សហភាពអឺរ៉ុបឲ្យកញ្ចប់លុយ២លានអឺរ៉ូដល់អង្គការសង្គមស៊ីវិលដើម្បីពង្រឹងចំណេះដឹងពលរដ្ឋ មុនការបោះឆ្នោត២០២៣
សហភាពអឺរ៉ុបបានសម្រេចផ្តល់កញ្ចប់ជំនួយជាទឹកប្រាក់ចំនួន២លានអឺរ៉ូដល់អង្គការសង្គមស៊ីវិល ដែលធ្វើការពាក់ព័ន្ធលើផ្នែកសិទ្ធិមនុស្ស និងនយោបាយនៅកម្ពុជា។ ជាកញ្ចប់ទឹកប្រាក់ ដែលសហភាពអឺរ៉ុបផ្តល់ឲ្យដើម្បីលើកកម្ពស់ការចូលរួមរបស់ប្រជាពលរដ្ឋ សម្រាប់ការបោះឆ្នោតជ្រើសតាំងតំណាងរាស្ត្រអាណត្តិទី៧ឆ្នាំ២០២៣ នៅឆ្នាំក្រោយ។
ចុះផ្សាយនៅថ្ងៃ៖
ស្តាប់ - ០២:៣៣
ជំនួយ២លានអឺរ៉ូរបស់សហភាពអឺរ៉ុបពេលនេះ នឹងត្រូវបែងចែកជាពីរផ្នែក។ ដោយមួយផ្នែក គឺសហភាពអឺរ៉ុបនឹងផ្តល់ជំនួយជាទឹកប្រាក់១លានអឺរ៉ូដល់មជ្ឈមណ្ឌលសិទ្ធិមនុស្សកម្ពុជា និងមជ្ឈមណ្ឌលដើម្បីប្រព័ន្ធផ្សព្វផ្សាយឯករាជ្យ ក្នុងការរួមចំណែកពង្រឹងសិទ្ធិសេរីភាពផ្នែកបញ្ចេញមតិ និងសមត្ថភាពប្រព័ន្ធផ្សព្វផ្សាយឯករាជ្យក្នុងការផ្តល់ព័ត៌មានដល់ប្រជាពលរដ្ឋ។ នេះបើតាមសេចក្តីប្រកាសរបស់សហភាពអឺរ៉ុបប្រចាំកម្ពុជា នៅថ្ងៃទី០៧វិច្ឆិកា។
ដោយឡែក ទឹកប្រាក់១លានអឺរ៉ូផ្សេងទៀត គឺសហភាពអឺរ៉ុបនឹងផ្តល់ឲ្យអង្គការខុមហ្វ្រែល និងអង្គការអភិវឌ្ឍធនធានយុវជន។ បើតាមសេចក្តីប្រកាសរបស់សហភាពអឺរ៉ុប ជំនួយនេះគឺដើម្បីលើកកម្ពស់ការចូលរួមរបស់យុវជន និងស្ត្រី នៅក្នុងផ្នែកនយោបាយ ដើម្បីការបោះឆ្នោតដែលមានលក្ខណៈប្រជាធិបតេយ្យ សេរី និងយុត្តិធម៌។
ជាការកត់សម្គាល់ កញ្ចប់ជំនួយរបស់សហភាពអឺរ៉ុបពេលនេះ ធ្វើឡើងនៅមុនពេលដែលកម្ពុជាត្រៀមរៀបចំនូវការបោះឆ្នោតថ្នាក់ជាតិឆ្នាំ២០២៣ ដែលជាព្រឹត្តិការណ៍មានការឃ្លាំមើលពីបណ្តាអង្គការ និងសហគមន៍អន្តរជាតិ ទៅលើដំណើរការប្រព្រឹត្តិទៅនៃការបោះឆ្នោតនៅកម្ពុជា ដែលរៀបចំឡើងតាំងពីឆ្នាំ១៩៩៣មក។ បើតាមសេចក្តីប្រកាស គឺជំនួយដល់អង្គការដែលធ្វើការពាក់ព័ន្ធនឹងការបោះឆ្នោត និងនយោបាយ នឹងលើកកម្ពស់ការយល់ដឹងដល់ប្រជាពលរដ្ឋ ដែលជាម្ចាស់សំឡេងឆ្នោតអំពីការដំណើរការនៃការបោះឆ្នោតថ្នាក់ជាតិឆ្នាំ២០២៣។
ឯកអគ្គរដ្ឋទូតសហភាពអឺរ៉ុបប្រចាំកម្ពុជា លោកស្រី Carmen Moreno បានអះអាងថា សិទ្ធិទទួលបានព័ត៌មាន សេរីភាពនៃការបញ្ចេញមតិ និងការចូលរួមក្នុងដំណើរការបោះឆ្នោត គឺជាទិដ្ឋភាពសំខាន់ទាំងអស់នៅក្នុងសង្គមប្រជាធិបតេយ្យ។ សម្រាប់លោកស្រី Carmen Moreno កញ្ចប់ជំនួយរបស់សហភាពអឺរ៉ុបនឹងរួមចំណែកលើកកម្ពស់ការយល់ដឹងរបស់ប្រជាពលរដ្ឋកម្ពុជា អំពីសារសំខាន់នៃតួនាទី និងសិទ្ធិក្នុងការប្រកួតប្រជែងនៅការបោះឆ្នោតមួយដែលសេរី និងយុត្តិធម៌។
បើតាមសហភាពអឺរ៉ុប ឆ្នាំ២០២៣ ជាឆ្នាំដែលនឹងត្រូវប្រារព្ធខួបលើកទី៧៥នៃសេចក្តីប្រកាសជាសកលស្តីពីសិទ្ធិមនុស្ស និងជាឆ្នាំដ៏សំខាន់សម្រាប់ប្រជាពលរដ្ឋកម្ពុជា ដែលត្រូវចូលរួមបោះឆ្នោតជ្រើសតាំងតំណាងរាស្ត្រអាណត្តិទី៧។ ហើយកញ្ចប់ជំនួយទាំងនេះ គឺបញ្ជាក់យ៉ាងច្បាស់ថា សហភាពអឺរ៉ុបមានការប្តេជ្ញាខ្ពស់ ចំពោះបញ្ហាសិទ្ធិមនុស្ស និងប្រជាធិបតេយ្យ។
សូមបញ្ជាក់ថា សហភាពអឺរ៉ុបធ្លាប់បានព្យួរប្រព័ន្ធអនុគ្រោះពន្ធ EBA ដល់កម្ពុជា ២០% ពាក់ព័ន្ធទៅនឹងការរំលោភសិទ្ធិមនុស្ស និងប្រជាធិបតេយ្យ និងក្រោយពេលដែលអតីតគណបក្សសង្រ្គោះជាតិ ដែលជាគណបក្សប្រឆាំងត្រូវបានតុលាការកំពូលរំលាយនៅឆ្នាំ២០១៧។ ដោយឡែកនៅឆ្នាំ២០២២ នៃការបោះឆ្នោតឃុំ-សង្កាត់ សហភាពអឺរ៉ុបកាលពីខែឧសភា ក៏ធ្លាប់បានព្រមានជាថ្មី អំពីការព្យួរប្រព័ន្ធអនុគ្រោះពន្ធទាំងស្រុង ប្រសិនបើការបោះឆ្នោតឃុំ-សង្កាត់ មិនមានភាពសេរី និងយុត្តិធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ