នាយករដ្ឋមន្រ្តីហៅទេសចរចិនមកទស្សនាកម្ពុជាខណៈប្រទេសអឺរ៉ុបខ្លះរឹតបន្តឹងលើអ្នកដំណើរមកពីចិន
ផ្ទុយពីប្រទេសអឺរ៉ុបខ្លះដែលមានលក្ខខណ្ឌតឹងតែងសម្រាប់អ្នកដំណើរមកពីចិន លោកនាយករដ្ឋមន្ត្រី ហ៊ុន សែន នៅថ្ងៃទី០២ខែមករានេះបានប្រកាសស្វាគមន៍ ទេសចរចិន ប្រជាជនចិន ធ្វើទេសចរណ៍មកកាន់ ប្រទេសកម្ពុជា។ ការអំពាវនាវរបស់ប្រមុខរដ្ឋាភិបាលកម្ពុជាយ៉ាងដូច្នេះ បន្ទាប់ពីការលើកឡើងរបស់ឯកអគ្គរដ្ឋទូតចិនអំពីការបើកប្រទេសចិនឡើងវិញ ជាមួយក្ដីរំពឹងលំហូរទេសចរណ៍មកកាន់កម្ពុជា។ បើតាមលោក ហ៊ុន សែន កម្ពុជានឹងចំណេញផ្នែកសេដ្ឋកិច្ចពីវិធានការរឹតបន្តឹងលើអ្នកដំណើរមកពីចិន។
ចុះផ្សាយនៅថ្ងៃ៖
ស្តាប់ - ០២:៤៨
នៅចំពោមុខឯកអគ្គរដ្ឋទូតចិន វ៉ាង វិនធៀន ក្នុងពិធីបើកការដ្ឋានសាងសង់ស្ពានឆ្លងកាត់ទន្លេមេគង្គខេត្តក្រចេះនិងផ្លូវភ្ជាប់ក្រោមជំនួយសម្បទានពីរដ្ឋាភិបាលចិន ថ្ងៃទី២ ខែមករានេះ លោកនាយករដ្ឋមន្ត្រី ហ៊ុន សែន បានគូសបញ្ជាក់ទៀតថា កម្ពុជាគោលដៅទេសចរណ៍ដ៏ទាក់ទាញសម្រាប់ទេសចរចិនខណៈដែលចិនត្រៀមបើកប្រទេសឡើងវិញដោយលំហូរប្រជាជនរាប់រយលាននាក់នឹងធ្វើដំណើរកំសាន្តនៅលើពិភពលោក។
ជាមួយនឹងការផ្ដល់ទំនុកចិត្តលើប្រជាជនចិន លោកនាយករដ្ឋមន្ត្រី ហ៊ុន សែន ក៏មិនភ្លេចរំឮកឡើងវិញជុំវិញដំណើរទស្សនកិច្ចរបស់លោកនៅចិន នាអំឡុងពេលដែលចិនចាប់ផ្តើមរាលដាលកូវីដ-១៩ ក្នុងឆ្នាំ២០២០។ បើតាមលោក ហ៊ុន សែន កម្ពុជាមិនតឹងតែងដាក់ប្រជាជនចិន ឬ ទេសចរចិនដូចប្រទេសមួយចំនួនឡើយហើយថា កម្ពុជានឹងចំណេញសម្រាប់ការមកដល់របស់ទេសចរចិន។
មុនកូវីដ១៩ កម្ពុជាទទួលទេសចរចិនជាង២លានក្នុងមួយឆ្នាំ។ លោក ហ៊ុន សែន រំពឹងទទួលបានទេសចរចិន២លាននាក់នៅឆ្នាំ២០២៣ ក្នុងចំណោមទេសចរសរុបប្រមាណ៥លាននាក់ ដែលនឹងធ្វើឲ្យកំណើនសេដ្ឋកម្ពុជាផ្ដើមរើបឡើងវិញ។ ដោយឡែកឆ្នាំ២០២២ កម្ពុជាទទួលបានភ្ញៀវទេសចរបរទេស២លាន២សែននាក់។
ជាការកត់សម្គាល់ផ្ទុយពីរដ្ឋាភិបាលកម្ពុជា រដ្ឋាភិបាលនៃប្រទេសកាន់តែច្រើន បានចាប់ផ្តើមព្រួយបារម្ភ និងបង្កើនការប្រុងប្រយ័ត្ន ស្តីអំពីការរីករាលដាលឆ្លងកូវីដ១៩ ដោយសារតែអ្នកដំណើរមកពីចិន។ ប្រទេសអឺរ៉ុបខ្លះ ដូចជាអ៊ីតាលី អេស្ប៉ាញជាដើម បានសម្រេចរិតបន្តឹងវិធានការ ដាច់ដោយឡែក រៀងៗខ្លួន។ ប្រទេសទាំងពីរ តម្រូវឲ្យអ្នកដំណើរមកពីចិនទាំងអស់ ត្រូវតែបង្ហាញលទ្ធផលតេស្តអវិជ្ជមានកូវីដ ឬក៏បង្ហាញឯកសារថា បានចាក់វ៉ាក់សាំងគ្រប់ដូស។ សហរដ្ឋអាមេរិក កាណាដា អ៊ីស្រាអែល អង់គ្លេស កោះតៃវ៉ាន់ ឥណ្ឌា កូរ៉េខាងត្បូង និងជប៉ុនជាដើម ក៏សុទ្ធតែបានប្រកាសថាគេ នឹងរឹតបន្តឹង ធ្វើតេស្តរកូវីដ លើអ្នកដំណើរមកពីចិនដែរ។
យោងតាមអង្គការ Airfinity ក្នុងរវាង២សប្តាហ៍ចុងក្រោយនេះ មានអ្នកស្លាប់ដោយកូវីដនៅចិន យ៉ាងហោច ៩០០០នាក់ក្នុងមួយថ្ងៃ ហើយបើសរុបគឺប្រមាណ១សែននាក់ហើយ បន្ទាប់ពីរដ្ឋាភិបាលចិន បានដកចេញនូវវិធានការរឹតបន្តឹងទាំងឡាយ។
តែយ៉ាងណាក្នុងសន្ទកថា ស្វាគមន៍ដំណើរមកដល់របស់ទេសចរចិន ប្រជាជនចិន លោកនាយករដ្ឋមន្ត្រី ហ៊ុន សែន អំពាវនាវឱ្យប្រជាពលរដ្ឋទៅចាក់វ៉ាក់សាំងដូសជំរុញ ៦ខែម្តង ដើម្បីបង្កើនភាពស៊ាំក្នុងសហគមន៍។ គិតត្រឹមខែវិច្ឆិកា រដ្ឋាភិបាលចាក់វ៉ាក់សាំងគ្រប់ដូសជូនពលរដ្ឋបានជាង ១៤លាន ៦សែននាក់ ក្នុងចំណោមពលរដ្ឋដែលត្រូវចាក់ប្រមាណ ១៥លាននាក់ ដែលរាប់ពីកុមារអាយុចាប់ពី ៣ឆ្នាំ រហូតដល់មនុស្សពេញវ័យ។ រីឯដូសជំរុញទី៣ ទី៤ និងទី៥ វិញ រដ្ឋាភិបាលចាក់ជូនពលរដ្ឋបានសរុបជាង ១៨លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ