លោក ហ៊ុន សែន៖បញ្ហាដែលលំបាកបច្ចុប្បន្ននេះគឺផលិតបានហើយគ្មានទីផ្សារ
ប្រមុខរដ្ឋាភិបាលកម្ពុជានៅថ្ងៃចន្ទនេះ បានទទួលស្គាល់ពីការត្អូញត្អែរថា ផលិតផលកសិកម្ម ឬផលិតផលផ្សេងៗទៀតមួយចំនួន ដែលផលិតបានហើយបែរជាគ្មានទីផ្សារទៅវិញ។ ប៉ុន្តែជាមួយនឹងការទទួលស្គាល់នេះ លោក ហ៊ុន សែន បានចំអកទៅកាន់គណបក្សប្រឆាំងថា «ធ្វើនយោបាយប្រជាភិថុតិ ដោយសន្យាធ្វើឲ្យស្រូវឡើងថ្លៃ និងធ្វើឲ្យអង្ករចុះថោក»។ បើតាមលោកនាយករដ្ឋមន្ត្រី ហ៊ុន សែន ការដឹកនាំរបស់រដ្ឋាភិបាលគឺមិនងាយស្រួលឡើយ ហើយសូមការយោគយល់ពីប្រជាពលរដ្ឋ ខណៈលោកនៅបន្តអំពាវនាវឲ្យពលរដ្ឋបោះឆ្នោតឲ្យបក្សរបស់លោក។
ចុះផ្សាយនៅថ្ងៃ៖
ស្តាប់ - ០១:៤៦
នៅក្នុងពិធីបើកការដ្ឋានជួសជុលផ្លូវលេខ៤១ ដែលជាកម្ចីរបស់ចិន ពីខេត្តកំពង់ស្ពឺទៅកាន់ខេត្តកំពតនៅព្រឹកថ្ងៃទី២៦ធ្នូ លោកនាយករដ្ឋមន្ត្រី ហ៊ុន សែន បានថ្លែងថា ការចុះកិច្ចព្រមព្រៀងពាណិជ្ជកម្មសេរីរវាងកម្ពុជា និងចិន គឺជាជោគជ័យមួយក្នុងការជំរុញឲ្យមានការនាំចេញទំនិញជាច្រើនពីកម្ពុជាទៅចិន ពិសេសអង្ករ និងផលិតកសិកម្មផ្សេងទៀត។ ប៉ុន្តែជាមួយគ្នានេះ លោកប្រមុខរដ្ឋាភិបាលខ្មែរទទួលស្គាល់ថា ផលិតផលកសិកម្ម ឬផលិតផលផ្សេងៗទៀតមួយចំនួន ដែលកម្ពុជាផលិតបានហើយបែរជាពិបាករកទីផ្សារទៅវិញ។ លោកចាត់ទុកថា នេះជាបញ្ហាដែលលំបាកបច្ចុប្បន្នរបស់រដ្ឋាភិបាល ខណៈលោកឆ្លៀតចំអកទៅកាន់គណបក្សប្រឆាំងថា ធ្វើនយោបាយប្រជាភិថុតិកេងចំណេញលើបញ្ហានេះ តាមរយៈដើរប្រាប់អ្នកទិញអង្ករតាមទីផ្សារថានឹងធ្វើឲ្យអង្ករចុះថោក ហើយបន្តទៅប្រាប់អ្នកធ្វើស្រែថា នឹងធ្វើឲ្យស្រូវឡើងថ្លៃ។
សម្រាប់លោក ហ៊ុន សែន គឺរដ្ឋាភិបាលមានការថ្លឺងថ្លែងចំពោះបញ្ហាដែលកើតមានរវាងអ្នកផលិតដែលចង់លក់បានថ្លៃ និងអ្នកប្រើប្រាស់ដែលចង់បានទំនិញក្នុងតម្លៃទាប។ លោកលើកពីករណីអ្នកចិញ្ចឹមជ្រូកដែលប្រមាណ១ម៉ឺនគ្រួសារចង់ឲ្យជ្រូករស់ឡើងថ្លៃ ខណៈលោកអះអាងថាអ្នកបរិភោគសាច់ជ្រូករាប់លាននាក់ ចង់ឲ្យសាច់ជ្រូកចុះថោក។
នៅចំពោះមុខបញ្ហាផលិតផលកសិកម្មរបស់កម្ពុជាដែលពិបាករកទីផ្សារនេះ បើតាមប្រមុខរដ្ឋាភិបាលកម្ពុជា គឺបញ្ហានេះ អាចដោះស្រាយបាន តាមរយៈកម្ពុជា មានកិច្ចព្រមព្រៀងពាណិជ្ជកម្មសេរីជាមួយចិន ជាមួយកូរ៉េខាងត្បូង និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (RCEP) ដែលមានសមាជិក១៥ប្រទេសនោះបានចូលជាធរមាននៅចុងឆ្នាំ២០២២នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ