លោក ហ៊ុន សែនចង់ឲ្យមានកិច្ចព្រមព្រៀងពាណិជ្ជកម្មសេរីអាស៊ាន-អឺរ៉ុបដើម្បីឲ្យស្មើភាពគ្នា
លោកនាយករដ្ឋមន្រ្តី ហ៊ុន សែន បានលើកនៅក្នុងសន្និសិទរួមនៃកិច្ចប្រជុំខួបអនុស្សាវរីយ៍អាស៊ាន-អឺរ៉ុប និងអបអរសាទរខួប៤៥ឆ្នាំនៃដៃគូសន្ទនាអាស៊ាន-អឺរ៉ុបថា កិច្ចព្រមព្រៀងពាណិជ្ជកម្មសេរីអាស៊ាន-អឺរ៉ុប មិនគួរដាក់បញ្ហានយោបាយប្រទេសណាមួយមករាំងខ្ទប់កិច្ចព្រមព្រៀងនេះទេ។ អាស៊ានគួរជាដៃគូស្មើភាពជាមួយអឺរ៉ុប និងជាដៃគូពាណិជ្ជកម្មដែលបំពេញឲ្យគ្នាទៅវិញទៅមក។ សម្រាប់អ្នកស្រាវជ្រាវផ្នែកសេដ្ឋកិច្ចវិញ ក៏មិនឯកភាពលើការយកបញ្ហានយោបាយប្រទេសណាធ្វើឲ្យរាំងខ្ទប់ដល់កិច្ចព្រមព្រៀងនេះដែរ។
ចុះផ្សាយនៅថ្ងៃ៖
ស្តាប់ - ០២:៣៨
ប្រមុខដឹកនាំរដ្ឋាភិបាលកម្ពុជា លោក ហ៊ុន សែន បានបញ្ជាក់ថា អាស៊ានមិនត្រូវទន្ទឹងរងចាំអ្វីៗឲ្យអឺរ៉ុបជួយនោះទេ ប៉ុន្តែត្រូវឃើញនូវការបំពេញឲ្យគ្នាទៅវិញទៅមករវាងសេដ្ឋកិចុ្ចតំបន់ទាំងពីរអាស៊ាន-អឺរ៉ុប។ លោក ហ៊ុន សែន បានទទួលស្គាល់ថា ពិតហើយបណ្ដាប្រទេសនៅអឺរ៉ុបមានសេដ្ឋកិច្ចជឿនលឿនជាងអាស៊ាន ប៉ុន្តែអាស៊ានមិនមែនជាកន្លែងដែលត្រូវតែរងចាំទទួលជំនួយពីអឺរ៉ុបនោះដែរ។ ត្រង់ចំណុចនេះហើយដែលលោក ហ៊ុន សែនថា អាស៊ាន-អឺរ៉ុប បានឯកភាពគ្នាបង្កើតឲ្យមានកិច្ចព្រមព្រៀងពាណិជ្ជកម្មសេរី។
បើតាមលោកនាយករដ្ឋមន្រ្តី ហ៊ុន សែន អាស៊ានពិតជាមិនចង់ឲ្យប្រជាជនរបស់ខ្លួននៅក្ររហូត ហើយរងចាំភាពអនុគ្រោះពីអឺរ៉ុបនោះដែរ អាស៊ានចង់បានកិច្ចព្រមព្រៀងពាណិជ្ចកម្មសេរីពិតប្រាកដ។ លោកសង្កត់ធ្ងន់ថា កិច្ចព្រមព្រៀងពាណិជ្ជកម្មសេរីអាស៊ាន-អឺរ៉ុប មិនគួរយកបញ្ហានយោបាយបណ្ដាប្រទេសអាស៊ានណាមួយមករាំងខ្ទប់ដល់កិច្ចព្រមព្រៀងនេះទេ។ ភាពជាដៃគូរវាងអាស៊ាន និងអឺរ៉ុប គឺត្រូវតែស្មើភាពគ្នា ដោយមិនត្រូវយកបញ្ហាប្រទេសមីយ៉ាន់ម៉ា ឬប្រទេសណាមួយ ធ្វើឲ្យរំខានដល់កិច្ចខិតខំប្រឹងប្រែងជាមួយនឹងការបង្កើតកិច្ចព្រមព្រៀងពាណិជ្ជកម្មសេរីរវាងតំបន់ទាំងពីរអាស៊ាន-អឺរ៉ុបឡើយ។
ទាក់ទងបញ្ហាសិទ្ធិមនុស្សវិញ ប្រមុខដឹកនាំរដ្ឋាភិបាលកម្ពុជា បានចោទសួរថា តើអឺរ៉ុបបានចុះហត្ថលេខាជាមួយប្រទេសណាខ្លះនៅក្នុងអាស៊ាន ហើយសិទ្ធិមនុស្សនៅប្រទេសទាំងនោះវាយ៉ាងម៉េច? ក្រោយពីចោទសួរបែបនេះ លោក ហ៊ុន សែនថា ពិតណាស់ចំណុចខ្លះមិនមែនសុទ្ធតែត្រូវគ្នានោះទេ ប៉ុន្តែគោលដៅរួម គឺជាការតភ្ជាប់ ការផ្សារភ្ជាប់គ្នានៃតំបន់ទាំងពីរអាស៊ាន-អឺរ៉ុប និងជាសេដ្ឋកិច្ចបំពេញឲ្យគ្នា ដោយលោកសង្ឃឹមថាចំណុចនេះ នឹងដាស់តឿនឲ្យអាស៊ានត្រូវខិតខំប្រឹងប្រែងដើម្បីងើបឈរឡើងធ្វើជាដៃគូស្មើភាពនិងស្មើសិទ្ធិជាមួយនឹងអឺរ៉ុប។
សម្រាប់លោកបណ្ឌិត ឆេង គឹមឡុង នាយកនៃមជ្ឈមណ្ឌលនវានុវត្តន៍ផ្នែកអភិបាលកិច្ច និងប្រជាធិបតេយ្យនៃវិទ្យាស្ថានចក្ខុវិស័យអាស៊ី ក៏បានឯកភាពថា អឺរ៉ុបមិនគួរយកបញ្ហានយោបាយបណ្ដាប្រទេសអាស៊ានណាមួយមករាំងខ្ទប់ដល់កិច្ចព្រមព្រៀងនេះដែរ។ បើតាមលោក ឆេង គឹមឡុង អឺរ៉ុបហាក់អនុវត្តកិច្ចព្រមព្រៀងពាណិជ្ជកម្មសេរីនេះមានស្តង់ដាពីរ ព្រោះបណ្ដាប្រទេសអាស៊ានដែលអឺរ៉ុបចុះកិច្ចព្រមព្រៀងពាណិជ្ជសេរីជាមួយ ពុំមានការគោរពសិទ្ធិមនុស្ស និងពុំមានការបោះឆ្នោតត្រឹមត្រូវឡើយ។
សូមបញ្ជាក់ថា ទាក់ទិនកិច្ចព្រមព្រៀងពាណិជ្ជកម្មសេរីជាមួយអឺរ៉ុបនេះ គេកត់សម្គាល់ឃើញថា អឺរ៉ុបនៅមិនទាន់សម្រេចចុះកិច្ចព្រមព្រៀងពាណិជ្ជកម្មសេរីរវាងអាស៊ាន-អឺរ៉ុបឡើយ តែអឺរ៉ុបបែរជាចុះកិច្ចព្រមព្រៀងពាណិជ្ជកម្មសេរីជាមួយបណ្ដាប្រទេសនៅក្នុងអាស៊ាន ដូចជាជាមួយប្រទេសវៀតណាម ប្រទេសសិង្ហបុរីវិញ។ មូលហេតុនេះ ដោយសារអឺរ៉ុបគិតថាបណ្ដាប្រទេសអាស៊ានខ្លះ នៅមានបញ្ហានយោបាយផ្ទៃក្នុង មានការរំលោភសិទ្ធិមនុស្ស និងធ្វើឲ្យប្រជាធិបតេយ្យធ្លាក់ចុះជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ