
កាលពីថ្ងៃទី១៧ វិច្ឆិកា ប្រធានអាស៊ានបានចេញសេចក្តីថ្លែងការណ៍អបអរដល់ការដោះលែងអ្នកទោសទ្រង់ទាយធំដោយក្រុមប្រឹក្សារដ្ឋបាលនៃប្រទេសភូមា។ ក្នុងសេចក្តីថ្លែងការណ៍នោះ ប្រធានអាស៊ានបានបញ្ជាក់ថា ប្រេសិតពិសេសអាស៊ាននឹងធ្វើដំណើរទស្សនកិច្ចជាលើកទី៣ទៅកាន់ភូមាដូចដែលបានគ្រោងទុក ដើម្បីធ្វើយ៉ាងណាជួយឱ្យភូមាវិលទៅរកភាពប្រក្រតី និងមាគ៌ាប្រជាធិបតេយ្យឡើងវិញ។
ប៉ុន្តែជាថ្មីម្តងទៀត គិតមកទល់ពេលនេះប្រធានអាស៊ាននៅមិនទាន់បានបញ្ជាក់ជាផ្លូវការថា នឹងបញ្ចូលប្រេសិតពិសេសអាស៊ានទៅជួបជាមួយមេដឹកនាំរបបសឹកនាពេលណាជាក់លាក់នោះទេ ខណៈអាណត្តិជាប្រធានអាស៊ានរបស់កម្ពុជាគៀកដល់កំណត់ដែលត្រូវផ្លាស់ប្តូរទៅហើយ។
ទោះយ៉ាងណាក៏ដោយ សម្រាប់អាស៊ាន ប្រសិនបើរបបសឹកមិនអនុវត្តអ្វីបានផ្លែផ្កានោះទេ នោះភូមាក៏នឹងត្រូវផាត់ចេញពីកិច្ចប្រជុំកំពូលនានា ហើយអាស៊ាននឹងបន្តរក្សាទម្រង់បែបនេះ រហូតដល់របបសឹកអនុវត្តតាមកិច្ចព្រមព្រៀងកុងសង់ស៊ីសទាំង៥ចំណុច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ