សង្គមស៊ីវិលនិងបក្សនយោបាយនឹងលើកយកបញ្ហាចាស់ទៅជជែកជាថ្មីជាមួយគ.ជ.បនៅថ្ងៃទី១៦
គណបក្សនយោបាយនិងសង្គមស៊ីវិលមួយចំនួនបានត្រៀមខ្លួននិងរបៀបវារៈរួចជាស្រេច ដើម្បីជួបជាមួយគណៈកម្មាការជាតិរៀបចំការបោះឆ្នោត គ.ជ.ប នៅថ្ងៃទី១៦ធ្នូឆ្នាំ២០២២ ដែលជួបនោះនឹងពិនិត្យទៅលើការផ្តល់យោបល់មួយចំនួនអំពីបទបញ្ជា និងនីតិវិធី បម្រើឱ្យការបោះឆ្នោតជាតិ ឆ្នាំ២០២៣។ សេចក្តីព្រាងបទបញ្ជា និងនីតិវិធី សម្រាប់ការបោះឆ្នោតនេះ មានកម្រាស់ ៣៣៧ទំព័រ ដែលមាន១០ជំពូក។ បើតាមសង្គមស៊ីវិលនិងបក្សនយោបាយមួយចំនួន គេនឹងលើកយកបញ្ហាចាស់ទៅជជែកជាថ្មីជាមួយគ.ជ.ប នៅថ្ងៃនោះ។
ចុះផ្សាយនៅថ្ងៃ៖
ស្តាប់ - ០២:៣១
មុនជំនួបផ្លូវការមកដល់នៅថ្ងៃទី១៦ខែធ្នូខាងមុខ គណៈប្រតិភូគណបក្សខ្មែររួបរួមជាតិដឹកនាំដោយលោក ញឹក ប៊ុន ឆៃ ជាប្រធាននិងលោក យ៉ែម ប៉ុញ្ញារិទ្ធ អនុប្រធានបានស្កាត់ជួបភាគីគ.ជ.ប នៅថ្ងៃទី១៣ធ្នូមុនគេ។ លោកយ៉ែម ប៉ុញ្ញារិទ្ធ បានប្រាប់វិទ្យុបារាំងអន្តរជាតិតាមប្រព័ន្ធតេឡេក្រាមថា នៅក្នុងជំនួបទ្វេភាគីនោះ គណបក្សខ្មែររួបរួមជាតិបានដាក់សំណើសំខាន់បីចំណុចចូល ក្នុងសេចក្តីព្រាងបទបញ្ជា និងនីតិវិធីដើម្បីឲ្យការបោះឆ្នោតជាតិឆ្នាំ២០២៣ ប្រព្រឹត្តទៅដោយសេរី ត្រឹមត្រូវ យុត្តិធម៌ និងទទួលយកបានទាំងអស់គ្នា។
បើតាមលោក យ៉ែម ប៉ុញ្ញារិទ្ធ សំណើសំខាន់បីចំណុចគឺ ការិយាល័យបោះឆ្នោតឬមណ្ឌលបោះឆ្នោត វត្តមានភ្នាក់ងារសង្កេតការណ៍ជាតិមិនគួរពាក់ឯកសណ្ឋាន ឬនិមិត្តសញ្ញាបង្ហាញពីអង្គភាពរបស់ខ្លួននោះទេ តែគួរពាក់ឯកសណ្ឋាន ឬកាតសម្គាល់ខ្លួនចេញដោយគ.ជ.បតែមួយប៉ុណ្ណោះ។ គណបក្សក៏ចង់បានដែរ ការចែកទម្រង់១១០២ ដល់ភ្នាក់ងារសង្កេតការណ៍ដែលមានវត្តមានក្នុងការិយាល័យបោះឆ្នោតដូចការបោះឆ្នោតមុនៗ។ បើអាចប្រជាពលរដ្ឋនៅក្រៅប្រទេសអាចចុះបោះឆ្នោត និងចូលរួមបោះឆ្នោតតាមប្រព័ន្ធអេឡិចត្រូនិចព្រោះបច្ចុប្បន្នគ.ជ.ប.កំពុងធ្វើប្រាស់មធ្យោបាយទាំងនេះក្នុងការបំពេញការងារស្រាប់។
បើទោះជាចំណុចនេះត្រូវបានលើកឡើងទៅហើយក្ដី ក៏នឹងត្រៀមសម្រាប់យកជជែកជាថ្មី ក្នុងជំនួបថ្ងៃទី១៦ធ្នូឆ្នាំ២០២២ខាងមុខដែរ។ នេះបើតាមលោកយ៉ែម ប៉ុញ្ញារិទ្ធ ។
លោក កន សាវាង្ស អ្នកសម្របសម្រួលផ្នែកអង្កេត និងតស៊ូមតិ នៃអង្គការខុមហ្រ្វែលដែលដឹកនាំក្រុមការងារចូលរួមជំនួបថ្ងៃទី១៦ធ្នូថ្លែងថា លោកនឹងលើកយកភាពមិនប្រក្រីមួចំនួនដែលកើតមានអំឡុងពេលការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០២២មកជជែកជាថ្មី។ មិនខុសពីគណបក្សខ្មែររួបរួមជាតិដែរបញ្ហាទម្រង់១១០២ក៏ជាអ្វីដែល លោក កន សាវាង្ស ចង់និយាយនៅពេលខាងមុខដែរ ហើយនឹងនិយាយផងដែរទិដ្ឋភាពបិទធ្លាឬបិទបង្អួចអំឡុងពេលរាប់សន្លឹកឆ្នោតនិងបញ្ហាអាជ្ញាធរមូលដ្ឋានអង្គុយកត់ឈ្មោះពលរដ្ឋអំឡុងពេលបោះឆ្នោតជាដើម។
លោក សោម សូរី អគ្គលេខាធិការរងនិងជាអ្នកនាំពាក្យគ.ជ.បថ្លែងថា វត្តមានតួអង្គពាក់ព័ន្ធសម្រាប់ការជួបជុំនៅថ្ងៃទី១៦ធ្នូ ជារឿងសំខាន់និងចាំបាច់ក្នុងការប្រមូលធាតុចូលដាក់បន្ថែម នៅក្នុងសេចក្ដីព្រាងបទបញ្ជានិងនីតិវិធីសម្រាប់ការបោះឆ្នោតឆ្នាំ២០២៣។ មន្ត្រីគ.ជ.ប រូបនេះសង្ឃឹមទទួលបានមតិយោបល់ និងអនុសាសន៍ថ្មីបន្ថែមទៀត ពីគណបក្សនយោបាយដែលត្រៀមចូលរួមការបោះឆ្នោតនៅឆ្នាំ២០២៣។ ប៉ុន្តែយ៉ាងណាអនុសាសន៍ទាំងនោះត្រូវឲ្យស្របនឹងច្បាប់បោះឆ្នោតជ្រើសតាំងតំណាងរាស្ត្រ។
គួរជម្រាបជូនថា កាលពីថ្ងៃទី១ ខែវិច្ឆិកា ឆ្នាំ២០២២ កន្លងទៅនេះ គ.ជ.ប. បានចេញសេចក្តីជូនដំណឹង ដោយទុកពេលឱ្យភាគីពាក់ព័ន្ធ មានពេលត្រួតពិនិត្យ និងផ្តល់យោបល់ត្រលប់មកវិញ អំពីបទបញ្ជា និងនីតិវិធី បម្រើឱ្យការបោះឆ្នោតជ្រើសតាំងតំណាងរាស្រ្តនេះ ចាប់ពីថ្ងៃជូនដំណឹង រហូតដល់ថ្ងៃទី១៩ ខែវិច្ឆិកា។ សេចក្តីព្រាងបទបញ្ជា និងនីតិវិធី សម្រាប់ការបោះឆ្នោតនេះ មានកម្រាស់ ៣៣៧ទំព័រ ដែលមាន១០ជំពូក និងឧបសម្ពន្ធរួមបញ្ចូលផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ