ក្រោយជាប់គាំងថៃអញ្ជើញកម្ពុជាដែលជាប្រធានអាស៊ានទៅពិគ្រោះរឿងភូមា
តបតាមការអញ្ជើញរបស់រដ្ឋមន្រ្តីការបរទេសថៃ ប្រេសិតពិសេសនៃប្រធានអាស៊ានទទួលបន្ទុកបញ្ហាភូមា លោក ប្រាក់ សុខុន ដែលជារដ្ឋមន្រ្តីការបរទេសកម្ពុជា ដឹកនាំគណៈប្រតិភូទៅចូលរួមក្នុងកិច្ចពិគ្រោះយោបល់ក្រៅផ្លូវការ ស្ដីពីបញ្ហាប្រទេសភូមា នៅទីក្រុងបាងកក ប្រទេសថៃ។ កិច្ចពិគ្រោះយោបល់ក្រៅផ្លូវការនេះ ប្រព្រឹត្តធ្វើនៅថ្ងៃទី២២ធ្នូនេះ ហើយអ្នកចូលរួមរំពឹងថា នឹងមានការពិភាក្សាត្រង់ទៅត្រង់មក ដើម្បីពន្លឿនវឌ្ឍនភាពក្នុងការអនុវត្តការព្រមព្រៀងជាឯកឆ្ឆន្ទ ៥ចំណុចស្ដីពីមីយ៉ាន់ម៉ា។
ចុះផ្សាយនៅថ្ងៃ៖
ស្តាប់ - ០២:១៥
ភាគីកម្ពុជា លោក ប្រាក់ សុខុន រដ្ឋមន្រ្តីក្រសួងការបរទេសកម្ពុជា និងជាប្រេសិតពិសេសនៃប្រធានអាស៊ានទទួលបន្ទុកបញ្ហាភូមា បានដឹកនាំគណៈប្រតិភូទៅចូលរួមកិច្ចពិគ្រោះយោបល់ក្រៅផ្លូវការ ដែលរៀបចំដោយប្រទេសថៃ។ បើតាមក្រសួងការបរទេសកម្ពុជា កិច្ចពិគ្រោះយោបល់ក្រៅផ្លូវការនេះ អ្នកចូលរួមរំពឹងថា នឹងមានការពិភាក្សាដោយត្រង់ទៅត្រង់មក និងប្រកបដោយភាពស្មោះត្រង់ លើមធ្យោបាយដើម្បីពន្លឿនវឌ្ឍនភាពក្នុងការអនុវត្តការព្រមព្រៀងជាឯកឆ្ឆន្ទ៥ចំណុចស្ដីពីមីយ៉ាន់ម៉ា។ នេះបើតាមសេចក្ដីប្រកាសព័ត៌មានរបស់ក្រសួងការបរទេសចុះថ្ងៃទី២១ធ្នូ។
ប្រទេសថៃបានរៀបចំកិច្ចប្រជុំក្រៅក្របខណ្ឌអាស៊ាន ដើម្បីពិគ្រោះយោបល់ដោយបើកចំហរ អំពីបញ្ហាប្រទេសភូមា។ កិច្ចប្រជុំក្រៅផ្លូវការដែលផ្តួចផ្តើមដោយប្រទេសថៃនេះ បើតាមការឲ្យដឹង ក៏មានការចូលរួមផងដែរពីរដ្ឋមន្ត្រីការបរទេសនៃរបបសឹកភូមាលោក Wunna Maung Lwin រួមនឹងប្រទេសមួយចំនួននៅជុំវិញថៃ ដែលទទួលរងផលប៉ះពាល់ដោយផ្ទាល់ និងដោយប្រយោលពីវិបត្តិភូមា។ នេះបើតាមការចេញផ្សាយរបស់កាសែតថៃ PBS កាលពីថ្ងៃ១៨ធ្នូ។
សម្រាប់លោកបណ្ឌិត ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា យល់ថា កិច្ចពិគ្រោះយោបល់ក្រៅផ្លូវការស្ដីពីបញ្ហាភូមា ដែលរៀបចំដោយប្រទេសថៃ ហើយមានការចូលរួមពីរដ្ឋមន្រ្តីការបរទេសកម្ពុជានេះ គឺជារឿងល្អ។ បើតាមលោកបណ្ឌិត ប៉ា ចន្ទរឿន មិនថាប្រទេសណា ឬអង្គការណានោះទេ ឲ្យតែដោះស្រាយបញ្ហាភូមាបាន គឺជារឿងល្អសម្រាប់ប្រជាជនភូមា ដែលកំពុងរងនូវអំពើហិង្សា និងរំលោភសិទ្ធិមនុស្ស។
ទាក់ទិននឹងបញ្ហាប្រទេសមីយ៉ាន់ម៉ានេះដែរ ក្រុមប្រឹក្សាសន្តិសុខអង្គការសហប្រជាជាតិ នៅថ្ងៃពុធទី២១ខែធ្នូ បានអនុម័តដំណោះស្រាយលើកដំបូងរបស់ខ្លួនលើប្រទេសមីយ៉ាន់ម៉ាក្នុងរយៈពេល ៧៤ឆ្នាំ ដើម្បីទាមទារឲ្យបញ្ចប់អំពើហិង្សា និងជំរុញឲ្យរបបយោធាដោះលែងអ្នកទោសនយោបាយទាំងអស់ រួមទាំងមេដឹកនាំដែលត្រូវបានបណ្តេញចេញ គឺលោកស្រី Aung San Suu Kyi។
គួររំលឹកថា បញ្ហាមីយ៉ាន់ម៉ានេះ ប្រេសិតពិសេសនៃប្រធានអាស៊ានទទួលបន្ទុកបញ្ហាភូមា លោក ប្រាក់ សុខុន ដែលជារដ្ឋមន្រ្តីការបរទេសកម្ពុជា បានលុបចោលគម្រោងធ្វើដំណើរទៅកាន់ប្រទេសភូមាជាលើកទី៣។ ការលុបចោលទស្សនកិច្ចលើកទី៣នៅមីយ៉ាន់ម៉ានេះ គឺដោយសារតែលោក ប្រាក់ សុខុន ត្រូវចូលរួមកិច្ចប្រជុំកំពូលរំឭកខួបអាស៊ាន និងសហភាពអ៊ឺរ៉ុប នៅទីក្រុងព្រុចសែល ប្រទេសបែលហ្សិក ខណៈដែលមិនមានការរំពឹងថានឹងសម្រេចបាននូវលទ្ធផលជាដុំកំភួនជុំវិញបញ្ហាភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ