កម្ពុជានិងតួគីឯកភាពធ្វើកិច្ចសហប្រតិបត្តិការជាមួយគ្នាបន្តទៀតលើការអភិវឌ្ឍវិស័យពាណិជ្ជកម្ម និងផលិតកម្មស្រូវ
សហព័ន្ធស្រូវអង្ករកម្ពុជា និងទីភ្នាក់ងារសម្របសម្រួលកិច្ចសហប្រតិបត្តិការប្រទេសតួគី (TIKA) ឯកភាពធ្វើកិច្ចសហប្រតិបត្តិការជាមួយគ្នាបន្តទៀត លើការអភិវឌ្ឍវិស័យពាណិជ្ជកម្ម និងផលិតកម្មស្រូវ។ ការឯកភាពគ្នានេះ ក្រោយពីការនាំចេញអង្កររបស់កម្ពុជាទៅប្រទេសតួគី កើនជាង ៣ពាន់តោនក្នុងរយៈពេល១១ខែឆ្នាំ២០២២នេះ។
ចុះផ្សាយនៅថ្ងៃ៖
ស្តាប់ - ០១:៤៥
លោកឧញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជាថ្មី បានបញ្ជាក់ប្រាប់វិទ្យុបារាំង RFI នៅច័ន្ទទី១៩ខែធ្នូនេះថា ប្រទេសតួគីតាមរយៈទីភ្នាក់ងារសម្របសម្រួលកិច្ចសហប្រតិបត្តិការប្រទេសតួគីបាននិងកំពុងសិក្សាលើវិនិយោគលើវិស័យកសិកម្មនៅកម្ពុជា តែយ៉ាងណាការសិក្សានេះ មិនទាន់ឈានដល់ការព្រមព្រៀងណាមួយនៅឡើយទេ ដោយសារភាគីតួគីគេត្រូវការសិក្សាពីបញ្ហានេះឲ្យបានច្បាស់លាស់។ នេះបើតាមលោកឧញ៉ា ចាន់ សុឃាំង។
លោកឧញ៉ា ចាន់ សុឃាំង ក៏បានបង្ហាញពីសក្កានុពលវិស័យស្រូវអង្ករកម្ពុជាប្រាប់ទៅឯកអគ្គរដ្ឋទូតប្រទេសទួរគីប្រចាំកម្ពុជា ដើម្បីឲ្យអ្នកវិនិយោគតួគីមកវិនិយោគបណ្ដាក់ទុនរកស៊ីលើវិស័យនេះផងដែរ។ ការបង្ហាញបន្ទាប់ពីលោកឧញ៉ាបានលើកអំពីការរីកចម្រើនយ៉ាងលឿន និងបានបង្ហាញលទ្ធផលការនាំចេញអង្ករកម្ពុជាទៅកាន់ទីផ្សារប្រទេសទួរគីបានកើនដល់ ៣០០០តោន ក្នុងរយៈពេល ១១ខែ នៃឆ្នាំ២០២២។
សូមបញ្ជាក់ថា សហព័ន្ធស្រូវអង្ករកម្ពុជា និងទីភ្នាក់ងារសម្របសម្រួលកិច្ចសហប្រតិបត្តិការប្រទេសតួគី បានចុះហត្ថលេខាលើអនុស្សារណៈយោគយល់គ្នា នៅថ្ងៃទី១៦ធ្នូ ដែលពិធីចុះហត្ថលេខានេះក្នុងគោលបំណងជួយលើកកម្ពស់ជីវភាពរបស់ប្រជាកសិករ តាមរយៈការបរិច្ចាកនូវម៉ាស៊ីនស្ទូងស្រូវចំនួន ២០គ្រឿង និងឧបករណ៍សម្រាប់បណ្តុះគ្រាប់ពូជដល់សហគមន៍កសិកម្មចំនួន ៥ ដែលមានទីតាំងនៅក្នុងខេត្តកំពង់ចាម កំពង់ធំ ព្រៃវែង និងខេត្តតាកែវ។
បើតាមសហព័ន្ធស្រូវអង្ករកម្ពុជា ទីភ្នាក់ងារសម្របសម្រួលកិច្ចសហប្រតិបត្តិការរបស់ប្រទេសទួរគី បាននិងកំពុងអនុវត្តន៍គម្រោងមួយចំនួននៅក្នុងប្រទេសកម្ពុជា ក្នុងវិស័យអប់រំ គេហកិច្ច និងការបណ្តុះបណ្តាលកសាងសមត្ថភាព។ នេះគឺជាគម្រោងទី១ របស់ TIKA នៅក្នុងប្រទេសកម្ពុជា លើវិស័យកសិកម្ម ហើយទីភ្នាក់ងារបានពិចារណានឹងបន្តជួយដល់សហគមន៍កសិកម្មបន្ថែមទៀតនៅក្នុងកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ