ថៃរៀបចំកិច្ចប្រជុំក្រៅក្របខណ្ឌអាស៊ានស្តីពីភូមា ក្រោយវិបត្តិភូមាមិនអាចដោះស្រាយបានអំឡុងកម្ពុជាជាប្រធានអាស៊ាន
ប្រទេសថៃនឹងរៀបចំកិច្ចប្រជុំក្រៅក្របខណ្ឌអាស៊ាន ដើម្បីពិគ្រោះយោបល់ដោយបើកចំហរ អំពីបញ្ហាប្រទេសភូមា នៅថ្ងៃទី២២ ខែធ្នូ ខាងមុខ។ នេះបើតាមការឱ្យដឹងពីកាសែតថៃ PBS ចេញផ្សាយនៅថ្ងៃទី១៨ធ្នូ កន្លងទៅ។ ការរៀបចំកិច្ចប្រជុំពិគ្រោះយោបល់ស្តីពីបញ្ហាភូមាក្រៅក្របខណ្ឌអាស៊ាន ដែលគ្រោងនឹងមានការអញ្ជើញប្រទេសពាក់ព័ន្ធចូលរួមដែរនោះ ធ្វើឡើងបន្ទាប់ពីថៃ បានរងនូវផលប៉ះពាល់ដោយផ្ទាល់ និងដោយប្រយោលពីវិបត្តនយោបាយនៅភូមា។
ចុះផ្សាយនៅថ្ងៃ៖
ស្តាប់ - ០២:០២
ប្រភពមិនបញ្ចេញឈ្មោះនៅក្នុងជួររដ្ឋាភិបាលថៃ ឱ្យដឹងថា កិច្ចប្រជុំក្រៅផ្លូវការ ដែលផ្តួចផ្តើមដោយប្រទេសថៃនេះ មានការចូលរួមផងដែរពីរដ្ឋមន្ត្រីការបរទេសនៃរបបសឹកភូមាលោក Wunna Maung Lwin រួមនឹងប្រទេសមួយចំនួននៅជុំវិញថៃ ដែលទទួលរងផលប៉ះពាល់ដោយផ្ទាល់ និងដោយប្រយោលពីវិបត្តិភូមា។ នេះបើតាមការចេញផ្សាយរបស់កាសែតថៃ PBS កាលពីថ្ងៃអាទិត្យ។
ជុំវិញបញ្ហានេះ រដ្ឋាភិបាលកម្ពុជាតាមរយៈក្រសួងការបរទេស មិនទាន់មានការបញ្ជាក់ពីការចូលរួមយ៉ាងណានៅឡើយទេ។ ក៏ប៉ុន្តែលោក ឯម សុវណ្ណារ៉ា សាស្ត្រាចារ្យផ្នែកវិទ្យាសាស្ត្រនយោបាយ បានមើលឃើញថាការផ្តើមរៀបចំរបស់ថៃអាចជាការល្អ នៅក្នុងដំណោះស្រាយវិបត្តិភូមានេះ ក៏ប៉ុន្តែក៏ត្រូវមានការឯកភាពពីប្រទេសជាសមាជិកអាស៊ាន៩ផ្សេងទៀតដែរ។
តាមលោក ឯម សុវណ្ណារ៉ា បើកម្ពុជាចូលរួមនៅក្នុងកិច្ចប្រជុំពិគ្រោះយោបល់ក្រៅក្របខណ្ឌអាស៊ាន ដោយមិនមានការឯកភាពពីបណ្តាប្រទេសជាសមាជិកអាស៊ានផ្សេងទៀត វាអាចធ្វើឲ្យប៉ះពាល់ដល់មុខមាត់កម្ពុជាដែរ ខណៈបញ្ហាភូមានេះមិនត្រូវបានដោះស្រាយឲ្យប្រសើរឡើងនៅក្នុងអាណត្តិកម្ពុជាជាប្រធានអាស៊ានប្តូរវេននៅឆ្នាំ២០២២នេះ។
សូមរំលឹកថា កាលពីពេលថ្មីៗនេះ ប្រេសិតពិសេសនៃប្រធានអាស៊ានទទួលបន្ទុកបញ្ហាភូមា លោក ប្រាក់ សុខុន ដែលជារដ្ឋមន្រ្តីការបរទេសកម្ពុជា បានលុបចោលគម្រោងធ្វើដំណើរទៅកាន់ប្រទេសភូមាជាលើកទី៣។ ការលុបចោលទស្សនកិច្ចលើកទី៣នៅភូមានេះ គឺដោយសារតែលោក ប្រាក់ សុខុន ត្រូវចូលរួមកិច្ចប្រជុំកំពូលរំឭកខួបអាស៊ាន និងសហភាពអ៊ឺរ៉ុប នៅទីក្រុងព្រុចសែល ប្រទេសបែលហ្សិក ខណៈដែលមិនមានការរំពឹងថានឹងសម្រេចបាននូវលទ្ធផលជាដុំកំភួនជុំវិញបញ្ហាភូមា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ