កម្ពុជា-ថៃ យកឆ្នាំ២០២៥ បង្កើនទំហំពាណិជ្ជកម្មឲ្យដល់ ១៥ពាន់លានដុល្លារ
កម្ពុជា និងថៃគ្រោងសម្រេចឲ្យបានទំហំពាណិជ្ជកម្ម ១៥ពាន់លានដុល្លារនាឆ្នាំ២០២៥ ខណៈថៃប្រាប់កម្ពុជាថាប្រទេសទាំងពីរត្រូវការកិច្ចសហការបន្ថែមទៀត។ នេះបើតាមការលើកឡើងរបស់នាយករដ្ឋមន្ត្រីថៃ ក្នុងជំនួបជាមួយឯកអគ្គរាជទូតកម្ពុជា កាលពីថ្ងៃទី២៨ ខែធ្នូ។ ពាណិជ្ជកម្មរវាងប្រទេសទាំងពីរក្នុងរយៈពេល ១១ខែឆ្នាំ២០២២ នៅតែបន្តរក្សាកំណើន និងមានទំហំជាង ៩ពាន់ដុល្លារ។
ចុះផ្សាយនៅថ្ងៃ៖
ស្តាប់ - ០២:២០
ទាំងឯកអគ្គរាជទូតកម្ពុជាប្រចាំនៅប្រទេសថៃ និងលោកនាយករដ្ឋមន្ត្រីថៃសុទ្ធតែបានស្វាគមន៍ចំពោះកំណើនទំហំពាណិជ្ជកម្មតាមព្រំដែនរវាងប្រទេសទាំងពីរ ខណៈនាយករដ្ឋមន្ត្រីថៃបញ្ជាក់ថា លោកពេញចិត្តនឹងបន្តកិច្ចសហការរវាងកម្ពុជា ដើម្បីសម្រេចឲ្យបាននូវទំហំពាណិជ្ជកម្ម ១៥ពាន់លានដុល្លារ ក្នុងឆ្នាំ២០២៥។ ជាការលើកឡើងនៅក្នុងជំនួបរវាងលោក អ៊ូក សោភ័ណ ឯកអគ្គរាជទូតកម្ពុជាប្រចាំនៅប្រទេសថៃ ដែលផុតអាណត្តិ និងលោក ប្រាយុទ្ធ ចាន់អូចា នាយករដ្ឋមន្ត្រីថៃ កាលពីថ្ងៃទី២៨ ខែធ្នូ។
កម្ពុជាគឺជាដៃគូពាណិជ្ជកម្មលំដាប់ទី១៧របស់ថៃ ហើយក្នុងរយៈពេល១១ខែ ពោលគឺចាប់ពីខែមករា ដល់ខែវិច្ឆិកា ឆ្នាំ២០២២ ប្រទេសទាំងមានទំហំពាណិជ្ជកម្មសរុបចំនួន ៩.១៧ពាន់លានដុល្លារ កើនឡើង២៥ភាគរយធៀបនឹងរយៈពេលដូចគ្នា កាលពីឆ្នាំ២០២១។ នេះបើតាមទិន្នន័យពាណិជ្ជកម្មនៃក្រសួងពាណិជ្ជកម្មថៃ។ ក្នុងរយៈពេល១១ខែ ប្រទេសថៃបាននាំទំនិញមកកម្ពុជា ក្នុងទំហំជាទឹកប្រាក់ ៨.១៣ពាន់លានដុល្លារ មានកំណើន២៥ភាគរយ ហើយកម្ពុជាបាននាំទំនិញទៅប្រទេសថៃក្នុងទំហំជាទឹកប្រាក់ ១.០៤ពាន់ដុល្លារ មានកំណើន២៧ភាគរយ។
លោក លឹម ហេង អនុប្រធានសភាពាណិជ្ជកម្មកម្ពុជា បានប្រាប់វិទ្យុបារាំងអន្តរជាតិ នៅថ្ងៃទី២៩ ខែធ្នូថា ប្រទេសទាំងពីរបានដោះដូរទំនិញស្ទើរគ្រប់វិស័យ ហើយថៃគឺជាប្រទេសមួយដែលកម្ពុជាបាននាំចេញផលិតផលកសិផលច្រើន។ លោក លឹម ហេង បង្ហាញការជឿជាក់ថា ការបង្កើនទំហំពាណិជ្ជកម្មឲ្យបាន ១៥ពាន់លានដុល្លារនាឆ្នាំ២០២៥ គឺអាចទៅរួច ដោយសារប្រទេសទាំងពីរស្ថិតនៅក្នុងសហគមន៍សេដ្ឋកិច្ចអាស៊ាន ដែលអនុវត្តតាំងពីឆ្នាំ២០១៥មក។
ក្នុងជំនួបចុងក្រោយនេះ ក៏មានការជជែកពីកិច្ចសហការបើកច្រកព្រំដែនអន្តរជាតិស្ទឹងបត់-បាណងអៀន និងការសាងសង់ស្ថានីយរថភ្លើងនៃព្រំដែនរវាងប្រទេសទាំងពីរនៅប៉ោយប៉ែត។ លោកនាយករដ្ឋមន្ត្រីថៃ បានបញ្ជាក់ថា ក្នុងជំនួបជាមួយនាយករដ្ឋមន្ត្រីកម្ពុជា កាលពីប្រជុំកំពូលអាស៊ាន ភាគីទាំងពីរបានឯកភាពក្នុងការដំណើរការស្ពានមិត្តភាពកម្ពុជា-ថៃ នៅច្រកព្រំដែនស្ទឹងបត់-បាណងអៀន ខណៈដែលការិល័យគយកំពុងសាងសង់។ នេះបើតាមការចុះផ្សាយរបស់សារព័ត៌មានបាងកកប៉ុស្តិ៍ និងគេហទំព័ររបស់រដ្ឋាភិបាលថៃនៅថ្ងៃទី២៩ ខែធ្នូ។
ពាក់ព័ន្ធនឹងបញ្ហាឆបោកតាមទូរស័ព្ទ(ក្រុមជនខិលខូច) លោកនាយករដ្ឋមន្ត្រីថៃអរគុណកម្ពុជាសម្រាប់កិច្ចសហប្រតិបត្តិការក្នុងការជួយប្រជាជនថៃដែលរងគ្រោះនៅកម្ពុជា។ ជាការឆ្លើយតប លោក អ៊ូក សោភ័ណ ឯកអគ្គរាជទូតកម្ពុជា បញ្ជាក់ថា កម្ពុជាលើកទឹកចិត្តដល់ភ្នាក់ងារពាក់ព័ន្ធនៃប្រទេសទាំងពីរធ្វើការរួមគ្នា ដើម្បីដោះស្រាយបញ្ហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ