សហភាពអឺរ៉ុប ដាក់លក្ខខណ្ឌមកកម្ពុជាឱ្យបើកលំហរនយោបាយមុនការបោះឆ្នោត ជាថ្នូរនឹងEBA
តំណាងជាន់ខ្ពស់នៃសហភាពអឺរ៉ុបបានក្រើនរំលឹកមកកម្ពុជាថា ដើម្បីទទួលបាននូវប្រព័ន្ធអនុគ្រោះពន្ធEBAដែលបាត់បង់មួយផ្នែកឡើងវិញ លុះត្រាតែកម្ពុជាបើកលំហរសេរីភាពនយោបាយសម្រាប់ការបោះឆ្នោតឆ្នាំ២០២៣ឱ្យបានពេញលេញសិន។ ជំហរដ៏មុតមាំរបស់សហភាពអឺរ៉ុបនេះ ធ្វើឡើងក្នុងជំនួបផ្ទាល់មុខជាមួយរដ្ឋមន្ត្រីការបរទេសកម្ពុជាលោក ប្រាក់ សុខុន នាទីក្រុងព្រុចសែល ប្រទេសបែលហ្ស៊ិកកាលពីថ្ងៃទី១៥ធ្នូ។ តែសម្រាប់កម្ពុជា លំហរលទ្ធិប្រជាធិបតេយ្យនៅកម្ពុជាមានភាពល្អប្រសើរ។
ចុះផ្សាយនៅថ្ងៃ៖
ស្តាប់ - ០៣:១២
លោក ចូសេប ប៉ូរេល ហ្វុនតេឡេស (Josep Borell Fontelles) តំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេសនិងសន្តិសុខគោលនយោបាយបានប្រាប់មកលោក ប្រាក់ សុខុន រដ្ឋមន្ត្រីការបរទេសកម្ពុជាថា អឺរ៉ុបនឹងតាមដាននូវលំហរសេរីភាពនយោបាយមុនការបោះឆ្នោតឆ្នាំ២០២៣ថាតើ នឹងមានភាពល្អប្រសើរដែរឬទេ មុននឹងសម្រេចចិត្តផ្តល់ឱ្យនូវប្រព័ន្ធអនុគ្រោះពន្ធEBA ដែលអឺរ៉ុបបានកាត់ផ្តាច់អស់២០%កាលពីខែអំឡុងខែសីហាឆ្នាំ២០២០។
តាមប្រព័ន្ធទំនាក់ទំនងTwitter លោក ចូសេប ប៉ូរេល បានលើកឡើងថា ប្រសិនបើដំណើរការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ មិនសេរី ត្រឹមត្រូវ និងយុត្តិធម៌ នោះរបបពាណិជ្ជកម្មEBA ក៏មិនអាចផ្តល់ជូនមកឱ្យកម្ពុជាវិញដែរ។
តែយ៉ាងណា ភាគីកម្ពុជាមិនបានបញ្ជាក់នូវជំហររបស់ខ្លួនយ៉ាងណានោះទេ ចំពោះការលើកឡើងរបស់សហភាពអឺរ៉ុបជុំវិញប្រព័ន្ធអនុគ្រោះពន្ធEBA។ ប៉ុន្តែកាលពីថ្ងៃទី១៦ ធ្នូកន្លងទៅ ក្រសួងការបរទេសកម្ពុជាបានចេញសេចក្តីប្រកាសព័ត៌មានមួយ ដោយបញ្ជាក់ថា ប្រព័ន្ធលទិ្ធប្រជាធិបតេយ្យនៅកម្ពុជាមានភាពល្អប្រសើរ ហើយបើតាមការបោះឆ្នោតជ្រើសរើសក្រុមប្រឹក្សាឃុំ-សង្កាត់កាលពីដើមខែមិថុនាឆ្នាំនេះវិញ គឺប្រព្រឹត្តិទៅដោយសេរី និងយុត្តិធម៌ជាមួយអត្រាអ្នកទៅបោះឆ្នោតប្រមាណ៨០% ព្រមទាំងមានការចូលរួមប្រកួតប្រជែងពីគណបក្សនយោបាយចំនួន១៧ផង។ ហើយសម្រាប់ការបោះឆ្នោតឆ្នាំ២០២៣វិញ កម្ពុជាក៏បានអញ្ចើញសហភាពអឺរ៉ុបចូលរួម និងបញ្ចូនអ្នកសង្កេតការណ៍មកតាមដានការបោះឆ្នោតនៅកម្ពុជាដូចគ្នា។
គួរឱ្យកត់សម្គាល់ដែរថា ការជួបជជែកគ្នារវាងរដ្ឋមន្ត្រីក្រសួងការបរទេសកម្ពុជា និងតំណាងជាន់ខ្ពស់នៃសហភាពអឺរ៉ុប ដើម្បីពិភាក្សារឿងប្រព័ន្ធអនុគ្រោះពន្ធEBAនេះ ធ្វើឡើងក្រោយពេលដែលប្រមុខរដ្ឋាភិបាលកម្ពុជាលោក ហ៊ុន សែន បញ្ចេញថ្វីមាត់ក្នុងជំនួបជាមួយពលរដ្ឋខ្មែររស់នៅក្នុងតំបន់អឺរ៉ុបកាលពីថ្ងៃទី១២ ខែធ្នូ។ នាពេលនោះ លោកនាយករដ្ឋមន្ត្រីអះអាងថា លោកមិនលាដៃសុំជំនួយ ឬប្រព័ន្ធអនុគ្រោះពន្ធពីអឺរ៉ុបជាដាច់ខាត ទោះស្ថិតក្នុងលក្ខខណ្ឌណាក៏ដោយ ព្រោះលោកមិនយកឯករាជ្យភាព អធិបតេយ្យភាព ជាថ្នូរនឹងជំនួយណាមួយឡើយ។
ដោយឡែកកាលពីថ្ងៃទី១៤ ខែធ្នូ មេដឹកនាំបក្សប្រឆាំងកំពុងនិរទេសខ្លួន លោក សម រង្ស៊ី ដែលស្វះស្វែងរកកិច្ចអន្តរាគមន៍ទៅកាន់សភាពអឺរ៉ុបបានផ្សព្វផ្សាយលិខិតរបស់សមាជិកសភាអឺរ៉ុប ដែលបញ្ចូនទៅកាន់ប្រធានក្រុមប្រឹក្សាសហភាអឺរ៉ុប ក៏ដូចជាប្រធានគណៈកម្មាធិការអឺរ៉ុប និងអនុប្រធានសហភាពអឺរ៉ុបឱ្យជួយអន្តរាគមន៍លើបញ្ហារំលោភសិទ្ធិមនុស្សនៅកម្ពុជា និងគាប់ជួនពេលលោកនាយករដ្ឋមន្ត្រីហ៊ុន សែនកំពុងមានវត្តមាននៅតំបន់អឺរ៉ុបស្រាប់។
ក្នុងលិខិតនោះ មានការរំឭកឡើងវិញថារដ្ឋាភិបាលកម្ពុជាបានបង្ក្រាបសំឡេងអ្នកប្រឆាំង អង្គការសង្គមស៊ីវិល អ្នកសារព័ត៌មានឯករាជ្យ ក្រោមវិធានការកូវីដ-១៩។ ហើយសមាជិកសភាអឺរ៉ុបបានទទួចឱ្យសហភាពអឺរ៉ុបពិនិត្យលើប្រព័ន្ធអនុគ្រោះពន្ធEBAនេះ ដើម្បីធ្វើយ៉ាងណាឱ្យកម្ពុជាអនុវត្តបានពេញលេញនូវលំហរសេរីភាពនយោបាយ និងការបោះឆ្នោតឆ្នាំ២០២៣ខាងមុខ។
សូមជម្រាបថា សហភាពអឺរ៉ុបបានសម្រេចដកប្រព័ន្ធអនុគ្រោះពន្ធEBA ២០%ពីកម្ពុជាចាប់តាំងពីថ្ងៃទី១២ ខែសីហា ឆ្នាំ២០២០មកម្ល៉េះ។ ហើយកាលពីដើមខែឧសភា ពោលគឺមុនការបោះឆ្នោតឃុំ-សង្កាត់អាណត្តិទី៥ សហភាពអឺរ៉ុបក៏ចេញមកព្រមានកម្ពុជាម្តងទៀតថា ខ្លួននឹងពិចារណាដកហូតប្រព័ន្ធអនុគ្រោះពន្ធEBA ទាំងស្រុងពីកម្ពុជាប្រសិនបើការបោះឆ្នោតនៅឆ្នាំ២០២៣ មិនធ្វើឡើងដោយសេរី ត្រឹមត្រូវ និងយុត្តិធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ