ជំនួបនៅបាងកក៖ កម្ពុជាថាជាការស្វែងរកច្រកចេញឲ្យភូមា ប្រកបទៅដោយអត្ថន័យ
កម្ពុជានិងសមាជិកអាស៊ានមួយចំនួន បានជួបជជែកគ្នាក្រៅផ្លូវការ ដើម្បីរកមើលច្រកចេញឲ្យភូមា ដែលកំពុងស្ថិតក្រោមកាន់កាប់របស់របបយោធា។ ជាកិច្ចប្រជុំនៅឯទីក្រុងបាងកក សេចក្តីប្រកាសរបស់ក្រសួងការបរទេសកម្ពុជា អះអាងថា នេះជាការជជែកដោយចំហ ស្មោះត្រង់ និងមានអត្ថន័យដើម្បីទទួលព័ត៌មានពីភាគីភូមា។
ចុះផ្សាយនៅថ្ងៃ៖
ស្តាប់ - ០២:០៨
សេចក្តីប្រកាសរបស់ក្រសួងការបរទេសកម្ពុជា នៅថ្ងៃ២៣ធ្នូនេះ បានបញ្ជាក់ថា កិច្ចប្រជុំក្រៅផ្លូវការនៅប្រទេសថៃ បានផ្តល់ឱកាសឲ្យរដ្ឋមន្ត្រី និងតំណាងភាគីទាំងអស់បានចូលរួម ដើម្បីទទួលព័ត៌មានពីភូមា ដោយភាពបើកចំហ ស្មោះត្រង់ ក្នុងការជំរុញការអនុវត្តកិច្ចព្រមព្រៀងទាំង៥ចំណុច ដែលដាក់ចេញតាំងពីឆ្នាំទៅ។ សម្រាប់កម្ពុជា នេះគឺការជជែកដើម្បីឈានទៅរកការពន្លឿនការអនុវត្តកិច្ចព្រមព្រៀងទាំង៥ចំណុច និងស្វែងរកនូវច្រកចេញឲ្យភូមាវិលរកភាពប្រក្រតីឡើងវិញ ក្រោយការធ្វើរដ្ឋប្រហាររបស់របបសឹក។
បើតាមក្រសួងការបរទេស ការជជែកក្រៅផ្លូវការនេះ ធ្វើឡើងទៅតាមចំណុចទី១៤របស់ថ្នាក់ដឹកនាំអាស៊ាន ដើម្បីពិនិត្យមើលអំពីការអនុវត្តកិច្ចព្រមព្រៀងទាំង៥ចំណុចពីសំណាក់របបសឹកភូមា។ នេះគឺជាការជជែក ដើម្បីជួយភូមារកបាននូវដំណោះស្រាយដោយសន្តិវិធី។ នេះបើតាមក្រសួងការបរទេសកម្ពុជា។
ការជជែកគ្នាក្រៅផ្លូវការទៅលើវិបត្តិភូមា ដែលជាការផ្ចុងផ្តើមដោយភាគីថៃ ពេលនេះ ធ្វើឡើងដោយមានការចូលរួមពីសំណាក់រដ្ឋមន្ត្រីរបបសឹក រហូតដល់៣រូប ដែលរួមមាន រដ្ឋមន្ត្រីទទួលបន្ទុកកិច្ចការបរទេស រដ្ឋមន្ត្រីសហប្រតិបត្តិការអន្តរជាតិនិងវិនិយោគ និងរដ្ឋមន្ត្រីទំនាក់ទំនងសេដ្ឋកិច្ចបរទេស។ រីឯសមាជិកអាស៊ានវិញ មានកម្ពុជាក្នុងនាមជាប្រធាននៅឆ្នាំនេះ ថៃដែលជាម្ចាស់ផ្ទះ ឡាវ និងវៀតណាម។ អ្វីដែលគួរឲ្យកត់សម្គាល់ គឺបណ្តាបងធំអាស៊ាន ជាអាទិ៍ ឥណ្ឌូនេស៊ី ម៉ាឡេស៊ី សិង្ហបុរី ហ្វីលីពីន និងប្រ៊ុយណេ មិនមានវត្តមានឡើយនៅចំពោះការជជែកក្រៅផ្លូវការ ដែលមានភាគីរដ្ឋមន្ត្រីរបបសឹកចូលរួមពេលនេះ។
សូមបញ្ជាក់ថា កិច្ចប្រជុំនៅទីក្រុងបាងកក នាថ្ងៃទី២២ធ្នូ ស្តីពីវិបត្តិភូមា ធ្វើឡើងដោយមានការផ្តួចផ្តើមពីរដ្ឋមន្ត្រីការបរទេសថៃ លោក Don Pramudwinai ដោយហេតុថា ថៃបានរងផលប៉ះពាល់ដោយផ្ទាល់ និងប្រយោលពីវិបត្តិភូមា គិតចាប់តាំងពីការណ៍ដែលរបបសឹកធ្វើរដ្ឋប្រហារ នៅថ្ងៃទី០១កុម្ភៈ២០២១។ ការផ្ចុងផ្តើមឲ្យមានការជជែកក្រៅផ្លូវការនេះ ត្រូវបានអ្នកតាមដានកិច្ចការអន្តរជាតិ យល់ថា ជារឿងល្អដើម្បីរកដំណោះស្រាយឲ្យភូមាបានឆាប់រហ័ស។ ក៏ប៉ុន្តែ បើតាមអ្នកវិភាគ នេះក៏អាចជាភាពអាម៉ាសមួយរបស់កម្ពុជាក្នុងនាមជាប្រធានអាស៊ាន ដែលមិនអាចរកដំណោះស្រាយឲ្យភូមាបាន និងត្រូវឲ្យសមាជិកអាស៊ានផ្សេងទៀតចូលលូកដៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ