សង្គមស៊ីវិលដាក់ពាក្យប្តឹងក្រុមហ៊ុនឯកជនមួយ ពីបទធ្វើឲ្យពលរដ្ឋខ្មែរធ្លាក់ក្នុងវិបត្តិបំណុល ដែលជាបញ្ហាសិទ្ធិមនុស្ស
អង្គការសង្គមស៊ីវិលផ្នែកសិទ្ធិមនុស្ស៣ស្ថាប័ន បានដាក់ពាក្យប្តឹងទៅរដ្ឋាភិបាលហូឡង់ ដើម្បីឲ្យក្រុមហ៊ុន អយកូក្រេឌីត ទទួលខុសត្រូវចំពោះការផ្តល់ទុនវិនិយោគដល់គ្រឹះស្ថានមីក្រូហិរញ្ញវត្ថុនៅកម្ពុជា។ បើតាមរបាយការណ៍របស់អង្គការសង្គមស៊ីវិល រកឃើញថា ការផ្តល់ទុនវិនិយោគកន្លងមក បានធ្វើឲ្យប៉ះពាល់ដល់បញ្ហាសិទ្ធិមនុស្សនៅកម្ពុជា តាមរយៈការបង្ខំឲ្យប្រជាពលរដ្ឋលក់ដីធ្លី ដើម្បីសងបំណុលគ្រឹះស្ថានមីក្រូហិរញ្ញវត្ថុ។
ចុះផ្សាយនៅថ្ងៃ៖
ស្តាប់ - ០២:២៩
នៅក្នុងលិខិតចំនួន២ទំព័រ ដែលចេញផ្សាយនៅលើគេហទំព័រអង្គការលីកាដូ នៅថ្ងៃចន្ទនេះ គឺបង្ហាញថា ការផ្តល់ទុនវិនិយោគជាហូរហែរបស់ក្រុមហ៊ុន អយកូក្រេឌីត ដែលមានមូលដ្ឋាននៅប្រទេសហូឡង់ មកដល់គ្រឹះស្ថានមីក្រូហិរញ្ញវត្ថុនៅកម្ពុជា បានធ្វើឡើងដោយគ្មានតម្លាភាពក្នុងការត្រួតពិនិត្យឲ្យបានគ្រប់ជ្រុងជ្រោយ និងបានធ្វើឲ្យមានផលអវិជ្ជមាននៅក្នុងវិស័យមីក្រូហិរញ្ញវត្ថុនៅកម្ពុជា តាំងពីឆ្នាំ២០១៧។
រយៈពេល៥ឆ្នាំចុងក្រោយនេះ ក្រុមហ៊ុន អយកូក្រេឌីត បានបង្កើនទុនវិនិយោគមកដល់គ្រឹះស្ថានមីក្រូហិរញ្ញវត្ថុនៅកម្ពុជា កើនឡើងពី៥០លានអឺរ៉ូនៅឆ្នាំ២០១៧ ទៅដល់ជាង៦៧លានអឺរ៉ូនៅឆ្នាំ២០២២។ បើតាមលិខិត ទុនវិនិយោគនេះ បានធ្វើឲ្យកម្ពុជា ក្លាយជាប្រទេសទទួលបានទុនវិនិយោគធំទីពីរ របស់ក្រុមហ៊ុន អយកូក្រេឌីត។
អង្គការដែលធ្វើការពាក់ព័ន្ធផ្នែកសិទ្ធិមនុស្សនៅកម្ពុជា បានអះអាងថា ទុនវិនិយោគរបស់ក្រុមហ៊ុន អយកូក្រេឌីត បានរួមចំណែកធ្វើឲ្យប្រជាពលរដ្ឋកម្ពុជាធ្លាក់ក្នុងវិបត្តិបំណុល ដែលជាផ្នែកប៉ះពាល់ដល់បញ្ហាសិទ្ធិមនុស្ស។ បើតាមរបាយការណ៍កន្លងមករបស់អង្គការលីកាដូ គឺមានប្រជាពលរដ្ឋត្រូវលក់ដីដោយបង្ខំ និងរងនូវការបំភិតបំភ័យ ដើម្បីរកប្រាក់សងបំណុលគ្រឹះស្ថានមីក្រូហិរញ្ញវត្ថុ។
បន្ថែមពីនេះ ការសិក្សារបស់វិទ្យាស្ថានសម្រាប់ការអភិវឌ្ឍ និងសន្តិភាព (INEF) បានរកឃើញថា ប្រជាពលរដ្ឋកម្ពុជា ចំនួន ១៦០ ០០០នាក់ បានលក់ដីដោយបង្ខំ ក្នុងរយៈពេល៥ឆ្នាំចុងក្រោយនេះ ដើម្បីសងបំណុល។ នេះបើតាមលិខិតដដែល។
ក្រៅពីក្រុមហ៊ុន អយកូក្រេឌីត នៅមានក្រុមហ៊ុន និងដៃគូអភិវឌ្ឍន៍មួយចំនួន ដែលបានផ្តល់ទុនវិយោគលើវិស័យគ្រឹះស្ថានមីក្រូហិរញ្ញវត្ថុនៅកម្ពុជា ដោយគ្មានការចាត់វិធានការឲ្យបានគ្រប់ជ្រុងជ្រោយ។ ក្នុងនោះ បើតាមលិខិត ក៏មានអង្គការកម្មវិធីអភិវឌ្ឍន៍របស់អង្គការសហប្រជាជាតិ (UNDP) ដែលផ្តល់ទុនវិនិយោគដល់គ្រឹះស្ថានមីក្រូហិរញ្ញវត្ថុនៅកម្ពុជា កាលពីខែសីហា ឆ្នាំ២០២២នេះផងដែរ។
គួរជម្រាបថា ការដាក់ពាក្យបណ្តឹងរបស់អង្គការសង្គមស៊ីវិល ចំនួន៣ ដែលមាន អង្គការលីកាដូ អង្គការសមធម៌កម្ពុជា និងអង្គការ FIAN របស់អាល្លឺម៉ង់ ទៅតុលាការហូឡង់ពេលនេះ ធ្វើឡើងបន្ទាប់ពី អង្គការលីកាដូ កាលពីឆ្នាំ២០១៩មក បានរកឃើញនូវការរំលោភបំពាន ការប្រមូលឥណទានបែបកេងប្រវ័ញ្ច និងការបំភិតបំភ័យជាញឹកញាប់ នៅក្នុងវិស័យមីក្រូហិរញ្ញវត្ថុកម្ពុជា។ ការបំភិតបំភ័យទាំងនោះ បានធ្វើឲ្យប៉ះពាល់ដល់ បញ្ហាសន្តិសុខស្បៀង ពលកម្មកុមារ ការធ្វើចំណាកស្រុក ដែលជាមូលដ្ឋានឈានទៅបំពានដល់វិស័យសិទ្ធិមនុស្សនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ