រយៈពេល១១ខែកម្ពុជានាំចេញអង្ករទៅអឺរ៉ុបកើនឡើង តែនាំចេញទៅចិនធ្លាក់ចុះបន្តិច
រយៈពេល១១ខែឆ្នាំ២០២២នេះ កម្ពុជាបាននាំអង្ករចេញទៅលក់លើទីផ្សារអន្តរជាតិបានជិត ៥៦ម៉ឺនតោន កើនឡើងជាង ៥% បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះអង្ករកម្ពុជាបាននាំចេញទៅកាន់ទីផ្សារអឺរ់ុប និងតំបន់អាស៊ានមានកើនឡើង ខណៈការនាំចេញទៅប្រទេសចិនមានការធ្លាក់ចុះបន្តិច បើធៀបនឹងរយៈពេលដូចគ្នាកាលពីឆ្នាំ២០២១។
ចុះផ្សាយនៅថ្ងៃ៖
ស្តាប់ - ០២:១៩
ចំណែកការនាំចេញទៅចិនមានធ្លាក់ចុះ ត្រូវបានឧកញ៉ា ចាន់ សុឃាំង ពន្យល់ថា ដោយសារប្រទេសចិន មានការបញ្ជាទិញអង្ករកម្ពុជាមានការយ៉ឺតយ៉ាវបន្តិចនៅក្នុងខែ១១នេះ និងដោយសារអាត្រាប្ដូរប្រាក់នៅប្រទេសចិនមានការធ្លាក់ចុះ ក៏ដូចជាប្រទេសចិនមានការរៀបចំប្រទេសឡើងវិញក្រោយវិបត្តិកូវីដ១៩ជាដើម ដែលជាមូលហេតុធ្វើឲ្យការនាំចេញអង្ករទៅប្រទេសចិនមានការធ្លាក់ចុះ។
បើតាមប្រធានក្រុមប្រឹក្សាភិបាលសហព័ន្ធស្រូវអង្ករថ្មីរូបនេះ ទោះបីជាការនាំចេញទៅចិនមានការធ្លាក់ចុះបន្តិច ប៉ុន្តែការនាំចេញអង្កររបស់កម្ពុជាទៅកាន់ទីផ្សារអន្តរជាតិសរុបបានចំនួន ៥៦ម៉ឺនតោន កើនឡើងជិត ៣ម៉ឺនតោន ស្មើ ៥,០៦%ផងដែរ បើធៀបនឹងរយៈពេលដូចគ្នាកាលពីឆ្នាំ២០២១ ហើយទឹកប្រាក់សរុបបានមកពីការលក់អង្កររយៈពេល១១ខែឆ្នាំ២០២២នេះ គឺប្រហែល ៣៦០លានដុល្លារ។
គួររំលឹកថា ថ្មីៗនេះកម្ពុជាបានឈ្នះក្តីលើបណ្តឹងតវ៉ាចំពោះសេចក្តីសម្រេចរបស់គណៈកម្មការអឺរ៉ុបដែលបានដកហូតការអនុគ្រោះពន្ធសម្រាប់ការនាំចូលអង្ករគ្រាប់វែង (Indica Rice) ពីកម្ពុជាទៅកាន់អឺរ៉ុប។ សហព័ន្ធស្រូវអង្ករកម្ពុជាកាលពីថ្ងៃទី៣០ ខែវិច្ឆិកា បានប្រកាសថា កម្ពុជាឈ្នះក្តីនៅតុលាការដំបូងអឺរ៉ុបលើសំណុំរឿងនាំអង្ករគ្រាប់វែងកម្ពុជា (Indica Rice) ចូលទៅទីផ្សារអឺរ៉ុប។ បញ្ហានេះ ក៏ជាហេតុផលមួយដែលធ្វើឲ្យការនាំអង្ករកម្ពុជាទៅកាន់ទីផ្សារអន្តរជាតិមានការកើនឡើងដែរ។
សូមបញ្ជាក់ដែរថា រយៈពេល៣ឆ្នាំនៃទណ្ឌកម្មអឺរ៉ុបកន្លងទៅ ការនាំអង្ករកម្ពុជាទៅកាន់ទីផ្សាយអឺរ៉ុបមានការធ្លាក់ចុះពី២០ ទៅ៣០% ហើយអង្ករគ្រាប់វែងកម្ពុជាបាត់ទីផ្សារអឺរ៉ុបទាំងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ