បញ្ហាសិទ្ធិមនុស្ស៖ អាស៊ាន-អឺរ៉ុបប្តេជ្ញាការពារ នៅខណៈដែលពលរដ្ឋខ្មែរមួយចំនួនតវ៉ាប្រឆាំងនឹងការធ្លាក់ចុះនៅកម្ពុជា
អាស៊ាននិងអឺរ៉ុប បានប្តេជ្ញាចិត្តរួមគ្នាក្នុងការលើកកម្ពស់ និងការពារបញ្ហាសិទ្ធិមនុស្សជារួម។ នេះបើតាមសេចក្តីថ្លែងការណ៍រួមនៃកិច្ចប្រជុំកំពូលរំលឹកខួបអឺរ៉ុប-អាស៊ាន នៅថ្ងៃទី១៤ធ្នូ។ យ៉ាងណាមិញ ការប្តេជ្ញានេះ ធ្វើឡើងនៅអំឡុងពេលនេះ លោកនាយករដ្ឋមន្ត្រី ហ៊ុន សែន ក្នុងនាមជាប្រធានអាស៊ានឆ្នាំនេះ បានរងនូវការរិះគន់ និងបាតុកម្មប្រឆាំងពីសំណាក់ពលរដ្ឋខ្មែរមួយចំនួន នៅចំពោះមុខនៃការធ្វើឲ្យបញ្ហាសិទ្ធិមនុស្សនៅកម្ពុជាធ្លាក់ចុះ។
ចុះផ្សាយនៅថ្ងៃ៖
ស្តាប់ - ០២:៣៩
នៅក្នុងសេចក្តីថ្លែងការណ៍រួមចំនួន១៦ទំព័រ មេដឹកនាំអាស៊ាននិងអឺរ៉ុប បានធ្វើការប្តេជ្ញាចិត្តរួមគ្នាជាដៃគូយុទ្ធសាស្ត្រនៃផលប្រយោជន៍រវាងគ្នា នៃសន្តិភាព ស្ថេរភាពក្នុងតំបន់ និងអន្តរជាតិ ដោយគោរពទៅតាមគោលការណ៍ច្បាប់អន្តរជាតិ។ អាស៊ាន និងអឺរ៉ុប បានសន្យាជាមួយគ្នាក្នុងការគាំទ្រ និងការពារដល់បញ្ហាសិទ្ធិមនុស្ស ដែលរួមមាន សមភាពយេនឌ័រ និងសេរីភាពជាមូលដ្ឋាន។
នៅក្នុងសេចក្តីថ្លែងការណ៍រួម អាស៊ាននិងអឺរ៉ុបបានជជែកគ្នា ទៅលើបញ្ហាអន្តរជាតិមួយចំនួន ផងដែរ ដែលជាក្តីកង្វល់រួមចំពោះបញ្ហាសន្តិសុខពិភពលោក។ បញ្ហាអន្តរជាតិ ដែលមានជាអាទិ៍ សង្រ្គាមរុស្ស៊ីនៅអ៊ុយក្រែន និងវិបត្តិភូមាជាដើម។ សម្រាប់វិបត្តិភូមា អាស៊ាននិងអឺរ៉ុប បញ្ជាក់ថា នឹងបង្កើនកិច្ចខិតខំប្រឹងប្រែងឡើងវិញ ចំពោះដំណោះស្រាយដោយសន្តិវិធី ដែលជាការប្តេជ្ញាចិត្តចំពោះបញ្ហាសិទ្ធិមនុស្ស និងសេរីភាពជាមូលដ្ឋាន។
យ៉ាងណាក៏ដោយ ការជជែកអំពីបញ្ហាសិទ្ធិមនុស្សជារួម ក្នុងនាមលោកនាយករដ្ឋមន្ត្រី ហ៊ុន សែន ជាសហប្រធាននៃកិច្ចប្រជុំ ធ្វើឡើងនៅក្រោមរូបភាពនៃការរិះគន់ពីសំណាក់ប្រជាពលរដ្ឋខ្មែរមួយចំនួននៅអឺរ៉ុប នៅចំពោះមុខនៃការគោរពសិទ្ធិមនុស្សនៅកម្ពុជាកំពុងតែធ្លាក់ចុះ។ បណ្តាប្រជាពលរដ្ឋខ្មែរមួយចំនួននៃបណ្តាប្រទេសអឺរ៉ុប បាននាំគ្នាជួបជុំគ្នា នៅមុខការិយាល័យគណកម្មការសហភាពអឺរ៉ុប ប្រទេសប៊ែលហ្សិក នៅថ្ងៃទី១៤ធ្នូ ដោយលើកបដាប្រឆាំងនឹងវត្តមានលោកនាយករដ្ឋមន្ត្រី ហ៊ុន សែន និងទាមទារឲ្យមានការស្តារឡើងវិញនូវប្រព័ន្ធប្រជាធិបតេយ្យ និងការគោរពសិទ្ធិមនុស្ស។
សម្រាប់ក្រុមប្រជាពលរដ្ឋខ្មែរមួយចំនួន គឺលោកនាយករដ្ឋមន្ត្រី ហ៊ុន សែន បានធ្វើឲ្យប្រព័ន្ធប្រជាធិបតេយ្យខូចខាត និងការគោរពសិទ្ធិមនុស្សមានការធ្លាក់ចុះ នៅក្រោយពេលដែលអតីតគណបក្សសង្រ្គោះជាតិ ដែលជាគណបក្សប្រឆាំងដ៏ធំមួយ ត្រូវបានតុលាការកំពូលរំលាយ កាលពីឆ្នាំ២០១៧។
បន្ថែមពីនេះ សមាជិកសភាអឺរ៉ុប មកពីបណ្តាប្រទេសមួយចំនួន ក៏បានដាក់ញត្តិទៅប្រធានក្រុមប្រឹក្សាអឺរ៉ុប ដោយបង្ហាញក្តីបារម្ភចំពោះការដើរថយក្រោយនៃបញ្ហាសិទ្ធិមនុស្ស និងប្រព័ន្ធប្រជាធិបតេយ្យនៅកម្ពុជានាពេលបច្ចុប្បន្ន។ ញត្តិរបស់សមាជិកសភាអឺរ៉ុបមួយចំនួន ដែលដាក់មកមុនកិច្ចប្រជុំអាស៊ាន-អឺរ៉ុប លើកឡើងថា បញ្ហាសិទ្ធិមនុស្សនៅកម្ពុជាបានដើរដល់ចំណុចមួយនៃវិបត្តិ ដ្បិតអ្នកនយោបាយបក្សប្រឆាំង អង្គការសង្គមស៊ីវិល បានរងការបង្រ្កាបជាហូរហែពីសំណាក់រដ្ឋាភិបាល។
សម្រាប់សមាជិកសភាអឺរ៉ុបទាំងនោះ ទាំងនេះគឺជាក្តីកង្វល់ដែលត្រូវទាមទារឲ្យគណកម្មាការអឺរ៉ុបពិនិត្យឡើងវិញ អំពីការដាក់សម្ពាធទណ្ឌកម្ម ដើម្បីឲ្យរដ្ឋាភិបាលទទួលខុសត្រូវចំពោះបញ្ហាសិទ្ធិមនុស្សដែលរងការបង្រ្កាបយ៉ាងធ្ងន់ធ្ងរ។ ការធ្វើបែបនេះ គឺព្រោះថាឆ្នាំ២០២៣ខាងមុខ ជាឆ្នាំនៃការរៀបចំការបោះឆ្នោតថ្នាក់ជាតិជ្រើសតាំងតំណាងរាស្ត្រអាណត្តិទី៧ ដែលជាការបោះឆ្នោត ដើម្បីឆ្លុះបញ្ចាំងថា កម្ពុជាបានត្រលប់មកតាមគន្លងប្រជាធិបតេយ្យសេរីពហុបក្សឡើងវិញ ឬយ៉ាងណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ