លោក សម រង្ស៊ី ថារដ្ឋាភិបាលឡុងចុង(Bankruptcy) ដោយសារពលរដ្ឋជាច្រើនជំពាក់ធនាគារ
លោក សម រង្ស៊ី ប្រធានស្តីទីអតីតគណបក្សសង្គ្រោះជាតិបានសរសេរនៅក្នុងកាសែត The Deplomat ហើយយកសង្ខេបមកផុសនៅលើហ្វេសប៊ុករបស់លោក កាលពីថ្ងៃទី១៥ ខែធ្នូ ម្សិលមិញថាប្រជាពលរដ្ឋខ្មែរស្ទើរតែគ្រប់គ្រួសារសាមញ្ញទាំងអស់ជំពាក់លុយធនាគារវ័ណ្ឌករកច្រកចេញមិនឃើញ ដោយបញ្ហានេះលោកបន្ទោសទៅលើការទទួលខុសត្រូវរបស់ប្រមុខរដ្ឋាភិបាលលោក ហ៊ុន សែន។ ក៏ប៉ុន្តែមន្ត្រីជាន់ខ្ពស់រដ្ឋាភិបាលថា ការលើកឡើងរបស់លោក សម រង្ស៊ី មិនមានមូលដ្ឋាននោះទេ។
ចុះផ្សាយនៅថ្ងៃ៖
ស្តាប់ - ០២:២១
លោក សម រង្ស៊ី ប្រធានស្តីទីអតីតគណបក្សសង្គ្រោះជាតិបានហៅស្ថានការណ៍ដែលប្រជាជនភាគច្រើនជំពាក់លុយធនាគារវ័ណ្ឌករថា បានឆ្លុះបញ្ចាំងពីភាពឡុងចុង(Bankruptcy)របស់រដ្ឋ ដែលគ្មានសមត្ថភាព និងគ្មានលទ្ធភាពបំពេញតួនាទីរបស់ខ្លួន ក្នុងការមើលខុសត្រូវចំពោះជីវភាពរស់នៅរបស់ប្រជាពលរដ្ឋក្នុងគ្រប់វិស័យ ដូចជាកសិកម្ម សុខាភិបាល និងសង្គមកិច្ច។
លោក សម រង្ស៊ី បន្ទោសថាដោយសារតែការបោះបង់ចោល ឬការព្រលែងចោលពីសំណាក់រដ្ឋាភិបាលពុករលួយ និងគ្មានការទទួលខុសត្រូវចំពោះប្រជាជនខ្លួនឯង ទើបពលរដ្ឋគ្មានជម្រើសអ្វីក្រៅពីទៅខ្ចីប្រាក់ពីធនាគារ ឬស្ថាប័នមីក្រូហិរញ្ញចវត្ថុនានាកាន់តែច្រើនឡើងៗពីមួយឆ្នាំទៅមួយឆ្នាំដើម្បីបន្តការរស់នៅ។
ក៏ប៉ុន្តែលោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាអ្នកនាំពាក្យរដ្ឋាភិបាល បានហៅការលើកឡើងរបស់លោក សម រង្ស៊ី ថាជាការនិយាយមិនមានមូលដ្ឋានត្រឹមត្រូវពីព័ត៌មានពិតរបស់រដ្ឋាភិបាល និងចង់បំផ្លាញទីផ្សារមីក្រូហិរញ្ញវត្ថុ និងធនាគារកម្ពុជា។ តាមលោក ផៃ ស៊ីផាន កម្ពុជាដែលប្រកាន់យករបបទីផ្សារសេរីមូលធននិយម មិនមានសមត្ថកិច្ចអ្វីទៅបង្គាប់បញ្ជាលើស្ថាប័នហិរញ្ញវត្ថុដែលផ្តល់ប្រាក់កំចីនោះទេ ក៏ប៉ុន្តែលោកថារដ្ឋាភិបាលតាមរយៈធនាគារកណ្តាលរបស់ខ្លួនបានជួយសម្របសម្រួលច្រើនរវាងស្ថាប័នផ្តល់ប្រាក់កំចី និងប្រជាពលរដ្ឋដែលជាអ្នកខ្ចីបុល។
អ្នកនាំពាក្យរដ្ឋាភិបាលរូបនេះបញ្ជាក់ដែរថារដ្ឋបានសម្របសម្រួលជាមួយវិស័យឯកជនខាងកំចីហិរញ្ញវត្ថុ ដោយមិនអនុញ្ញាតឲ្យមានការរឹបអូសផ្ទះសម្បែង និងរៀបចំឥណទានឡើងវិញ ជាពិសេសនៅអំឡុងពេលដែលមានវិបត្តិកូវីដ-១៩ និងវិបត្តិសកលនៃសង្គ្រាមរុស្ស៊ី-អ៊ុយក្រែនជាដើម។
រហូតមកដល់ពេលនេះ គេនៅមិនទាន់ដឹងប្រាកដថាមានពលរដ្ឋប៉ុន្មានគ្រួសារកំពុងជំពាក់បំណុលធនាគារនិងមីក្រូហិរញ្ញវត្ថុ ក៏ប៉ុន្តែកាលពីខែកញ្ញាកន្លងទៅ ក្រសួងសហព័ន្ធអាល្លឺម៉ង់សម្រាប់សហប្រតិបត្តិការសេដ្ឋកិច្ច និងការអភិវឌ្ឍ (BMZ) បានចេញរបាយការណ៍សិក្សាមួយថា ពលរដ្ឋកម្ពុជា ១៦៧ ០០០នាក់ បាន និងកំពុងលក់ដីសងបំណុលក្នុងរយៈពេល៥ឆ្នាំចុងក្រោយនេះ។ របាយការណ៍បញ្ជាក់ថា គិតជា មធ្យមរយៈពេល១៦នាទីម្តងមានពលរដ្ឋខ្មែរ១គ្រួសារលក់ដីសងបំណុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ