ADB ផ្តល់ហិរញ្ញប្បទានជិត ៦៣លានដុល្លារ គាំទ្រវិស័យបសុសត្វកម្ពុជា និងពង្រឹងសុវត្ថិភាពអាហារ
ធនាគារអភិវឌ្ឍន៍អាស៊ី(ADB)អនុម័តកញ្ចប់ថវិកាចំនួន ៦២,៩លានដុល្លារ លើកកម្ពស់សន្តិសុខស្បៀង និងជំរុញកំណើនសេដ្ឋកិច្ចកម្ពុជា ដោយការកែលម្អសុខភាព និងខ្សែសង្វាក់តម្លៃ ក៏ដូចជាការធ្វើពាណិជ្ជកម្មផ្លូវការ និងផលិតផលបសុសត្វ។ នេះបើតាម ADB នៅថ្ងៃទី១៣ ធ្នូ ដោយបញ្ជាក់ថាហិរញ្ញប្បទានខាងលើក៏នឹងរួមចំណែកកាត់បន្ថយឧស្ម័នផ្ទះកញ្ចក់ក្នុងផលិតកម្មសត្វ។
ចុះផ្សាយនៅថ្ងៃ៖
ស្តាប់ - ០២:២៤
គម្រោងកែលម្អសុខភាព និងខ្សែសង្វាក់តម្លៃបសុសត្វឆ្លងព្រំដែន ក្នុងមហាអនុតំបន់មេគង្គ(GMS) នឹងផ្តល់អត្ថប្រយោជន៍ដោយផ្ទាល់ដល់គ្រួសារយ៉ាងហោចណាស់ ៤ម៉ឺន ក្នុងរាជធានីភ្នំពេញ ខេត្តកំពង់ចាម ឧត្តរមានជ័យ ព្រៃវែង សៀមរាប តាកែវ ខេត្តកណ្តាល កំពង់ធំ និងពោធិសាត់។ នេះបើតាម ADB។ គម្រោងនេះនឹងលើកកម្ពស់ផលិតភាព និងភាពធន់អនុវិស័យបសុសត្វ ដោយកាត់បន្ថយហានិភ័យនៃជំងឺសត្វឆ្លងដែន ជំងឺឆ្លងពីសត្វ និងភាពសាំនឹងថ្នាំ សំលាប់មេរោគ បង្កើតការត្រួតពិនិត្យសុខភាពសត្វ និងការផ្តល់សេវាធ្វើឱ្យប្រសើរឡើងនូវសុវត្ថិភាពម្ហូបអាហារ និងជំរុញកិច្ចសហប្រតិបត្តិការក្នុងមហាអនុតំបន់មេគង្គ។
ADBបញ្ជាក់ថាជំនួយនេះក៏នឹងលើកកម្ពស់ផលិតកម្មបសុសត្វបត់បែនតាមអាកាសធាតុ និងកាត់បន្ថយការបំភាយឧស្ម័នផ្ទះកញ្ចក់យ៉ាងច្រើនក្នុងមួយតោននៃសាច់ដែលផលិត ធ្វើអោយប្រសើរឡើងនូវនិរន្តរភាព តាមខ្សែសង្វាក់តម្លៃបសុសត្វ និងរួមចំណែកដល់ការស្តាឡើងវិញក្រោយកូវីដ១៩។
អ្នកជំនាញជាន់ខ្ពស់ផ្នែកបំរែបំរួលអាកាសធាតុរបស់ ADB ប្រចាំតំបន់អាស៊ីអាគ្នេយ៍ លោក Srinivasan Ancha បានបញ្ជាក់ថា “អនុវិស័យបសុសត្វមានសារៈសំខាន់ណាស់ចំពោះជីវភាព តាមតំបន់ជនបទ ប្រកបដោយនិរន្តរភាព និងសន្តិសុខស្បៀងនៅកម្ពុជា ហើយវាផ្តល់ឱកាស ជាច្រើនសម្រាប់កសិករលក្ខណៈគ្រួសារ រួមទាំងស្ត្រី និងកសិអាជីវកម្មខ្នាតតូច និងមធ្យម។ ជំនួយរបស់ ADB នឹងអនុញ្ញាតឱ្យអនុវិស័យនេះអាចទាញយកសក្តានុពលនៃកំណើនខ្ពស់ដោយការកើនឡើងនៃការប្រើប្រាស់សាច់ក្នុងស្រុក ឱកាសពាណិជ្ជកម្ម និងភាពប្រសើរនៃការគ្រប់គ្រងជំងឺជាដើម។»
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី១៣ ខែធ្នូនេះថា ការចិញ្ចឹមសត្វយកសាច់លក់នៅកម្ពុជាកំពុងតែមានបញ្ហាប្រឈម ជាពិសេសគឺបញ្ហាតម្លៃលក់ចេញ ទាបជាងតម្លៃដើមផលិត។
ប្រធានសមាគមអ្នកចិញ្ចឹមសត្វកម្ពុជារូបនេះបានបញ្ជាក់ទៀតថា ទាក់ទងនឹងការផ្តល់កម្ចីក្នុងអត្រាការប្រាក់ទាបសម្រាប់អ្នកចិញ្ចឹមសត្វក្នុងស្រុកគឺបានអនុវត្តមួយចំនួនរូចហើយ ប៉ុន្តែការអនុវត្តនេះគឺបានទទួលអត្ថប្រយោជន៍តែក្រុមហ៊ុនធំៗប៉ុណ្ណោះ។ បើតាមលោក ស្រ៊ុន ពៅ នេះក៏ដោយសារថា កម្ចីខាងលើនេះ គឺតម្រូវឲ្យមានទ្រព្យបញ្ចាំ ឬកសិដ្ឋាន ជាដើម ដូច្នេះកសិករតូចតាចមិនទទួលបានការអនុគ្រោះនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ